Yeremiya 19

1Nnɛ yaa Degbeŋgyoo ne yako, <<Gyu na n kaa lɛɛ osuŋ lee saabu maare gyaŋ. Mo balaŋ baŋ kegyiise na saese kegyiise baŋ baale kpuna n wose, 2na ɛ ka lee gyu Bɛne Hinome detaŋgya keŋ benaana saabu dɛɛwɔkee denaanɔɔ keŋ nɛ. Gyɔ nombia ŋan mɔɔ yako neŋ nɛ dekpeŋkpeŋ botɔɔ. 3na n ke yako nyiaa, <<Ɛmɛɛ Yuda gyooneŋ na Yerusalɛmtena, ɛ nyii Degbeŋgyoo nombia. Nnɛ yaa Degbeŋgyoo Doŋ Pou Nyee, Iseraetena Wurubuarɛ ŋon ne yako, ɛ tei, maa yela nombia ke yala kɛbo keŋ gyae ke yela walaŋ kamasɛ ŋon ɔ nyii na, ɔ deŋela man gyae ke yɛɛ e wueŋ. 4Nawolo nyi ba te bɛɛ maŋ te ba moo kɛbo yɛɛ wurubuarɛse wɔlɛɛ dekyae, te baa too oliifi ke dɔɔ fa wurubuarɛse baŋ, baŋ yaa be naanaɔ yaa Yudatena gyooneŋ ba gyeŋ wɔ korakora ya nɛ, te ba moo baŋ be nombia dei nɛ fatabo waale kɛbo. 5Ba te baŋee kedeesaboya botɔɔse ŋan korɛɛ nɛ fa Baale na baa too be bia yɛɛ kedeesa fa e. Mmaraa keŋ ma te fa wɔ yaa yako ke nombia yaa ke kɔŋ ma nyeempɔ man gba ya nɛ. 6Mena dɔɔ Degbeŋgyoo kpa, ɛ kɛɛ nideli weeya ŋaale ne kɔŋ keŋ balaŋ ba tekaa baake kɛbo nyi Tofɛte yaa Bene Hinome Detaŋgya ya, mɔna baa baake ke nyi Balaŋ Kako Detaŋgya.

7< <<Maa yele Yuda na Yerusalɛm kebake ke yɛɛ yakaa kɛbo. Maa yela baa yoo yala be kɔlara yoosilase nɔɔman, na baŋ bɛɛ gyae wɔ baa ko nɛ nyiŋmaa man. Na maa mo ba woya fa gyebuse na ŋaleman wonembia. 8Maa wɔlɛɛ donɔɔ dinaa kei na ke ka bese gyakoloŋ na kekulu. Baŋ pou baa mo botɔɔ nɛ wose gyae ke gbirisi wɔ na ke doo be nɔɔ lee mena keŋ bɔɔ yɛlɛɛ ke nɛ dɔɔ. 9Maa yela baa tao be bia alebia na be bia tewulɛɛ na baa tao dɔŋa nawolo nyi be kɔlara baa ŋere wɔ tɔ wɔ do nideli na baa wɔlɛɛ wɔ.>>

10Nɛnɛɛ yɛlɛɛ osuŋ keŋ balaŋ baŋ bɔɔ sila neŋ gyu nɛ siaman, 11na n ke yako wɔ nyiaa, <<Nnɛ yaa Degbeŋgyoo Doŋ Pou Nyee ne yako, Maa yɛlɛɛ tɛɛle kei na donɔɔ dinaa kei ŋgba mena keŋ saabu maare kei osuŋ be yɛlɛɛ keŋ te ba tekaa de kedesina ya nɛ. Baa wuu woya Tofɛte keli debaŋ keŋ dewue be doo bela ya. 12Mena yaa maa yɛɛ kɛbo kei na baŋ be kyaa kɛbo nɛ, maa yɛɛ donɔɔ kei ŋgba Tofɛte nɛ. Degbeŋgyoo torola yako. 13Baa waalaa Yerusalɛm na Yuda gyooneŋ akpaŋalaŋse na akpaŋalaŋse ŋan bɛɛ too oliifi ŋa nyeeya dɔɔ fa abɔɔ ŋan pou kyaa adido nɛ, te be woli soloŋ fa wurubuarɛse baale.>> >

14Keŋte Yeremiya besewɔ lee Tofɛte botɔɔ keŋ Degbeŋgyoo be kpila e nyi waa gyu ke gyɔ ɔ nombia ŋan dekpeŋkpeŋ nɛ kɔŋ kaa seŋ Degbeŋgyoo ɔsom deni dinaa keŋ dekpaŋalaŋ keŋ man te ɔ yakowɔ fa balaŋ baŋ pou nyiaa, 15<<Nnɛ yaa Degbeŋgyoo Doŋ Pou Nyee, Iseraetena Wurubuarɛ ŋon ne yako, <<Ɛ tei! Maa mo nombiikum keŋ mɔɔ yakosee fa donɔɔ dinaa kei na akuraase ŋan be kilisi ke nɛ kɔŋ be dɔɔ, nawolo nyi be dana konɔɔyuŋ te bɔɔ ne tei maŋ ya.>> >