Yeremiya 23

Tombii keŋ ka tenɛɛ

1<<Namensekɛɛlera baŋ bɛɛ wɔlɛɛ me namense te bɛɛ yasee wɔ ŋalese man nɛ baa laako!>> Degbeŋgyoo torola yako. 2Mena dɔɔ nnɛ yaa Degbeŋgyoo Iserae Wurubuarɛ ŋon ne yako fa namensekɛɛlera baŋ bɛɛ kɛɛ me balaŋ dɔɔ nɛ. <<Lee keŋ ɛ be yaasee me namense dikpii keŋ te ɛ be gegi wɔ, te ɛ te kɛɛ wɔ ya dɔɔ nɛ, maa wɔŋ ɛ deŋele lee dukum keŋ ɛ be yɛɛ nɛ dɔɔ.>> Degbeŋgyoo torola yako. 3Maŋ gbagba maa yilaa me namense dikpii keŋ bɔɔ kaa lee botɔɔ keŋ mɔɔ yaasee wɔ nɛ, na maa mo wɔ kɔŋ botɔɔ keŋ bee dii nɛ, baa lolee botɔɔ na baa wuku. 4<Maa fa wɔ namensekɛɛlera baŋ baa kɛɛ be dɔɔ, te bɔɔ gyae baa tekaa yee yaa gyakoloŋ ka gyoo wɔ bela yaa be man ŋolo ka yo ya,>> Degbeŋgyoo torola yako.

5Degbeŋgyoo kpa, <<Weeya ŋaale ne kɔŋ,

keŋ maa lese tombii keŋ tenɛɛ nɛ lee Dawide duuluŋ man,

gyoo ŋon waa di gyoori siakekara man

na waa yɛɛ keŋ doona kegbɛɛ te ka tenɛɛ tɛɛle keŋ dɔɔ.

6Ɔ debaŋ man te baa lɛɛ Yuda nyee.

te Iserae waa kyaa wɔe kefɛɛ man.

Yele keŋ baa baake e yɛna nyi,

Degbeŋgyoo da nyeelɛɛre ŋon ɔ tenɛɛ.

7Degbeŋgyoo kpa <<Mena dɔɔ weeya ŋan ne kɔŋ keŋ balaŋ be gyae baa tekaa yako nyiaa, <Degbeŋgyoo ŋon ɔ ba mo Iseraetena lee Igyipite nyiŋaa ɔ kyaa nɛ>ya. 8Mɔna baa yako bo nyiaa, <Degbeŋgyoo ŋon ɔ ba mo Iserae duuluŋmantena lee ado yenaŋ tɛɛle na tɛɛlese ŋan ɔ be yasee wɔ gyu nɛ man nyiŋaa ɔ kyaa na.> Kenaŋ na baa kyaa baŋ gbagba be tɛɛle man.>>

Akɛrɛɛ gbalara

9Lee gbalara baŋ wose man nɛ.

Ma wose te gbirisi maŋ,

me ŋɔɔ pou ne seree maŋ.

Ma te yɛɛ ŋgba soloŋ nyɔɔre nɛ,

ŋgba baale doŋte ŋon waen be tale e nɛ,

lee Degbeŋgyoo

na ɔ nombia fereŋkyeŋ dɔɔ.

10Yale wɔlɛɛra te wulu tɛɛle keŋ,

lee kefaala keŋ1 dɔɔ tɛɛle keŋ ta wolo

wonembia dedii depampaa keŋ man ta boto.

Gbalara baŋ silana dukum bo

te bɛɛ mo be doŋ yɛɛ keŋ be doona kegbɛɛ dɔɔ ya.

11<<Gbalara na saese bɛɛ yee Wurubuarɛ ya,

te mɔ ɔsom deni dinaa man koraŋ nɛ, mɛɛ naa ba akpanyanyaŋ keyɛɛ,>> Degbeŋgyoo torola yako.

12<<Keŋ dɔɔ ba detɛe gyae ke sarakee,

maa mo wɔ do detiŋtɛɛ man

na baa yala botɔɔ.

Maa yela nombiikum ke yala wɔ

kulutoo keŋ maa wɔŋ ba deŋele nɛ man,>> Degbeŋgyoo torola yako.

13<Me naa diyiŋ nombia

Samaria gbalara baŋ man.

Bɛɛ mo Baale yele gbala

te be yelaa me balaŋ Iserae yoo gbɛɛ.

14Yerusalɛm gbalara baŋ man nɛ,

me naa duwaare nombia.

Bɛɛ lee be baala na be wɛɛla wɔle te bee di akɛrɛɛ.

Bɛɛ do nombiakumɛɛ yɛɛra doŋ

na ŋolo be nyiŋ lee waa akpanyanyaŋ keyɛɛ man ya.

Be yɛɛ ŋgba Sodom nɛ me siaman,

Yerusalɛmtena yɛɛ ŋgba Gomora nɛ.>

15Keŋ dɔɔ nnɛ yaa Degbeŋgyoo Doŋ Pou Nyee ne yako lee gbalara baŋ wose man.

<Maa yela baa di weenɛɛ ŋaŋ nyiŋan

na baa nyɔɔ loŋ keŋ teekum doo ke man,

nawolo nyi Yerusalɛm gbalara baŋ

yelela te balaŋ bee yee Wurubuarɛ tɛɛle keŋ dɔɔ ya.>>

16Nnɛ yaa Degbeŋgyoo Doŋ Pou Nyee ŋon ne yako.

<<Ɛ naa tei keŋ gbalara baŋ ne gbale fa ŋon nɛ ya,

bɛɛ beo ŋon bo.

Abɔɔ ŋan bɛɛ naa yako nɛ lee baŋ gbagba ba nyeempɔ man,

ke ta lee Degbeŋgyoo nɔɔman ya.

17Be gyakaa bɛɛ yako baŋ bɔɔ bɛɛ maŋ nɛ nyiaa,

Degbeŋgyoo kpa nyaŋ ke nyiŋ wosefɛɛreŋ.>

Te bɛɛ yako baŋ pou be dana konɔɔyuŋ

nɛ nyiaa, <kolo kum be gyae ke kɔŋ ɛ dɔɔ ya.>

18Mɔna be man woŋti seŋala Degbeŋgyoo degyaŋee man

na waa naa yaa waa nyii ɔ nombia?

amɔte teila yaa nyiina ɔ nombia?

19Kɛɛ Degbeŋgyoo feliŋ dinaa keŋ

gyae ke gyɔ keŋkeŋ baŋ man,

koloŋoloŋ gyae ke fiili

kaa gyakaa akpanyanyaŋtena nyeeya dɔɔ.

20Degbeŋgyoo baŋ keŋ be gyae ka bese ke wɔle ya

kelii debaŋ keŋ waa taŋ keŋ ɔ ne gyae waa yɛɛ

keŋ gyakaa ɔ konɔɔ dɔɔ nɛ.

Weeya ŋaale gyae kekɔŋ

keŋ ɛ ke nyii ke man nideli.

21Me te kpila mena gbalara kɛwɔ ya,

mɔna be dana be nombia bee kili,

ma te kolosina wɔ ya,

mɔna bɛɛ gbale.

22Mɔna nyi beŋ kɔŋawɔ ma degyaŋee man na,

nafɔ baa gyɔ me nombia dekpeŋkpeŋ fa me balaŋ

na baa kyɛɛkee lee be gbɛɛneŋ kumɛɛ

na ba akaraŋkaraŋ man.

23Degbeŋgyoo kpa,

<<me yɛɛ Wurubuarɛ ŋon ma benaa kaageŋ,

te na Wurubuarɛ ŋon me kyaa lem yee?

24Degbeŋgyoo kpa

Ŋolo waa tale yo dayoe daale man

keŋ mɔ naa e yee?>>

<<Na maŋ wuluna adido na tɛɛle yee?>>

Degbeŋgyoo torola yako.

25<<Me te nyii keŋ gbalara baŋ bɛɛ beo mo ma yele gbala nɛ ne yako. Be kpa nyiaa, <Ma te doosi! Ma te doosi!> 26Kelii woromɔ yaa kei gyae ke doo akɛrɛɛ gbalara kɛɔ konɔɔse man, baŋ bɛɛ beo gbala lee baŋ gbagba ba nyeempɔse man nɛ? 27Bɛɛ gyueŋ nyi dosɛɛ ŋan bɛɛ yako fa dɔŋa gyae ke yela me balaŋ ke wolee ma yele, ŋgba mena keŋ be naanaɔ ba som Baale wolee ma yele nɛ. 28Yela gbalare ŋon ɔ be doosi nɛ ke tɔlɛɛ ɔ dosɛɛ, mɔna ŋon me nombia kyaa ɔ gyaŋ dɛɛ gyɔ ŋa dekpeŋkpeŋ anokoare man. Nawolo nyi woŋ doola wura na wamele nsana? Degbeŋgyoo torola yako 29Degbeŋgyoo kpa <<Me nombia be wɔɛ ŋgba boalaŋ te ke wɔɛ ŋgba hama keŋ kɛɛ yɛlɛɛ kpanaŋ bogobogo nɛ yee?>>

30Degbeŋgyoo kpa <<Mena dɔɔ mɛɛ seŋ tia gbalara baŋ bɛɛ ŋmɛɛle nombia lee be tebia gyaŋ na ba te bɛɛ yako ŋa ŋgba ŋa lee me gyaŋ nɛ. 31<<Ayi, mɛɛ seŋ tia gbalara baŋ bɛɛ mo be laakemse kara nombia yako nyi Degbeŋgyoo torola yako nɛ.> 32Degbeŋgyoo kpa <Kɛɛ mɛɛ seŋ tia gbalara baŋ bɛɛ mo akɛrɛɛ dosɛɛ gbala nɛ.> Bee dii akɛrɛɛ gbala na be ta mo me balaŋ yo gbɛɛ, mɔna me te kpila wɔ yaa maa lese wɔ ya. Bɔɔ dana tɔnɔɔ peperee nɛ fa balaŋ kɛwɔ ya. Degbeŋgyoo torola yako.

Akɛrɛɛ gbale

33<<Nyi balaŋ kɛwɔ yaa gbalare yaa sae de bɔɔse neŋ nyiaa, <Nombii woŋti leela Degbeŋgyoo gyaŋ? na, tiranɔɔ fa wɔ nyiaa <Nombii woŋti? Maa bɛɛ ŋon, Degbeŋgyoo torola yako. 34Nyi Akpaa gbalare, yaa sae, yaa ŋolo de yako nyi <Nombii kei lee Degbeŋgyoo gyaŋ>na, maa wɔŋ baŋ na ba dekpaŋalaŋmantena deŋele. 35Nnɛ te ɛ gyakaa ɛ ne yako fa ɛ dɔɔna na Iseraetena baale nyi <Woŋ yaa Degbeŋgyoo tiranɔɔ?> yaa <Sena te Degbeŋgyoo yakowɔ?> 36Mɔna ɛ naa tekaa yako <nombii keŋ ba lee Degbeŋgyoo gyaŋ> bela ya, nawolo nyi nombii kamasɛ yɛɛ baŋ gbagba be nombia ŋa. Nawolo nyi ɛ te tulii Wurubuarɛ, Degbeŋgyoo de Wurubuarɛ Doŋ Pou Nyee ŋon ɔ kyaa nɛ nombia. 37Nnɛ yaa ɛ gyakaa ɛ ne yako fa gbalara baŋ. <Sena yaa Degbeŋgyoo tiranɔɔ fa ŋon>? yaa <Sena te Degbeŋgyoo yako ŋon?> 38Doo nyi n ne yako nyi <Kei yɛna nombii keŋ ba lee Degbeŋgyoo gyaŋ,> nnɛ yaa Degbeŋgyoo ne yako. Ɛ ne yako nombia kɛŋa, <Nombii kei lee Degbeŋgyoo gyaŋ,> keŋ mɔɔ yako ŋon nyi ɛ naa yako nyiaa, <Kei yɛna nombii keŋ ba lee Degbeŋgyoo gyaŋ>ya. 39Keŋ dɔɔ kɛɛ, maa wolee ŋon na maa fuŋ ɛmɛɛ na donɔɔse ŋan mɔɔ mo fa ɛmɛɛ na ɛ naanaɔ nɛ lee me siaman leki. 40Maa mo desɛŋ na siakayeŋ keŋ taŋ ɔto ya te bɔɔ gyae baa wolee ke ya nɛ kɔŋ ɛ dɔɔ.>>