Yeremiya 22

Nombia kedi tia akpanyanyaŋ gyooneŋ

1Nnɛ yaa Degbeŋgyoo ne yako, <<Tisi gyu Yuda gyoo gyooro dekpaŋalaŋ keŋ man, na n kaa gyɔ nombia kɛŋa dekpeŋkpeŋ botɔɔ nyi, 2<Nyaŋ Yuda gyoo ŋon n kyaa Dawide gyoorogbeli dɔɔ, ɛmɛɛ na n kyaarabia na n balaŋ baŋ bɛɛ mo anaanɔɔse kɛŋa man kɔŋ nɛ, ɛ nyii Degbeŋgyoo nombia. 3Nnɛ yaa Degbeŋgyoo ne yako. Yɛɛ keŋ doona kegbɛɛ na keŋ katenɛɛ. Lɛɛ ŋon bɔɔ ŋere e lɛo wa bɔɔ nɛ lee baŋ bɔɔ ŋere e do nɛ nyiŋmaa man. Naa yɛɛ ŋɔɔla na yoyolobiise na liala dukum na tɔɔman ŋan ya, te naa ko ŋon ɔ nombia dei nɛ kɛbo ya. 4Nyi ɛ kɛɛ nideli te ɛ di mmaraase kɛŋa dɔɔ na, kenaŋ na gyooneŋ baŋ baa kyaa Dawide gyoorogbeli dɔɔ nɛ baa kyaa yoo kɔtase na dɛɛkyɔŋse dɔɔ, na be kyaarabia na be balaŋ ke sila wɔ mo gyooro dekpaŋalaŋ kei anaanɔɔse ŋan man gyoo. 5Degbeŋgyoo kpa, mɔ akpaa ɛ te di mmaraase kɛŋa dɔɔ ya na, ma te kɛɛ fa ma wose nyi Gyooro dekpaŋalaŋ kei gyae kaa bese dufuŋ.> >>

6Nnɛ yaa Degbeŋgyoo ne yako lee Yuda gyoo gyooro dekpaŋalaŋ keŋ wose man. <<Doo nyi n wɔɛ ŋgba Gileade,

ŋgba Lebanɔn nyeeman fa maŋ koraŋ nɛ,

de yɛɛ senaa na maa taŋ yɛɛ neŋ bo ŋgba depampaa nɛ,

ŋgba donɔɔse ŋan ŋolo be kyaa ŋe man ya nɛ.

7Maa kpila wɔlɛɛra kaa tia neŋ,

ɔkamasɛ na ɔ yoo abɔɔ

na baa kɛrɛɛ n sida daase kpaakpaa nyiŋan

na baa fuŋ ŋa do boalaŋ man.

8<<Tɛɛlese burum man balaŋ baa kaa mo donɔɔ dinaa kei man na baa bɔɔse dɔŋa nyiaa, <<Woŋ dɔɔ te Degbeŋgyoo yɛɛ donɔɔ dinaa dinaa kei mena? 9Te baa tiranɔɔ fa wɔ nyiaa <Nawolo nyi ba te bɛɛ Degbeŋgyoo be Wurubuarɛ nɔɔkebakesee keŋ te be buŋa wurubuarɛse baale te ba som wɔ.>> >

10Ɛ naa wii yaa ɛ ke di waraŋsa fa gyoo ŋon ɔ ba yem nɛ ya,

mɔna ɛ wii nideli fa ŋon ɔ kyaa gbeŋiri man nɛ,

nawolo nyi ɔ be gyae waa bese kɔŋ korakora

yaa waa bese kɔŋ ɔ donɔɔ man bela ya

11Nnɛ yaa Degbeŋgyoo ne yako lee Yosiya bu Salum 1 ŋon ɔ be di gyoori Yuda ɔ kya naawɔɔ man, te ɔ ba lee kɛbo laŋ nɛ. <<Ɔ be gyae waa bese kɔŋ bela ya. 12Waa yeŋ botɔɔ keŋ bɔɔ kyaŋ e gyu gbeŋiri man nɛ, ɔ be gyae waa naa tɛɛle kei bela ya.>>

13Ŋon ɔ ba mo gbɛɛ keŋ ba tenɛɛ ya baŋ ɔ gyooro dekpaŋalaŋ,

te ɔ ta mo nombia kedi kegbɛɛ dɔɔ baŋ ɔ deni adidote ya,

te ɔ na mo ŋon gbagba ɔ balaŋ yɛɛ tom yakaa

te ɔ bɛɛ tɔ wɔ kom ya nɛ, waa laako.

14Ɔ ne yako nyi, < Maa baŋ gyooro dekpaŋalaŋ dinaa fa ma wose

na adido denɛɛ ŋan ŋe fɛlɛɛ.>

Mena dɔɔ ɔ doo nfanserese dinaana,

ɔ moo Sida daase sam ke

te ɔ moo kolo gyilaa ke.

15<<Nyi n dana sida daase burum na

keŋ gyae ke yɛɛ neŋ gyoo?

N kya be dana weenɛɛ anediŋ na kolo anenyɔɔŋ yee?

Ɔ yɛɛ keŋ tenɛɛ te kedoo na kegbɛɛ,

keŋ dɔɔ te kpene kamasɛ deewɔ fa e nɛ.

16Ɔ dii ayematena na baŋ bɔɔ dana kolo ya nɛ nombia fa wɔ,

keŋ dɔɔ te kpene kamasɛ deewɔ fa e.

na kei yɛna mena keŋ walaŋ ka gyeŋ maŋ yee?>>

Degbeŋgyoo torola yako.

17Mɔna n sia na n konɔɔ

gyakaa bo tɔnɔɔ keŋ ba tenɛɛ ya nɛ dɔɔ,

na baŋ be nombia dei nɛ kakoe

na balaŋ kaŋeredo na kolo kenyiŋ lee gbɛɛkum maŋ.>>

18Mena dɔɔ nnɛ yaa Degbeŋgyoo ne yako lee Yuda gyoo Yosiya bu Yehoyakim wose man.

<< bɔɔ gyae baa di waraŋsa fa e nyiaa,

Ao, me ŋmɛɛtee! Ao, me deesi> ya

Bɔɔ gyae baa di waraŋsa fa e nyi.

Ao, me gbeŋgyoo Ao, ɔ gyoorobiiri> ya.

19Baa wuu e ŋgba mena keŋ bee wuu afurum nɛ,

baa tuu e na tɛɛle na baa fuŋii leki

Yerusalɛm anaanɔɔse ŋan wɔle.>>

20Ɛ gyeŋ gyu Lebanɔn na ɛ ke wii keŋkeŋ

ɛ yela baa nyii ɛ woya Basan

ɛ wii keŋkeŋ lee Abarim

nawolo nyi be ta koe baŋ n ne gyae nɛ pou.

21Me faaree neŋ debaŋ keŋ n be nyiŋ n wose nɛ,

mɔna n yakowɔ nyiaa, <Mɔɔ tei ya!>

Kei yɛna n dinɔɔ leenaŋ n tobiiritɛɛ,

n ta mo obuo fa maŋ ya.

22Feliŋ gyae ke gyɔ n namensekɛɛlera laŋ,

na baa mo baŋ n ne gyae nɛ ŋgba yoogbeŋa nɛ.

Botɔɔ te n sia gyae ka yeŋ na desɛŋ ke kyaŋ neŋ

lee nya akpanyanyaŋ ŋan pou dɔɔ.

23Ɛmɛɛ baŋ ɛ kyaa Lebanɔn2

te ɛ ne fɛɛfo sida daase denɛɛ man,

nombiikum de yala ŋon na nyaŋ ka keŋee,

nyaŋ ke nyii weeleŋ ŋgba alo na doŋeela nɛ.

24Degbeŋgyoo kpa <<Me nyiŋaa me kyaa nɛ, akpaa nyaŋ Yuda gyoo Yehoyakim bu Yehoyakyin3 yɛna kɔɔla keŋ na wola me doŋ te ma doona ke me dunoluŋ nyiŋmaa man koraŋ na, maa kpee neŋ lɔ. 25Maa mo neŋ do Babilɔn gyoo Nebukadenɛsa na Babilɔniatena4 baŋ n ne yee, te bɛɛ gyae neŋ baa ko nɛ nyiŋmaa man 26Maa gegi ɛmɛɛ na n naa ŋon ɔ ba lola neŋ nɛ gyu tɛɛle wɔle keŋ dɔɔ be ta lola ɛ man ŋolo botɔɔ ya, botɔɔ te ɛ bala ɛ ka yeŋ. 27N be gyae n ka bese kɔŋ tɛɛle keŋ ne gyɔ neŋ loo nyi nyaa kɔŋ ke man nɛ korakora ya.>>

28Balee Yehoyakyin kei ta bese desɛŋ, ŋgba sabɛɛ yaale

kolo keŋ ŋolo bɛɛ gyae yee?

Woŋ dɔɔ te baa fuŋ ŋon na ɔ bia leki,

kelɔ tɛɛle keŋ bɔɔ gyeŋ ya nɛ man?

29Ao tɛɛle, tɛɛle, tɛɛle,

nyii Degbeŋgyoo nombii,

30<<Nnɛ yaa Degbeŋgyoo ne yako.

<<Ŋmarase balee kei wose man nombia see ŋgba ŋon ɔ be dana bu ya nɛ

baale ŋon ɔ be gyae waa de ɔ kekyaabii pou man ya,

te ɔ duuluŋman ŋolo be gyae waa de ya,

be man ŋolo be gyae waa kyaa Dawide gyoorogbeli keŋ dɔɔ

yaa waa di gyoori Yuda bela ya.>>