Yeremiya 21

Wurubuarɛ ke bɛɛ keŋ Sedekiya be bɔɔse

1Degbeŋgyoo yako nombii kei fa Yeremiya debaŋ keŋ gyoo Sedekiya be kpila e gyu Malekiya bu Pasure na Maaseya bu sae Sefaniya gyaŋ nɛ. Be yako e nyiaa, 2<<Bɔɔse Degbeŋgyoo fa daa nawolo nyi Babilɔn gyoo1 ne yoo daa. Mberem Degbeŋgyoo waa yɛɛ gyakoloŋ nombia fa daa ŋgba mena keŋ ɔ be yɛɛ beneŋ keŋ nɛ, na waa lee de gyaŋ.>>

3Te Yeremiya tiranɔɔ fa wɔ nyiaa, <<Ɛ yako Sedekiya nyi, 4Nnɛ yaa Degbeŋgyoo Iserae Wurubuarɛ ŋon ne yako. Mɛɛ gyae maa besena ɛ yoo abɔɔ ŋan doo ɛ nyiŋmaase man ɛ na mo yoo Babilɔn gyoo na Babilɔntena2 baŋ bɔɔ kaa tɔ ŋon do donɔɔ keŋ man nɛ tia ŋon. Na maa yilaa wɔ do donɔɔ dinaa keŋ man. 5Maŋ gbagba maa tenee me nyiŋmaa na nyiŋmaa dekpataakpere yoo tia ŋon sia keyɛɛ na baŋ nedoŋ man. 6Maa mo kaweekum koe balaŋ na wonembia baŋ be kyaa donɔɔ dinaa keŋ man nɛ. 7Degbeŋgyoo kpa, keŋ wɔle na, maa mo Yuda gyoo Sedekiya na ɔ kyaarabia na balaŋ baŋ bɔɔ nyiŋ nyeedoŋ lee kaweekum na yoosila na tanam donɔɔ dinaa kei man do Babilɔn gyoo Nebukadenɛsa na be kɔlara baŋ bɛɛ gyae wɔ baa ko nɛ nyiŋmaa man. Waa yela baa yala yoosila nɔɔ man, keŋ ɔ be gyae waa wii be waraŋase yaa waa boele wɔ yaa ɔ tɔɔ ke kyoŋii e fa wɔ ya.>

8<<Bese yako balaŋ baŋ nyiaa, <Nnɛ yaa Degbeŋgyoo ne yako, kɛɛ, me ta mo nyeedoŋ gbɛɛ na yeŋ gbɛɛ see n siaman. 9Ɔkamasɛ ŋon waa kyaa donɔɔ dinaa kei man waa yeŋ yoosila nɔɔman, na tanam yaa kaweekum man. Mɔna nyaŋ ŋon nyaŋ ka lee na te mo n wose gyuuna Babilɔntena baŋ bɔɔ kaa tɔ ŋon do nɛ be gyae waa yeŋ ya te baa lɛɛ ba nyeeya. 10Degbeŋgyoo kpa, ma te bakesee nyi maa yɛɛ donɔɔ dinaa kei dukum te na debam ya. Baa mo ke do Babilɔn gyoo nyiŋmaa man, na waa mo boalaŋ wɔlɛɛ ke.>

11Bese yako Yuda gyoorobiiri dekpaŋalaŋ keŋ nyiaa, <Ɛ nyii Degbeŋgyoo nombia. 12Nnɛ yaa Degbeŋgyoo ne yako fa ɛmɛɛ Dawide dekpaŋalaŋ.

Ɛ di nombia na kegbɛɛ nebo kamasɛ,

Lɛɛ ŋon bɔɔ ŋere e lɛo wa bɔɔ nɛ

lee baŋ bɔɔ ŋere e do nɛ nyiŋmaa man,

na mena ya na me baŋ gyae ke bɛɛ lee na ke kpa ŋon ŋgba boalaŋ nɛ

lee dukum keŋ ɛ be yɛɛ nɛ dɔɔ,

te ŋolo be gyae waa tale ko ke ya.

13Degbeŋgyoo kpa, Yerusalɛm, mɛɛ seŋ tia neŋ,

nyaŋ ŋon n kyaa detaŋgya kei adido

kpanaŋ keŋ nyee dɔɔ,

nyaŋ ŋon n ne yako nyiaa, <<Amɔte ne gyaela waa tale kɔŋ kaa seŋ tia daa?

Amɔte ne gyaela waa tale gyoo de dayoe man?>>

14Degbeŋgyoo kpa,

Maa wɔŋ ɛ deŋele ŋgba mena keŋ kaboena ya ayɛɛsa nɛ,

maa do boalaŋ ɛ laaneŋ man

keŋ gyae ke kpa kpene kamasɛ keŋ be kilisi ŋon.>> >