Yeremiya 25

Gbeŋiri man kedoo kulutooneŋ sɔŋotooro na kufu

1Nombia ŋan be kɔŋ Yeremiya gyaŋ lee Yudatena pou woseman, kulutoo anaarate keŋ Yuda gyoo Yosiya bu Yehoyakim ne di gyoori, keŋ ke yɛɛ kulutoo gyaŋgbate keŋ Babilɔn gyoo Nebukadenɛsa ne di gyoori nɛ. 2Mena dɔɔ gbalare Yeremiya yako Yudatena baŋ pou na baŋ be kyaa Yerusalɛm nɛ nyi. 3Kulutooneŋ sao atooro yaa ŋgba mɛɛ kolosi fa ŋon, lee Yuda gyoo Amon bu Yosiya gyoori kedi kulutooneŋ kufu atoorote keŋ man kaalii wee keŋ, Degbeŋgyoo nombia be kɔŋ me gyaŋ nɛ, te me kolosiwɔ fa ŋon agbaatee agbaatee mɔna ɛ te tei maŋ ya.

4Doo nyi Degbeŋgyoo kpila ɔ tewulɛɛ gbalara baŋ agbaatee agbaatee nɛ, ɛ te tei yaa ɛ ka see deŋela fae ya. 5Be yakowɔ nyiaa, <<Ɛ man walaŋ kamasɛ, waa kyɛɛkee lee ɛ gbɛɛneŋ kumɛɛ na waa ayɛɛsa kumɛɛ man, na ɛ ke nyiŋ kyaa tɛɛle keŋ Degbeŋgyoo ba mo fa ɛmɛɛ na ɛ naanaɔ kekpaakekpaa nɛ dɔɔ. 6Ɛ naa sila wurubuarɛse baale na ɛ ka som wɔ ya. Ɛ naa mo ŋan ɛ be yɛɛna ɛ nyiŋmaase do maŋ baŋ ya. Kenaŋ na mɔɔ gyae maa yɛɛ ŋon dukum ya.>>

7Degbeŋgyoo kpa<<Mɔna ɛ te tei maŋ ya, te ɛ moo ŋan ɛ ba mo ɛ nyiŋmaase yɛɛ nɛ do maŋ baŋ, ɛmɛɛ gbagba moona dukum lɔ ɛ wose dɔɔ.

8Keŋ dɔɔ Degbeŋgyoo Doŋ Pou Nyee ŋon kpa nyiaa, <<keŋ ɛ te tei me nombia ya dɔɔ, 9Degbeŋgyoo kpa, << Maa yilaa adoyenaŋ balaŋ na me somre Babilɔn gyoo Nebukadenɛsa, na baa seŋ tia tɛɛle kei na keman balaŋ na tɛɛlese ŋan be kilise ke nɛ. Maa wɔlɛɛ wɔ kerekere na maa yela baa boŋo wɔ, na maa mo wɔ fa tuubia na maa yɛɛ wɔ kewɔlɛɛ kekpaakekpaa. 10Maa tɔɔ kenyaŋee na gyoŋ yeesa, na alowɔle na alo wɔle baale woya na boe anenaŋan kewii na kanea keŋmaŋee gbɛɛ. 11Tɛɛle kei pou gyae ke wɔlɛɛ na ka bese woŋsila deeleki e. Tɛɛlese ŋenaŋ gyae ka doo Babilɔn gyoo tɛɛ kulutooneŋ sɔŋotooro na kufu.

12Degbeŋgyoo kpa <<Mɔna kulutooneŋ sɔŋotooro na kufu (70) keŋ ŋan de lii na maa wɔŋ Babilɔn gyoo na ɔ tɛɛle, na Babilɔntena1 deŋele lee be fɔɔ kedi dɔɔ, maa yela ka ke yɛlɛɛ korakora. 13Maa yela nombia ŋan pou mɔɔ yako tia tɛɛle kɛŋa, na ŋan pou bɔɔ ŋmarase do tɔne kei man te Yeremiya be yako tia tɛɛlese kɛŋa pou nɛ, ke kɔŋ be dɔɔ. 14Baŋ gbagba baa bese gbeŋa fa tɛɛlese burum na gyooneŋ dinaana. Maa tɔ wɔ kom ŋgba mena keŋ ba tomse, na be nyiŋmaa man tomse doo nɛ.>>

Wurubuarɛ baŋkum leenɔɔ

15Nnɛ yaa Degbeŋgyoo Iserae Wurubuarɛ ŋon ne yako. <<Lɛɛ leenɔɔ kei keŋ me baŋ waen be wulu ke nɛ lee me nyiŋmaa man na n ke yela tɛɛlese ŋan pou maa kpila neŋ be gyaŋ nɛ ke nyɔɔ ke. 16Nyi be nyɔɔ ke nɛ, baa kpaŋte na baa gyoo diteŋ lee yoosila keŋ maa mo kɔŋ be dɔɔ nɛ dɔɔ.>>

17Mena dɔɔ me lɛɛ leenɔɔ keŋ lee Degbeŋgyoo nyiŋmaa man te me yelaa tɛɛlese ŋan pou ɔ be kpila maŋ be gyaŋ nɛ nyɔɔ ke.

18Yerusalɛm na Yuda donɔɔse, na be gyooneŋ na be kyaarabia, na ke wɔlɛɛ wɔ na baa boŋo wɔ na baa kulu wɔ na baa bese kefaala2. ŋgba mena keŋ doo gyɛŋ kei nɛ.

19Igyipite gyoo Faaro na ɔ tewulɛɛ, na ɔ kyaarabia, na ɔ balaŋ pou, 20na ŋɔɔla baŋ pou be kyaa botɔɔ, Use gyooneŋ pou, na Filisitena gyooneŋ pou (Asekelon, na Gasa, na Ɛkerɔn na balaŋ baŋ bɔɔ kaa Asedode nɛ), 21Ɛdom, na Moabe, na Amon, 22Tiro na Sidon gyooneŋ na ɛpo nɔɔman gyooneŋ. 23Dedane na Tɛma na Buse na baŋ pou be kyaa lemlem nɛ. 24Arabiya gyooneŋ pou na tɛɛle ŋɔɔla baŋ be kyaa depampaa keŋ man nɛ gyooneŋ pou. 25Simeri, na Elam na Media gyooneŋ pou, 26na ado yenaŋ gyooneŋ baŋ pou be kyaa benaa na lem nɛ dokoloŋ dokoloŋ, na gyooridediise ŋan pou kyaa tɛɛle kei dɔɔ nɛ. Te baŋ pou wɔle na Sɛsake gyoo mɔ waa nyɔɔ ke.

27<<Na n ke yako wɔ nyiaa, <Nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako. Ɛ nyɔɔ, na ɛ ke dɛɛse, na ɛ ke tɔe, na ɛ ke yala keŋ ɛ ba koro bela ya, lee yoosila keŋ maa mo kɔŋ ɛ dɔɔ nɛ dɔɔ.> 28Mɔna nyi akpaa be bɛɛ nyi bɔɔ lɛɛ leenɔɔ keŋ lee n nyiŋmaa man na baa nyɔɔ ya na, yako wɔ nyiaa, <Nnɛ yaa Degbeŋgyoo Doŋ Pou Nyee ne yako. Kaboena nyi yaa nyɔɔ ke! 29Kɛɛ me taŋ mɛɛ gyae maa yela nombiikum kaa yala donɔɔ dinaa keŋ ma yele gyakaa ke dɔɔ nɛ dɔɔ, te ɛ gyeŋ nyi mɔɔ gyae maa wɔŋ ɛ deŋele yee? De yɛɛ senaa maa wɔŋ n deŋele, nawolo nyi mɛɛ baake yoosila ke tisi kɔŋ balaŋ baŋ pou be kyaa tɛɛle keŋ dɔɔ nɛ dɔɔ, Degbeŋgyoo Doŋ Pou Nyee torola yako

30<<Nɛnɛɛ gbala nombia kɛŋa see tia wɔ nyiaa.

<< <Degbeŋgyoo waa muusu lee adido,

waa fae lee ɔ dekyae fereŋkyeŋ keŋ man

na waa musu keŋkeŋ tia ɔ tɛɛle.

Waa fae yeesa ŋgba baŋ bɛɛ ŋmaase gerepose nɛ,

waa fae yeesa tia baŋ be kyaa tɛɛle dɔɔ nɛ.

31Yeesa ŋan agiŋgiŋ gyae kelii tɛɛle ɔto,

nawolo nyi Degbeŋgyoo dana nombia waa tia tɛɛlese,

waa di denibalaŋ pou nombia

na waa mo yoosila koe akpanyanyaŋtena,> >> Degbeŋgyoo torola yako.

32Nnɛ yaa Degbeŋgyoo Doŋ Pou Nyee ne yako.

<<Kɛɛ nombiikum ne yasee

lee tɛɛle daale dɔɔ gyu tɛɛle daale dɔɔ,

feliŋ dinaa daale na koro

lee tɛɛle keŋ ɔto.>>

33Debaŋ kenaŋ nɛ baŋ Degbeŋgyoo ba koe lɔ nɛ baa doo yenaŋ kamasɛ, lee tɛɛle ɔto kelii tɛɛle ɔto. Bɔɔ gyae baa wii waraŋsa yaa baa yilaa wɔ yaa baa wuu wɔ ya, mɔna baa yɛɛ ŋgba wonembia pena doola tɛɛle dɔɔ nɛ.

34Ɛmɛɛ namensekɛɛlera, ɛ wii na ɛ ke fae yeesa.

Ɛmɛɛ siamantena, ɛ biliŋi akuŋkuŋ man,

nawolo nyi debaŋ keŋ baa kɛrɛɛ ɛ nyeeya nɛ te lii,

ɛ ke yala ŋgba namense baala kpaakpaa nyibaŋ nɛ3

35Namensekɛɛlera baŋ be gyae baa nyiŋ botɔɔ keŋ baa yeu gyu ya,

namense baŋ siamantena be gyae ba nyiŋ botɔɔ keŋ baa gyu kagyoo ya.

36Ɛ nyii namensekɛɛlera baŋ kewii

namense baŋ siamantena baŋ nɔɔ kelɔ,

nawolo nyi Degbeŋgyoo ne wɔlɛɛ be deedii.

37ŋalese wɔlɛɛ ŋan ŋɛɛ fa wosefɛɛreŋ nɛ ta wolo

lee Degbeŋgyoo baŋ beiŋ keŋ dɔɔ.

38Waa tina ɔ dedoi yela ŋgba dinaate nɛ,

te be tɛɛlese gyae ke doo yakaa

lee ŋon ɔ na ŋere wɔ do nɛ yoosila dɔɔ

na Degbeŋgyoo baŋ beiŋ keŋ dɔɔ.