Yeremiya 20

Yeremiya na Pasure

1Debaŋ keŋ Imere bu sae Pasure ŋon ɔ yɛɛ Degbeŋgyoo ɔsom deni dinaa keŋ man siamante e be nyii Yeremiya nombia keyakosee nɛ, 2ɔ yelaa be tuku gbalare Yeremiya te ba doo e agbaraagbaraase kyaŋna Bɛneyameŋ denaanɔɔ adogbɛɛ keŋ Degbeŋgyoo ɔsom deni dinaa keŋ man. 3Ke tɛɛ kena nɛ, te Pasure ka lese e lee agbaraagbaraase ŋan te Yeremiya yako e nyiaa, <<Na yele keŋ Degbeŋgyoo ba do neŋ nɛ yɛna Pasure ya, mɔna n yele yɛna Gyakoloŋ Doo Yenaŋ Kamasɛ. 4Nawolo nyi nnɛ yaa Degbeŋgyoo ne yako, <Maa yela n ka bese gyakoloŋ fa nyaŋ gbagba n wose na n gyoona pou, nyaŋ gbagba n kena na n sia mena keŋ n gyoona baa yala be kɔlara yoosila nɔɔman. Maa mo Yudatena pou do Babilɔn gyoo nyiŋmaa man. Waa mo wɔ gyu Babilɔn yaa waa mo yoosila koe wɔ. 5Maa mo donɔɔ dinaa kei wosekenyiŋ pou na ŋa abɔɔ kpaakpaa, na ŋa abɔɔ ŋan ŋɛɛ lee koya na Yuda gyooneŋ wosekenyiŋ ŋan weesɛɛ nɛ fa be kɔlara. Baa kuu ŋa ŋgba yooman abɔɔ nɛ gyu Babilɔn 6Te nyaŋ Pasure na n dekpaŋalaŋmantena pou dɔɔ, baa mo ŋon gyu gbeŋiri man Babilɔn. Botɔɔ te ɛmɛɛ na n gyoona baŋ ɛ be gbala akɛrɛɛ nombia nɛ ɛ ka yeŋ na baa wuu ŋon.>> >

Yeremiya katoroŋ

7Ao Degbeŋgyoo, n beo maŋ. te ba beo maŋ.

N dana doŋ kela maŋ te n dii me dɔɔ.

Bɛɛ boŋo maŋ wee kamasɛ,

ɔkamasɛ ne kulu maŋ.

8Debaŋ kamasɛ keŋ mee kolosi na, mɛɛ fae yeesa,

gyɔ nombiakumɛɛ keyɛɛ na kewɔlɛɛ dekpeŋkpeŋ.

Mena dɔɔ Degbeŋgyoo nombia,

ta mo tuubia na kekulu kɔŋ me dɔɔ wee dibiliŋ pou.

9Mɔ nyi akpaa me yako nyi, <<Mɔɔ tekaa yako ɔ nombii ya

yaa maa kolosi ɔ yela man ya nɛ,>>

na ɔ nombii doo me konɔɔ man ŋgba boalaŋ nɛ,

boalaŋ keŋ ne kpaa me ŋɔɔ man nɛ.

Te yele te takaa maŋ,

ke gbagba na mɔɔ tale ya.

10Me nyii balaŋ burum ne kolosi adadawoya man nyiaa,

<<Gyakoloŋ kyaa yenaŋ kamasɛ!

Ɛ toro yako e! Ɛ yela dɛɛ toro yako e!>>

Me gyoona pou,

ne daa ma keyala te bɛɛ yako nyiaa,

<<Mberem baa beo e,

na dee di ɔ dɔɔ,

na dɛɛ tɔ e kom.>

11Mɔna Degbeŋgyoo kpuɛna maŋ ŋgba yoonɔɔte doŋte nɛ,

mena dɔɔ baŋ bɛɛ naase maŋ diyem baa kpaŋte te bɔɔ di me dɔɔ ya.

ba kebake be gyae ke de ya te desɛŋ gyae ke kyaŋ wɔ nideli

bɔɔ gyae baa wolee obuo keŋ bɔɔ lese lee be dɔɔ nɛ korakora ya.

12Degbeŋgyoo Dekpataakpere n ne kɛɛse baŋ ba tenɛɛ,

te n ne kɛɛ be konɔɔ na nyeempɔ man,

yela maa naa mena keŋ n ke tɔ kom,

nawolo nyi me ta mo me nombia do n nyiŋmaa man.

13Ɛ kpee nɔɔneŋ fa Degbeŋgyoo!

Ɛ lese Degbeŋgyoo yele!

Ɔ na lese ayematena

lee akpanyanyaŋtena nyiŋmaa man.

14Kefaala dɛɛ kɔŋ wee keŋ bɔɔ lola maŋ nɛ dɔɔ!

Be naa hiraa wee keŋ me naa ba lola maŋ nɛ ya.

15Kefaala dɛɛ kɔŋ walaŋ ŋon ɔ ba nombia kpaakpaa kɔna me kya,

te ɔ be yele be yɛɛ e gyoŋ nyiaa,

<Be ta lola bu baale fa neŋ> nɛ dɔɔ.

16Mena walaŋ ŋonaŋ waa yɛɛ ŋgba donɔɔse ŋan,

Degbeŋgyoo be wɔlɛɛ keŋ ɔ te wii wɔ ya nɛ.

Waa nyii kewii yeesa nebo,

na yoo yeesa weese teŋteŋ.

17Nawolo nyi ɔ ta ko maŋ tɔɔman,

na me naa ke yɛɛ ma yebɔɔ,

na maa dɔɔ ɔ tɔɔman kekpaa ya.

18Woŋ dɔɔ te ma leewɔ me naa tɔɔman,

kaa naa kayeyɛɛ na waraŋsa,

na ma weeya ke kɔŋ ɔto desɛŋ man?