Yeremiya 27

Yuda waa som Nebukadenɛsa

1Yosiya bu Sedekiya ke di gyoori Yuda kewalaŋ nɛ, Degbeŋgyoo yako nombia kɛŋa fa Yeremiya, 2Degbeŋgyoo yako maŋ nyiaa, <Mo ŋmeleŋ bake daase yɛɛ kasolɔ na n ka mo wuluŋu n wɔŋe man. 3Do gbɛɛtɛɛra baŋ bɔɔ kɔŋ Yuda gyoo Sedekiya gyaŋ Yerusalɛm nɛ tiila Ɛdom na Moabe na Amon na Tiro na Sidon gyooneŋ gyaŋ. 4Do wɔ tiila be gbeŋgyoona gyaŋ nyiaa, <<Nnɛ yaa Degbeŋgyoo Doŋ Pou Nyee Iserae Wurubuarɛ ŋon ne yako. <<Ɛ yako ɛ gbeŋgyoona nyiaa, 5Maŋ moona me doŋ dinaa na bam keŋ mɔɔ tenee yɛɛ tɛɛle na ke denibalaŋ na ke wonembia baŋ be kyaa ke dɔɔ, te mɛɛ mo ke fa walaŋ kamasɛ ŋon mɛɛ gyae. 6Nɛnɛɛ maa mo ɛ donɔɔse pou do m somere Babilɔn gyoo Nebukadenɛsa nyiŋmaa man. Maa yela ŋale man wonembia gba ka som e. 7Tɛɛlese pou baa som ŋon na ɔ bia na ɔ naanasebia kelii keŋ ɔ debaŋ ke lii, kenaŋ wɔle na waa kaa som tɛɛlese burum na gyooneŋ dinaana.

8< << <Mɔ nyi akpaa tɛɛle daale yaa gyooridedii ta som Babilɔn gyoo Nebukadenɛsa yaa waa yɔkɔse ɔ wose fa e ya nɛ, maa mo yoosila na tanam na kayeyɛɛ wɔŋ tɛɛle kenaŋ deŋele kelii debaŋ keŋ maa ta ɔ nyiŋmaa dɔɔ wɔlɛɛ e. Degbeŋgyoo torola yako. 9Mena dɔɔ ɛ naa tei ɛ gbalara, na baŋ bɛɛ lɔ boe na baŋ bɛɛ lese dosɛɛ man na ɛ ŋmeeseŋtena na ɛ magyigitena baŋ bɛɛ yako ŋon keŋ gyae kekɔŋ wee daale te bɛɛ yako ŋon nyi, <<Ɛnaa som Babilɔn gyoo nɛ ya.>> 10Bɛɛ yako ŋon akɛrɛɛ nombia ŋan gyae ka lese ŋon lee ɛ tɛɛle man gyu lem nɛ bo. Maa gegi ŋon na ɛ ke munu. 11Mɔna nyi tɛɛle daale de yɔkɔse ka wose fa Babilɔn gyoo te ɔ som e nɛ, maa yela tɛɛle kenaŋ ke kyaa ŋon gbagba tɛɛle man na waa fara ke na waa kyaa botɔɔ. Degbeŋgyoo torola yako.> >> >

12Me yako mena nombia ŋenaŋ ke fa Yuda gyoo Sedekiya. Me yakowɔ nyiaa, <Ɛ yɔkɔse ɛ wose fa Babilɔn gyoo na ɛ ka som ŋon na ɔ balaŋ na ɛ ke nyiŋ nyeedoŋ. 13Woŋ dɔɔ te kaboena nyi ɛmɛɛ na n balaŋ yaa yeŋ yoosila na tanam na kaweekum man, ŋgba mena keŋ Degbeŋgyoo be faree tɛɛle ŋon ɔ bɛɛ nyi ɔ ba som Babilɔn gyoo ya nɛ? 14Ɛ naa nyii gbalara baŋ nombia ŋan bɛɛ yako ŋon nyi, <Ɛ naa som Babilɔn gyoo nɛ ya,> nawolo nyi akɛrɛɛ nombia yaa bɛɛ gbale yako ŋon. 15Degbeŋgyoo kpa, <Me te kpila wɔ ya. Bɛɛ mo ma yele bo gbala akɛrɛɛ nombia yako ŋon. Mena dɔɔ maa gegi ŋon, na ɛmɛɛ na gbalara baŋ bɛɛ gbale fa ŋon nɛ ke munu.>> >

16Keŋte me yako saese na balaŋ kɛwɔ pou nyiaa, <<Nnɛ yaa Degbeŋgyoo ne yako, ɛ naa tei gbalara baŋ bɛɛ yako nyi, <Be gyae ke kyare ya baa mo Degbeŋgyoo ɔsom deni dinaa man abɔɔ lee Babilɔn kɔŋ nɛ ya.>> Akɛrɛɛ gbale yaa bɛɛ yako ŋon. 17Ɛ naa tei wɔ ya. Ɛ som Babilɔn gyoo na ɛ ke kyaa nyeedoŋ man. Woŋ dɔɔ te donɔɔ dinaa kei dɛɛ yɛlɛɛ? 18Nyi be yɛɛ gbalarawɔ te Degbeŋgyoo nombia doo be man nɛ, kenaŋ na baa sola Degbeŋgyoo Doŋ Pou Nyee nyi be naa mo abɔɔ ŋan be kaa Degbeŋgyoo ɔsom deni dinaa man na Yuda gyoo gyooro dekpaŋalaŋ man na Yerusalɛm nɛ gyu Babilɔn ya. 19Nawolo nyi nnɛ yaa Degbeŋgyoo Doŋ Pou Nyee ŋon ne yako lee piilase na kɔbere sabɛɛ dinaa1, na nawɔɔ ŋan bee tuu na abɔɔ akaŋ ŋan be kaa donɔɔ dinaa kei man, 20ŋan Babilɔn gyoo Nebukadenɛsa ta moo ya debaŋ keŋ ɔ ba mo Yehoyakim bu Yuda gyoo Yehoyakyin na Yuda na Yerusalɛm gyoorobia baŋ pou lee Yerusalɛm gyu yoogbeŋiri man Babilɔn nɛ nyiaa, 21ayi, nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako lee abɔɔ ŋan be kaa Degbeŋgyoo ɔsom deni dinaa keŋ man na Yuda gyooro dekpaŋalaŋ man na Yerusalɛm nɛ. 22<<Baa mo ŋa gyu Babilɔn na ŋa ke doo botɔɔ kelii wee keŋ maa kaa mo ŋa. Na maa besena ŋa kaa see kɛbo.> >> Degbeŋgyoo torola yako.