Yeremiya 26

Be ka mo yeŋ ŋmaase Yeremiya

1Yuda gyoo Yosiya bu Yehoyakim ka betaa ɔ ne di gyoori pɛ te Degbeŋgyoo yako maŋ nyiaa. 2<<Nnɛ yaa Degbeŋgyoo ne yako. Seŋ Degbeŋgyoo ɔsom deni dinaa dekpaŋalaŋ keŋ man na n ke kolosi fa Yudatena baŋ pou bɔɔ lee donɔɔse kpookpoo man kɔŋ be kaa som Degbeŋgyoo ɔsom deni dinaa keŋ man nɛ. Yako wɔ kpene kamasɛ keŋ mɔɔ yako neŋ nyi nyaa yako wɔ nɛ, naa lese nombii lee ke man ya. 3Mberem baa tei na baa kyɛɛkee lee be gbɛɛneŋ kumɛɛ man. Kenaŋ na maa yela te mɔ gyae maa yela nombiikum keŋ mɔɔ gyueŋ lee be nombiakumɛɛ dɔɔ nɛ ke kɔŋ be dɔɔ ya. 4Yako wɔ nyi, <Nnɛ yaa Degbeŋgyoo ne yako. Nyi ɛ te tei maŋ te ɛ te di maŋ mmaraa keŋ mɔɔ mo fa ŋon dɔɔ nɛ ya, 5te akpaa ɛ te tei me tewulɛɛ gbalara baŋ mɔɔ kpila agbaatee agbaatee nɛ nombia ya na (doo nyi ɛ te tei ya), 6kenaŋ na maa yɛɛ dekpaŋalaŋ kei ŋgba Silo, na donɔɔ dinaa kei ke ka bese kefaala.> >>

7Saese, na gbalara na balaŋ baŋ pou nyii Yeremiya ke kolosi nombia ŋan Degbeŋgyoo dekpaŋalaŋ keŋ man. 8Mɔna Yeremiya ka betaa yako nombia ŋan Degbeŋgyoo be yako e nyi waa yako balaŋ baŋ pou taŋ nɛ, saese na gbalara na balaŋ baŋ pou kaa tɔɔ e do te be yako e nyiaa, <<Kaboena nyi nyaa yeŋ. 9Woŋ dɔɔ te n ne gbale lee Degbeŋgyoo yele man nyi dekpaŋalaŋ kei gyae ke yɛɛ ŋgba Silo nɛ, na donɔɔ dinaa keŋ ke yɛlɛɛ? Te ŋolo be gyae waa kyaa ke man ya? Te balaŋ baŋ pou kaa wuuwɔ Yeremiya dɔɔ Degbeŋgyoo dekpaŋalaŋ keŋ man.

10Yuda kyaarabia kenyii nombia kɛŋa nɛ, ba leewɔ gyooro dekpaŋalaŋ keŋ man gyu Degbeŋgyoo dekpaŋalaŋ man te be gyuuwɔ ke kyaa ba akyaese man Degbeŋgyoo Dekpaŋalaŋ Denaanɔɔ Wɔle keŋ man. 11Keŋte saese na gbalara baŋ yako kyaarabia baŋ na balaŋ baŋ pou nyiaa, <<Kaboena nyi balee kei waa yeŋ, nawolo nyi ɔ te gbale tia donɔɔ dinaa kei. Ɛmɛɛ gbagba nyii ke na ɛ deŋele!>>

12Botɔɔ te Yeremiya yako kyaarabia na balaŋ baŋ pou nyiaa, <<Nombia ŋan pou ɛ be nyii kei nɛ, Degbeŋgyoo kpilana maŋ nyi maa gbala tia dekpaŋalaŋ na donɔɔ dinaa kei. 13Nɛnɛɛ ɛ desina ɛ gbɛɛneŋ na yaa ayɛɛsa na ɛ ka mo obuo fa Degbeŋgyoo ɛ Wurubuarɛ. Kenaŋ na Degbeŋgyoo waa kyɛɛkee wa nyeempɔ na ɔ ba mo nombiikum keŋ ɔ be yakosee nɛ kɔŋ ɛ dɔɔ bela ya. 14Maŋ dɔɔ, me doo ɛ nyiŋmaa man, Ɛ yɛɛ maŋ kpene keŋ ɛ na gyueŋ nyi dei te ke doona kegbɛɛ nɛ. 15Ɛ wulaa gyeŋ nyi, ɛ ko maŋ na, ɛ ta mo fatabo keŋ ka te yɛɛ dukum ya nɛ fɔɔkedi kɔŋ ɛ wose, na donɔɔ dinaa kei, na balaŋ baŋ be kyaa ke man nɛ dɔɔ, te anokoare keŋ yɛna nyiaa, Degbeŋgyoo kpila maŋ ɛ gyaŋ nyi me kaa yako nombia kɛŋa pou na ɛ ke nyii.>>

16Botɔɔ te kyaarabia na balaŋ baŋ pou yakowɔ fa saese na gbalara baŋ nyiaa, <<Degbeŋgyoo de Wurubuarɛ yele man yaa balee kei kolosiwɔ fa daa, keŋ dɔɔ be naa ko e ya.>>

17Tɛɛle keŋ dɔɔ kegyiise baale leewɔ kɔŋ siaman te be yakowɔ fa balaŋ baŋ pou bɔɔ gyaŋee nɛ nyiaa, 18Morasete baale Mika gbalawɔ yako debaŋ keŋ Yuda gyoo Hesekiya ne di gyoori. Ɔ yako Yudatena baŋ pou nyiaa, <<Nnɛ yaa Degbeŋgyoo Doŋ Pou Nyee ŋon ne yako.

Baa pupui Siyɔn ŋgba wɔɔ nɛ,

Yerusalɛm gyae ka bese boya ŋan bɔɔ yilaa nɛ,

ɔsom deni dinaa bulabii keŋ gyae ke yɛɛ ŋgba wuubia ŋan doo laa man nɛ. 19Yuda gyoo Hesekiya yaa ŋolo kyaa Yuda keŋ ɔ ba ko e?Hesekiya te yee Degbeŋgyoo te ɔ sola e nyi waa boele e yee? Te Degbeŋgyoo te wɔŋ ɔ wose lee wɔle, keŋ ɔ te yele nombiikum ke yala wɔ ŋgba mena keŋ ɔ be yako ne yee? Dɛɛ yɛɛ baa na dɛɛ mo nombiikum kɔŋ da wose dɔɔ!>>

20(Nɛnɛɛ Semaya bu Uriya ŋon ɔ ba lee Kiriyate Yearim nɛ mɔ gbalawɔ Degbeŋgyoo yele. Ŋon mɔ gbala nombia ŋan Yeremiya be gbale tia donɔɔ dinaa kei na tɛɛle kei nɛ. 21Debaŋ keŋ gyoo Yehoyakim na ɔ yoonɔɔtena na ɔ kyaarabia pou kenyii ɔ nombia ŋan nɛ, gyoo ŋon yɛɛwɔ nyi waa ko e. Mɔna Uriya kenyii na te gyakoloŋ gyoo e te ɔ yeuwɔ gyu Igyipite. 22Keŋte gyoo Yehoyakim kpila Akebore bu Ɛlenatan na baala baale gyu Igyipite. 23Be gyuuwɔ ka mo Uriya lee Igyipite kɔŋ te ba moo e gyina gyoo Yehoyakim te ɔ yelaa ba moo yoosila ko e te be fuŋa e kelɔ botɔɔ keŋ bee wuu balaŋ nɛ.)

24Mɔna Safane bu Ahikam kyɔɔ Yeremiya keŋ ŋon dɔɔ ɔ ta mo e fa balaŋ baŋ nyi baa ko e ya.