Yeremiya 18

Saabu maare ŋon dɛɛ

1Kei yɛna nombii keŋ Degbeŋgyoo be yako Yeremiya, 2Koro tisi gyu saabu maare ŋon dɛɛ, na maa yako neŋ me nombia botɔɔ.>> 3Mena dɔɔ me gyuu saabu maare ŋon dɛɛ te me naa e nae keŋ ɔ na mo fiili saabu keŋ nɛ gyaŋ. 4Mɔna saabu keŋ ɔ ne maa nɛ wɔlɛɛwɔ ɔ nyiŋmaa man, mena dɔɔ ɔ besewɔ mo tɛɛle keŋ maa saabu wɔle te ɔ kyalase ke ŋgba mena keŋ ɔ ne gyae nɛ.

5Keŋte Degbeŋgyoo kolosiwɔ fa maŋ, 6Degbeŋgyoo torowɔ yako nyiaa, <<Mɔɔ tale yɛɛ nyaŋ Iserae dekpaŋalaŋ ŋgba saabu maare kei nɛ yee?>> Mena keŋ tɛɛle degbaŋ doo saabu maare ŋon nyiŋmaa man nɛ, mena te nyaŋ Iserae dekpaŋalaŋ doo me nyiŋmaa man. 7Nyi me yako nyi maa kulu na maa tekerii lɔ na maa wɔlɛɛ tɛɛle yaa gyooridedii daale, 8te akpaa mena tɛɛle keŋ mɔɔ faaree ke de kyɛɛkee lee ke nombiakumɛɛ man na, kenaŋ na maa kyɛɛkee keŋ mɔ yele nombiikum ke yala wɔ ŋgba mena keŋ mɔ bakesee nɛ ya. 9Mena mɔ te akpaa ma bese yako nyi maa baŋ tɛɛle yaa gyooridedii daale na ke ka seŋ, 10te akpaa ka de yɛɛ nombiikum me siaman te ke ta mo obuo fa maŋ ya nɛ, kenaŋ na maa kyɛɛkee ma nyeempɔ lee deeli keŋ mɔɔ gyae nyi maa yɛɛ fa ke nɛ man.

11<<Nɛnɛɛ yako Yudatena na Yerusalɛmtena nyiaa, <Nnɛ yaa Degbeŋgyoo ne yako. Kɛɛ! Mɛɛ desina nombiikum maa fa ŋon te mɛɛ bake ɛ nyeeman. Mena dɔɔ ɛ man ɔkamasɛ waa kyɛɛkee lee ɔ gbɛɛneŋ kumɛɛ man, na ɛ ke desina ɛ gbɛɛneŋ na ya ayɛɛsa.>> 12Mɔna baa tiranɔɔ nyiaa, <Te yɛɛ kolo ya. Dee gyu de siaman na da kebakeseese, na dee sila de konɔɔyuŋ gbɛɛneŋ ŋan na dɛɛ yɛɛ nombiakumɛɛ ŋan dɛɛ gyae nɛ.> >>

13Mena dɔɔ nnɛ yaa Degbeŋgyoo ne yako:

<Ɛ gyu ke bɔɔse tɛɛlese ŋan nyiaa,

Amɔte nyiina nombii kei see?

Iserae keteŋ ŋon,

te yɛɛ nombii keŋ te gbirisi balaŋ wose

14Lebanɔn Senoo

ta yoo lee ke kpanaŋse maŋ see?

Ka loŋ defɛɛsa keŋ ne bɛɛ leenaŋ lem nɛ

te kare see?

15Mɔna me balaŋ te wolee maŋ,

bɛɛ too oliifi fa bɛɛneŋ baŋ bɔɔ taŋ tɔnɔɔ ya,

baŋ bɔɔ yele bɛɛ kpaŋte be gbɛɛneŋ man,

gyaŋgba detɛese ŋan man nɛ.

Ba te yele be dɔŋ yenaase,

gbɛɛneŋ ŋan be ta lese ŋa ya nɛ dɔɔ.

16Be tɛɛle gyae ke doo yakaa,

na baa kulu ke kekpaakekpaa,

baŋ pou baa ta botɔɔ nɛ nɔɔ gyae ke doo wɔ,

na baa kpiisi ba nyeeya.

17Maa yaasee wɔ be kɔlara siaman

ŋgba weese dɛɛlee yenaŋ feliŋ nɛ.

Wee keŋ nombiikum de yala wɔ nɛ,

maa mo me wɔle tee wɔ, keŋ mɔɔ gɛɛse kɛɛ wɔ ya.>>

18Te be yakowɔ nyiaa, <<Ɛ kɔŋ na dɛɛ bake tia Yeremiya, nawolo nyi bɔɔ gyae baa tina sae ŋon mmaraa kawola yaa siakaralatena baŋ kekolosifa yaa gbalara baŋ nombia yela ya. Mena dɔɔ ɛ kɔŋ dɛɛ mo de nɔɔ yoona e, na dɔɔ see deŋele nyii nombii kamasɛ keŋ waa yako nɛ ya.>>

19Degbeŋgyoo, tei maŋ,

nyii keŋ baŋ bee yoona maŋ nɛ ne yako!

20Kaboena nyi baa mo dukum tɔ deeli kom?

Mɔna, be te wula dowokom fa maŋ.

Tɔɔse nyi ma seŋawɔ n siaman,

te ma solawɔ fa wɔ,

nyi nyaa lese n baŋ lee be dɔɔ.

21Mena dɔɔ yela tanam ke gbalase be bia,

mo wɔ fa yoosila.

Yela be wɛɛla ke yɛɛ ala baŋ be bia ba yekee na liala,

yela baa koe be baala,

yela baa mo yoosila koe be tewulɛɛ yooman.

22Yela baa nyii kewii ba akpaŋalaŋse man,

debaŋ keŋ n ba mo kɔlara kɔŋ be dɔɔ karatetee nɛ,

nawolo nyi be te wula dowokom nyi baa mo kyaŋ man,

te ba yoowɔ nyɔɔ maŋ kɔtase.

23Mɔna nyaŋ Degbeŋgyoo n gyeŋ

ŋan pou bɔɔ bake nyi baa ko maŋ nɛ.

Naa mo be nombiakumɛɛ kyɛɛ wɔ,

yaa n ka feefo be dukum lee n siaman ya.

Yela baa di be dɔɔ n siaman,

mo n baŋ wɔŋ ba deŋele.