Yeremiya 30

Iserae kabese seŋ

1Nombii keŋ Degbeŋgyoo be yako Yeremiya yɛna nyi, 2<Nnɛ yaa Degbeŋgyoo Iserae Wurubuarɛ ŋon ne yako, <<Ŋmarase nombia ŋan pou mɔɔ yako neŋ nɛ do tɔne man,> 3Degbeŋgyoo kpa <Weeya ŋaale ne kɔŋ keŋ maa mo me balaŋ Iseraetena na Yudatena lee gbeŋiri man kɔŋ, na maa mo wɔ see tɛɛle keŋ mɔɔ mo fa be naanaɔ nyi baa mo bese be wui nɛ dɔɔ.>> Degbeŋgyoo yakola.>

4Nombia ŋan Degbeŋgyoo be kolosi lee Iserae na Yuda wose man yaa, 5<Nnɛ yaa Degbeŋgyoo ne yako,

<<De nyii keyee yeesa,

gyakoloŋ, na wosefɛɛreŋ ya.

6Ɛ bɔɔse na ɛ ke naa,

Baale waa tale lola bu?

kenaŋ na weera te mɛɛ naa baale doŋte kamasɛ,

dana ɔ teŋa ŋgba alo ŋon ɔ na doŋee nɛ,

te ɔ siagbɛɛ pou kpeleŋwɔ?

7Wee kenaŋ gyae ke yɛɛ gyakoloŋ,

Wee daale be gyae ke yɛɛ ŋgba keŋ ya.

Ke gyae ke yɛɛ kayeyɛɛ debaŋ fa Yakɔbe,

mɔna waa nyiŋ nyeekelɛɛ lee ke man.

8Degbeŋgyoo Doŋ Pou Nyee kpa, < <<Wee kenaŋ nɛ,

Maa tekerii kasolɔse ŋan lee be wɔŋese man

na maa tirii ba ŋmeeseŋ ŋan,

te ŋɔɔla ba tekaa mo wɔ yɛɛ gbeŋa bela ya.

9Mɔna baa som Degbeŋgyoo be Wurubuarɛ,

na Dawide duluŋman walaŋ,

ŋon maa lese see gyoo fa wɔ nɛ.

10Degbeŋgyoo kpa, << <Mena dɔɔ me tobaale Yakɔbe, naa yee ya,

Iserae, naa yele n wose ke gbirisi neŋ ya.

De yɛɛ senaa maa lɛɛ neŋ lee lemlem,

ɛ duuluŋmantena, lee tɛɛle keŋ yoo be gegi wɔ gyu nɛ man,

Yakɔbe waa bese nyiŋ wosefɛɛreŋ na kegyee,

te ŋolo be gyae waa do e gyakoloŋ ya.

11Degbeŋgyoo kpa,

Me kpuɛna neŋ te maa lɛɛ neŋ,>

<<Doo nyi maa wɔlɛɛ tɛɛlese ŋan pou,

mɔɔ yaasee ŋon gyu nɛ kerekere koraŋ nɛ,

mɔɔ gyae maa wɔlɛɛ neŋ kerekere ya.

maa tenee neŋ, mɔna na beiŋ ya,

mɔɔ gyae maa tina neŋ yela nyi mɔɔ wɔŋ n deŋele korakora ya.>

12Nnɛ yaa Degbeŋgyoo ne yako,

< <<N gyam be dana kekyɔ ya,

bɔɔ gyae baa tale kyɔ n kegooli keŋ ya.

13Ŋolo be kyaa waa sola fa neŋ ya,

n gyam keŋ be dana tee ya,

ŋolo be tale kyɔ neŋ ya.

14Baŋ bɛɛ gyae neŋ pou te wolee neŋ,

bɔɔ famenɛna neŋ ya.

Ma te gyɔ neŋ lɔ ŋgba mena keŋ kɔlare waa yɛɛ nɛ,

te me wɔŋa n deŋele ŋgba mena keŋ nyeeman doŋte waa yɛɛ nɛ,

nawolo nyi n fɔɔkedi te gbaa,

te n dukum mɔ boe beiŋ.

15Weera te n ne fae yeesa lee n gyam dɔɔ,

n weeleŋ keŋ taŋ kekyɔ ya nɛ?

Lee n fɔɔkedi gbaa na n dukum keyɛɛ beiŋ dɔɔ

te me yɛɛ neŋ mena abɔɔ kɛŋa nɛ.

16< <<Mɔna baŋ pou bɔɔ kyekpetee neŋ nɛ, baa kyekpetee wɔ,

baa mo n kɔlara pou gyu yoo gbeŋiri man.

Baŋ be kuu nya abɔɔ yooman na, baa kuu ba abɔɔ yooman.

Baŋ pou be di neŋ gyerebi na, maa di wɔ gyerebi.

17Degbeŋgyoo kpa, <Maa yela ɛ ke nyiŋ wosedoŋ bela

na maa kyɔ ŋon ɛ gyamɛɛ>>

<<Nawolo nyi bɛɛ baake neŋ nyi, ŋon bɔɔ gegi e do ŋale,

Siyɔn ŋon ŋolo be famenɛna e ya.>>

18Nnɛ yaa Degbeŋgyoo ne yako,

< <<Maa besena Yakɔbe kanyaŋ deni man abɔɔ kpaakpaa see ka beneŋ man,

na maa wii ke balaŋ waraŋase,

baa bese baŋ donɔɔ dinaa keŋ ka deyɛlɛɛ e man,

na gyooro dekpaŋalaŋ keŋ ka seŋ ke daseŋae bene man.

19Karaŋ kefa nɔɔneŋ gyae ka lee be man,

na kenyaŋee yeesa.

Maa yela be yaanɔɔle ke wuku,

te bɔɔ gyae baa kɔɔkee ya.

Maa yela baa nyiŋ obuo,

te ŋolo be kɛɛ wɔ nyi bɔɔ doo daale man ya.

20Be bia baa yɛɛ ŋgba gyaŋgba keŋ nɛ,

be donɔɔse gyae ka seŋ me siaman.

Maa wɔŋ baŋ bɛɛ ŋere wɔ do nɛ deŋele.

21Baŋ gbagba walaŋ waa yɛɛ be siamante,

na be gyoo ka lee be man.

Maa wɔŋ e mataa ma wose,e na ŋon mɔ ke tuu benaa maŋ,

nawolo nyi amɔte ne gyaela waa tale gyɔ konɔɔ,

nyi waa tuu benaa maŋ?

Degbeŋgyoo torola yako.

22<<Mena dɔɔ ɛ ke yɛɛ me balaŋ,

na maa yɛɛ ɛ Wurubuarɛ.>> >

23Kɛɛ, Degbeŋgyoo feliŋkum,

gyae ke bɛɛ lee ɔ baŋ man,

gyae ke fiili ŋgba koloŋoloŋ nɛ,

akpanyanyaŋtena nyeeya dɔɔ.

24Degbeŋgyoo baŋ beiŋ keŋ be gyae ka bese ke wɔle ya

kelii debaŋ keŋ

waa yɛɛ keŋ doo ɔ konɔɔ man.

Nyaŋ ke nyii keman

weeya anekɔŋaŋ man.