Yeremiya 28

Dekara gbalare Hananiya

1Mena kulutoo kenaŋ gyaalaŋna banoŋte lee kulutooneŋ anaarate ŋon ɔ yɛɛ Yuda gyoo Sedekiya gyoori kedi kewalaŋ nɛ, Asure bu gbalare Hananiya ŋon ɔ ba lee Gibeon nɛ, yako maŋ Degbeŋgyoo ɔsom deni dinaa keŋ man, saese na balaŋ baŋ pou siaman nyiaa, 2<<Nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako, <Maa lese Babilɔn gyoo kasolɔse ŋan. 3Kɛbo kulutooneŋ ala nɛ, maa besena Degbeŋgyoo ɔsom deni dinaa man abɔɔ ŋan Babilɔn gyoo Nebukadenɛsa ba lese lee kɛbo gyu Babilɔn nɛ kɔŋ kɛbo. 4Maa bese mo Yehoyakim bu Yuda gyoo Yehoyakyin na Yudatena baŋ pou bɔɔ kyaŋ wɔ yoogbeŋa gyu Babilɔn nɛ mɔ kɔŋ kɛbo, <Ampaŋ maa lese Babilɔn gyoo kasolɔ keŋ.> >> Degbeŋgyoo torola yako.

5Keŋte gbalare Yeremiya tiranɔɔ fa gbalare Hananiya, saese na balaŋ baŋ pou ba seŋɛɛ Degbeŋgyoo dɛɛ nɛ. 6Ɔ yakowɔ nyiaa, <<Dɛɛkɔŋ mena, Degbeŋgyoo waa yɛɛ ke mena, Degbeŋgyoo waa yela gbale keŋ n be yako nyi, waa mo Degbeŋgyoo ɔsom deni dinaa keŋ man abɔɔ na yoogbeŋa baŋ pou lee Babilɔn kɔŋ kɛbo nɛ ke kɔŋ mena. 7Mɔna, ɛ see deŋele na ɛ ke tei keŋ me dana maa yako ɛmɛɛ na balaŋ baŋ pou nɛ. 8Gyaŋgba gbalara baŋ bɔɔ kɔŋ pɛ daa na neŋ nɛ, gbalawɔ yako yoo nombia, na nombiikum na kaweekum nombia tia tɛɛlese burum na gyooridediise dinaana. 9Mɔna gbalare ŋon ɔ gbale yako wosefɛɛreŋ nombia, te keŋ ɔ be yako de kɔŋ mena na, baa naa e nyi ampaŋ ŋon te Degbeŋgyoo kpilawɔ.>>

10Keŋte gbalare Hananiya lese kasolɔ keŋ doo gbalare Yeremiya wɔŋe man te ɔ tekerii ke, 11te ɔ yakowɔ balaŋ baŋ pou siaman nyiaa, <Nnɛ yaa Degbeŋgyoo ne yako, <Mena kenaŋ te kɛbo kulutooneŋ ala nɛ, maa tekerii Babilɔn gyoo Nebukadenɛsa kasolɔ keŋ lee tɛɛlese pou wɔŋe man.>> > Keŋte gbalare Yeremiya laŋawɔ.

12Gbalare Hananiya ke tekeri kasolɔ keŋ lee gbalare Yeremiya wɔŋe man wɔle nɛ, te Degbeŋgyoo nombia yako gbalare Yeremiya nyiaa, 13<Gyu ke yako Hananiya nyiaa, <Nnɛ yaa Degbeŋgyoo ne yako. N te tekerii daŋ kasolɔ, mɔna maa mo nyeele bibiini kasolɔ see ke nawɔɔ man. 14Nnɛ yaa Degbeŋgyoo Degbeŋgyoo Doŋ Pou Nyee, Iserae Wurubuarɛ, ŋon ne yako. Maa mo nyeele bibiini kasolɔ do tɛɛlese kɛŋa pou wɔŋe man na maa yela baa som Babilɔn gyoo Nebukadenɛsa, te baa som e mɔ. Maa yela waa di ŋaleman wonembia koraŋ dɔɔ.>> >

15Keŋte gbalare Yeremiya yako gbalare Hananiya nyiaa, <<Hananiya, tei, Degbeŋgyoo te kpila neŋ ya, mɔna n te tale yela tɛɛle kei te lɛɛ akɛrɛɛ di. 16Mena dɔɔ nnɛ yaa Degbeŋgyoo ne yako, <Maa lese neŋ lee tɛɛle kei dɔɔ. Nyaŋ ka yeŋ mena kulutoo kei man, nawolo nyi n ta wola deŋeledoŋ nombia tia Degbeŋgyoo.> >>

17Kulutoo kenaŋ man gyaalaŋna nyetoorote ŋon man nɛ, te gbalare Hananiya yeŋawɔ.