Yeremiya 24

Fiigi bia doŋase ala ŋan

1Babilɔn gyoo Nebukadenɛsa ke kyaŋ Yuda gyoo Yehoyakim 1 bu Yehoyakyin na Yuda kegyiise, na baŋ ba gyeŋ nyiŋmaa man tomse keyɛɛ na luura lee Yerusalɛm gyu Babilɔn ŋgba yoo gbeŋa nɛ, Degbeŋgyoo lese fiigi doŋatɔɔse ala ŋan doo Degbeŋgyoo ɔsom deni dinaa keŋ siaman nɛ wola maŋ. 2Fiigise kpaakpaa doo doŋa keŋ daale man, ŋgba fiigise ŋan be taŋgbɛɛ yɛɛ nɛ. Te fiigise awɔlɛɛsa ŋan be deina kedi ya nɛ doo doŋa alate keŋ man.

3Keŋte Degbeŋgyoo bɔɔse maŋ nyiaa, <<Yeremiya, woŋ yaa n ne naa?>>

Me tiranɔɔ nyi Fiigise. Kpaakpaa nyiŋaŋ dei nideli mɔna awɔlɛɛsa ŋan te wɔlɛɛ keŋ nyi ŋa be deina kedi ya.>>

4Keŋte Degbeŋgyoo nombii kɔŋawɔ me gyaŋ. 5<<Nnɛ yaa Degbeŋgyoo Iserae Wurubuarɛ ŋon ne yako, <Fiigise kpaakpaa nyiŋan yɛɛ ŋgba yoogbeŋa baŋ bɔɔ lee Yuda, baŋ mɔɔ gegi lee kɛbo gyu Babilɔn tɛɛle dɔɔ 2 nɛ. 6Me sia gyae ke doo be dɔɔ fa be deeli, te maa besena wɔ kɔŋ tɛɛle kei dɔɔ. Maa yela baa kyaa gbeli te mɔɔ wɔlɛɛ wɔ ya, maa yela baa baŋee lila te mɔɔ gyae maa kulu wɔ ya. 7Maa fa wɔ konɔɔ keŋ baa mo gyeŋ maŋ nyi maŋ yɛna Degbeŋgyoo. Baa yɛɛ me balaŋ na maa yɛɛ be Wurubuarɛ, nawolo nyi baa mo be konɔɔ pou bese kɔŋ me gyaŋ.

8Degbeŋgyoo kpa < < <Mɔna mena keŋ fiigise awɔlɛɛsa ŋan be dei na kedi ya doo nɛ, <Mena te maa yɛɛ Yuda gyoo Sedekiya na ɔ kegyiise, na Yerusalɛmtena baŋ be kyaa nyeedoŋ man keŋ be kyaa bo tɛɛle kei dɔɔ yaa be kyaa bo Igyipite nɛ. 9Maa yela baa bese kekɔla, na gyakoloŋ fa gyooridediise pou ŋan kyaa tɛɛle kei dɔɔ nɛ, na boŋɛɛse na kekulu na kefaala, na baa do wɔ ahiŋ yenaŋ kamasɛ keŋ maa yaasee wɔ gyu nɛ. 10Maa mo yoosila na tanam na kaweekum gyu be dɔɔ, kelii debaŋ keŋ baa munu lee tɛɛle keŋ mɔɔ mo fa baŋ na be naanaɔ nɛ dɔɔ.>> >