Yeremiya 29

Tɔne keŋ bɔɔ ŋmarase gyina yoogbeŋa baŋ

1Kei yɛna tɔne keŋ gbalare Yeremiya be ŋmarase lee Yerusalɛm gyina yoogbeŋa baŋ man kegyiise baŋ bɔɔ kaa, na saese na gbalara na balaŋ akaŋ baŋ pou Nebukadenɛsa be yoo kyaŋ wɔ lee Yerusalɛm gyu Babilɔn nɛ. 2(Ke yɛɛ debaŋ keŋ bɔɔ yoo kyaŋ gyoo Yehoyakyin na alagyoo na dekpaŋalaŋ kegyiise, na Yuda na Yerusalɛm siamantena na baŋ ba gyeŋ nyiŋmaa man tomse keyɛɛ na luura lee Yerusalɛm laŋ nɛ.) 3Ɔ moo tɔne keŋ do Safane bu Ɛlasa na Hilekiya bu Gemariya baŋ Yuda gyoo Sedekiya be kpili gyu gyoo Nebukadenɛsa gyaŋ Babilɔn nɛ nyiŋmaa man. Ke man nombia ne yako nyiaa,

4Nnɛ yaa Degbeŋgyoo baŋ Doŋ Pou Nyee, Iserae Wurubuarɛ ŋon ne yako fa baŋ pou mɔɔ kyaŋ wɔ yoogbeŋa lee Yerusalɛm gyu Babilɔn nɛ. 5<<Ɛ baŋee denɛɛ na ɛ ke kyaakee ŋe man, ɛ fara wɔɔsebia na ɛ kedi ŋe man weenɛɛ. 6Ɛ yɛlɛɛ na ɛ ka lolee bia ala na baala, ɛ yɛlɛɛ ala fa ɛ bia tewulɛɛ na ɛ ka mo ɛ bia alebia mɔ fa yale na baŋ mɔ ka lolee bia ala na bia baala. Ɛ wuku botɔɔ, ɛ naa kɔɔkee ya. 7Ɛ gyae wosefɛɛreŋ fa donɔɔ dinaa keŋ mɔɔ mo ŋon gyu ŋgba yoogbeŋa nɛ. Ɛ fane fa Degbeŋgyoo fa ke, nawolo nyi ke de nyiŋ ka wose na ɛmɛɛ mɔ ɛ ke nyiŋ ɛ wose.> 8Nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako. <<Ɛ naa yele gbalara na baŋ bɛɛ lɔ boe ɛ man nɛ ka beo ŋon ya. Ɛ naa tei be dosɛɛ ŋan bee doosi nɛ ya.> 9Bɛɛ gbala akɛrɛɛ nombia bo yako ŋon ma yele man. Me te kpila wɔ ya.>> Degbeŋgyoo torola yako.

10Nnɛ yaa Degbeŋgyoo ne yako. <<Akpaa ɛ som Babilɔn kulutooneŋ sɔŋotooro na kufu (70) taŋ nɛ, maa kɔŋ ɛ gyaŋ na me kaa di ma keyakosee kpaakpaa keŋ mɔɔ yako nyi maa besena ŋon kɔŋ kɛbo nɛ dɔɔ.> 11Degbeŋgyoo kpa, <Nawolo ma gyeŋ nyeempɔ keŋ mɔɔ moo lee ɛ wose man, nyeempɔ keŋ gyae ke yela ɛ ke de fa ŋon, na Nyeempɔkum ya. Nyeempɔ keŋ gyae ke yela ɛ ke nyiŋ loo kegyakaa na wee daale. 12Kenaŋ na ɛ ke baake maŋ, na ɛ ke kɔŋ kaa fane fa maŋ na maa tei ŋon. 13Ɛ ke kɛo maŋ te ɛ kena maŋ, nawolo ɛ moo ɛ konɔɔ pou kɛo maŋ. 14Degbeŋgyoo kpa, <<Ɛ kena maŋ na maa besena ŋon lee yoo gbeŋiri man kɔŋ.> Degbeŋgyoo kpa, <<Maa yilaa ŋon lee tɛɛlese pou na yenaase ŋan mɔɔ yaasee ŋon gyu nɛ, na maa besena ŋon lee botɔɔ keŋ mɔɔ mo ŋon gyu yoo gbeŋiri man nɛ.>>

15Ɛ ke yako nyi, <Degbeŋgyoo ta lese gbalara fa daa Babilɔn,> 16Mɔna nnɛ yaa Degbeŋgyoo ne yako lee ŋon ɔ be kyaa Dawide gyoorogbeli dɔɔ, na balaŋ baŋ pou bɔɔ kaa donɔɔ dinaa kei man na ɛ tebia baŋ be te kpuuna ŋon gyu yoo gbeŋiri man ya nɛ wose man, 17nnɛ yaa Degbeŋgyoo Doŋ Pou Nyee ŋon ne yako, <Maa mo yoosila na tanam na kayeyɛɛ kɔŋ be dɔɔ, na maa yela baa yɛɛ ŋgba fiigibia awɔlɛɛsa ŋan be deina kedi ya nɛ. 18Kɛɛ maa mo yoosila, na tanam, na kaweekum gegi wɔ na ke yela gyakoloŋ ka gyoo tɛɛlese dɔɔ gyooridediise pou, na ba wose ke yɛɛ gyakoloŋ na boŋɛɛse na baa kulu wɔ tɛɛlese ŋan pou mɔɔ gegi wɔ gyu nɛ man. 19Degbeŋgyoo kpa, <<Nawolo ba te tei me nombia ya, nombia ŋan mɔɔ tɛɛ me tewulɛɛ gbalara baŋ dɔɔ mo fa wɔ agbaatee agbaatee nɛ. <Te ɛmɛɛ yoogbeŋa mɔ te tei ya.> Degbeŋgyoo torola yako.

20Mena dɔɔ ɛmɛɛ yoogbeŋa baŋ pou mɔɔ gegi ŋon lee Yerusalɛm gyu Babilɔn nɛ ɛ nyii Degbeŋgyoo nombia. 21Nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako lee Kolaiya bu Ahabe na Maaseya bu Sedekiya baŋ bɛɛ gbala akɛrɛɛ nombia ma yele man fa ŋon nɛ wose man. <<Maa mo wɔ do Babilɔn gyoo Nebukadenɛsa nyiŋmaa man na waa koe wɔ ɛ siaman. 22Lee baŋ dɔɔ Yudatena baŋ pou yoo be gegi wɔ gyu Babilɔn nɛ, baa mo kefaala kei falaa nyiaa, <<Degbeŋgyoo waa yɛɛ neŋ ŋgba mena keŋ Sedekiya na Ahabe, baŋ Babilɔn gyoo ba too boalaŋ man nɛ.> 23<Nawolo nyi ba te yɛɛ kolo anekɔlaŋ dinaa Iserae, ba te gyae be tebia wɛɛla, te baa moo ma yele yako akɛrɛɛ nombia, ŋan ma te yako wɔ ya. Ma gyeŋ ke te maŋ yɛna ka adansɛɛ,>>Degbeŋgyoo torola yako,

Nombia ŋan be gyu Semaya gyaŋ

24Yako Semaya ŋon ɔ ba lee Nɛhɛlam nyi, 25<<Nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako. N ŋmarase tɔna n yele man gyu ke fa balaŋ baŋ pou be kyaa Yerusalɛm na Maaseya bu sae Sefaniya na saese akaŋ baŋ pou. N yakowɔ fa Sefaniya nyi, 26<Degbeŋgyoo ta see neŋ sae nyi nyaa kyaa Yehoyada nawɔɔ man Degbeŋgyoo ɔsom deni dinaa keŋ man, nyi nyaa gyɔ deteŋti ŋon waa yɛɛ ɔ wose ŋgba gbalare nɛ ɔpaŋ na n ka mo nyeele agbaraagbaraa do e wɔŋe man. 27Weera te n be yɛɛ Yeremiya ŋon ɔ ba lee Anatote, ŋon ɔ ne yɛɛ ɔ wose ŋgba gbalare nɛ mena ya? 28Ɔ ta mo nombia kɛŋa yelee daa Babilɔn nyi, gyae ke kyare nideli, mena dɔɔ dɛɛ baŋee denɛɛ na dɛɛ kyaakee ŋe man, dɛɛ fara wɔɔsebia na dee di ŋe weenɛɛ.> >>

29Sae Sefaniya kala tɔne keŋ fa gbalare Yeremiya. 30Keŋte Degbeŋgyoo yako Yeremiya nyi, 31<<Mo nombia kɛŋa gyina baŋ yoo be gegi wɔ nɛ pou nyi, <Nnɛ yaa Degbeŋgyoo ne yako lee Semaya ŋon ɔ ba lee Nɛhɛlam nɛ, nawolo nyi Semaya te gbale yako fa ŋon keŋ me te kpila e ya, te ɔ beo ŋon te ɛ lɛɛ akɛrɛɛ ŋa do, 32nnɛ yaa Degbeŋgyoo ne yako, De yɛɛ senaa maa wɔŋ Semaya ŋon ɔ ba lee Nɛhɛlam na ɔ duuluŋmantena deŋele. Ɔ woŋ man walaŋ be gyae waa ka balaŋ kɛwɔ man, yaa waa naa abɔɔ kpaakpaa ŋan maa yɛɛ fa me balaŋ nɛ ya, nawolo nyi ɔ ta wola deŋeledoŋ nombia tia maŋ.>> > Degbeŋgyoo torola yako.