Yeremiya 31

1Degbeŋgyoo kpa <Debaŋ kenaŋ man nɛ maa yɛɛ Iserae loŋtoro keŋ man pou Wurubuarɛ na baa yɛ me balaŋ.>

2Nnɛ yaa Degbeŋgyoo ne yako.

Baŋ yoosila ta koe wɔ ya nɛ,

baa nyiŋ ka boele depampaa keŋ man

Maa kɔŋ ka fa Iserae kefɛɛfo.>>

3Degbeŋgyoo lese ɔ wose wola daa beneŋ keŋ lem lem te ɔ yako daa nyiaa.

ma moo kegyae keŋ taŋ ɔto ya nɛ gyae ŋon

ma moo kewii keŋ taŋ ɔto ya nɛ boele ŋon.

4Maa bese yela ɛ ke baŋee lila bela

te nyaŋ Iserae keteŋ, n ka bese seŋ n beneŋ man.

nyaŋ ka bese mo nyaa akyakaase

na n ka mo kenyaŋee lee gyu ke sɔe.

5Nyaŋ ke duu gerepose

Samaria bulase bia dɔɔ.

wɔɔ farala baŋ baa duu ŋa

na baa di ŋe bia.

6Wee daale ne kɔŋ keŋ dekere waa fae yeesa,

Ɛferayim bulase bia dɔɔ nyi,

<Kɔŋ, dɛɛ gyeŋ gyu Siyɔn,

Degbeŋgyoo de Wurubuarɛ gyaŋ.> >>

7Nnɛ yaa Degbeŋgyoo ne yako

<<Mo kenyaŋee kpee nɔɔneŋ fa Yakɔbe

fae yeesa fa tɛɛlese dinaana.

Yela baa nyii n yele kalese na n ke yako nyi,

Degbeŋgyoo lɛɛ n balaŋ,

Iseraetena akaŋ baŋ.>

8Kɛɛ, maa mo wɔ lee ado yenaŋ tɛɛle keŋ man

na maa yilaa wɔ lee tɛɛle kei ɔto.

Siayɛlɛɛsatena na akuŋtuŋtena,

na talabose, na fulɛɛtena baa kpuna wɔ.

dikpii dinaa ne gyaela ka bese kɔŋ.

9Baa mo kewii kɔŋ,

baa fane debaŋ keŋ mɔɔ mo wɔ mɛɛ kɔŋ

Maa mo wɔ ta boŋobiise loŋse yenaŋ,

na gbɛɛ kpaakpaa keŋ bɔɔ gyae baa gyɔ be naawɔɔ ya,

nawolo nyi maŋ yɛna Iserae ɔ kya,

te Ɛferayim yɛna me bu baale gyaŋgbate.

10Ɛmɛɛ tɛɛlese ɛ nyii Degbeŋgyoo nɔɔwoya, ɛ gyɔ ke dekpeŋkpeŋ gyu ɛpo nɔɔman tɛɛlese ŋan kyaa lem nɛ nyi.

Ŋon ɔ be yaasee Iserae nɛ waa bese yilaa wɔ

te waa gyee ɔ wonembia dikpii keŋ ŋgba namense kɛɛlere nɛ.

11Nawolo nyi Degbeŋgyoo waa lɛɛ Yakɔbe

na waa lese wɔ lee baŋ be dana doŋ kela wɔ nɛ nyiŋmaa man.

12Baa mo kenyaŋee yeesa kɔŋ Siyɔn bula dɔɔ

baa nyaŋee lee keŋ Degbeŋgyoo be fa wɔ

weenɛɛ, na soloŋ wɔle, na oliifi nuŋ,

na namense bia na nunkyuese burum dɔɔ.

Baa yɛɛ ŋgba wɔɔbii keŋ bɔɔ do ke loŋ nideli nɛ,

te bɔɔ gyae baa mutii bela ya.

13Kenaŋ na alebia baa sɔe na ke yɛɛ wɔ gyoŋ,

tewulɛɛ na kegyiise mɔ baa nyaŋee.

Maa yela be waraŋsa kedi ka bese gyoŋ kedi,

maa yela be kemutii ka bese wɔe kefɛɛ na kenyaŋee

14Maa yela saese baŋ ke nyiŋ burum,

na me balaŋ ke nyiŋ kpene kamasɛ keŋ bɛɛ gyae.

Degbeŋgyoo torola yako

15Nnɛ yaa Degbeŋgyoo ne yako

be nyii yeesa Rama

waraŋase kedi na kewii keŋkeŋ,

Rahɛle ne wii ɔ bia

te ɔ bɛɛwɔ nyi be naa kyɔlɛɛ e ya,

nawolo nyi bɔɔ kyaa bela ya.>>

16Nnɛ yaa Degbeŋgyoo ne yako

<<tina kewii yela

na n ke feefo n sia

nawolo nyi baa tɔ neŋ n tom keŋ kom kpaakpaa.>>

<<Baa lee kɔlare ŋon tɛɛle man bese kɔŋ.

Degbeŋgyoo torola yako

17Keŋ dɔɔ loo kegyakaa doo fa n duuluŋmantena,>>

N bia baa bese kɔŋ baŋ gbagba tɛɛle man.

Degbeŋgyoo torola yako

18<< Me te nyii Ɛferayim waraŋase kewii

<N na tenee maŋ ŋgba nunkyue bu ŋon ɔ bee nyii dei ya nɛ

te n katenee keŋ desinaa maŋ.

Mo maŋ seŋ ma beneŋ man na maa bese kɔŋ

nawolo nyi nyaŋ yɛna Degbeŋgyoo me Wurubuarɛ.

19Ma ke kpase wɔle nɛ

me kyɛɛkeewɔ

ma ke kɔŋ kaa nyii keman nɛ,

ma doŋa me nyimbii.

desɛŋ kyaŋa maŋ te me sia yeŋawɔ

nawolo nyi me tobiiritɛɛ desɛŋ keŋ sɛɛ doo me man.>>

20Na Ɛferayim yɛna me bu ŋon mɛɛ gyae nideli,

biikyaa ŋon ɔ na gyoo me sia yee?

Doo nyi debaŋ kamasɛ na mee kolosi tia e,

mɔna me gyakaa mɛɛ tɔɔse e.

Me konɔɔ pou ne kɛɛ ɔ gbɛɛ.

Me tɔɔ ne kyoŋii maŋ fa e nideli.

Degbeŋgyoo torola yako,

21<<Yɛɛ kawola na ka wola gbɛɛ keŋ

kperee faareŋ lɔ botɔɔ

na ka gyene gbɛɛ dinaa keŋ,

gbɛɛ keŋ n be tɛɛ nɛ.

Iserae alebu keteŋ, bese kɔŋ

bese kɔŋ n donɔɔse man.

22Nyaŋ Iserae alebu ŋon n bee di anokoare ya.

kelii debaŋ woŋti yaa nyaŋ ke ta kyeŋgbeŋ?

Degbeŋgyoo waa yɛɛ kolo wɔle tɛɛle kei dɔɔ,

alo waa bese kɔŋ kaa gyee baale.

23Nnɛ yaa Degbeŋgyoo Doŋ Pou Nyee Iserae Wurubuarɛ ŋon ne yako <<nyi ma lese wɔ lee gbeŋiri man nɛ, balaŋ baŋ be kyaa Yuda na ŋe donɔɔse man baa yako bela nyiaa, <Degbeŋgyoo waa hiraa ŋon, nyaŋ donɔɔ dinaa keŋ be dee fa neŋ, nyaŋ bula keŋ bɔɔ gberaa ke.> 24Balaŋ baa kyaa debodokoloŋ Yuda na ke donɔɔse pou man, mo kpuna wɔɔ farala na namense kɛɛlera. 25Maa yela ŋon ɔ be kaa nɛ ke fɛɛfo, na maa yela ŋon tanam ne gbalase e nɛ ke baa.>>

26Botɔɔ kenaŋ te me ŋeŋawɔ foŋ te me kɛɛwɔ gyaŋee. Ma dosoroŋ keŋ yɛɛ maŋ gyoŋ.

27Degbeŋgyoo kpa <<Weeya ŋaale ne kɔŋ, keŋ maa duu Iserae na Yuda gyooridediise mo kpuna be bia na wonembia. 28Mena keŋ mɔɔ kɛɛ wɔ te bɔɔ kulu te bɔɔ tekeri, te bɔɔ fuŋ ke leki te bɔɔ wɔlɛɛ te bɔɔ yele nombiikum be kɔŋ nɛ, mena te maa kɛɛ na baa baŋ na baa duu. Degbeŋgyoo torola yako, 29Wee kenaŋ de lii nɛ, balaŋ be gyae baa tekaa yako nyiaa,

<<Kyaɔ te di gerepo ŋaŋte

te bia kela yesi wɔ.>>

30Mɔna ɔkamasɛ waa yeŋ fa ŋon gbagba dukum bo. nyi ŋolo de di gerepo ŋaŋte na, ŋon gbagba kela ne gyaela ke yesi e.

31Degbeŋgyoo kpa.

<<Weeya ŋaale ne kɔŋ, keŋ daa na,

Iseraetena,

na Yudatena dɛɛ bakenɔɔ wɔle

32<Keŋ be gyae ke yɛɛ ŋgba nɔɔkebakesee keŋ

mɔɔ bakesee fa be naanaɔ

debaŋ keŋ mɔɔ kyaŋ wɔ na be nyiŋmaa

mo wɔ lee Igyipite nɛ ya

Doo nyi me yɛɛ be baale e,

mɔna be te di nɔɔkebakesee keŋ dɔɔ ya.

Degbeŋgyoo torola yako,

33Degbeŋgyoo kpa, <<Debaŋ kenaŋ wɔle nɛ>

kei yɛna nɔɔkebakesee keŋ maa yɛɛ na Iseraetena.

<Maa mo maŋ mmaraa do baa nyeempɔse man

na maa ŋmarase ŋa gyakaa be konɔɔse dɔɔ.

Maa yɛɛ be Wurubuarɛ,

na baŋ mɔ ke yɛɛ me balaŋ.

34Bɔɔ be gyae baa tekaa wola be tebia,

yaa ŋolo ke yako ɔ dɔɔ nyi, <Gyeŋ Degbeŋgyoo,> ya

nawolo nyi be popou baa gyeŋ maŋ,

lee kemaasa kelii kegyia dɔɔ,>>

Maa mo baa akpanyanyaŋ keyɛɛ kyɛɛ wɔ

te mɔɔ gyae maa tɔɔse be dukum bela ya.>>

Degbeŋgyoo ta toro yako nyiaa.

35Nnɛ yaa Degbeŋgyoo ne yako

ŋon ɔ ba lese weese

nyi waa ŋmaŋee tɛɛ kena,

ŋon yakola fa gyaalaŋ na kyolobiise

nyi baa naa nelim,

ŋon ɔ ne wosi ɛpo

na ke ka koro gyɔ keŋkeŋ

Degbeŋgyoo Doŋ Pou Nyee yɛna ɔ yele.

36Degbeŋgyoo kpa,

<<Akpaa keyakose kɛŋa ŋaageŋ de ŋaalaa lee me siaman nɛ

kenaŋ na Iserae mɔ ba tekaa kyaa

ŋgba tɛɛle ke nɛ me siaman ya.>>

37Nnɛ yaa Degbeŋgyoo ne yako,

nyi akpaa baa tale maa adido adido

na baa tale kɛo tɛɛle mokɔɔ kasee na

kenaŋ na maa bɛɛ Iserae duuluŋmantena pou

lee ŋan pou bɔɔ yɛɛ nɛ dɔɔ. Degbeŋgyoo torola yako

38Degbeŋgyoo kpa. <<Weeya ŋaale ne kɔŋ keŋ baa bese baŋ donɔɔ dinaa keŋ fa maŋ lee Hananele dekagya keŋ gyaŋ mo gyu denaanɔɔ kebɔtale keŋ man. 39Ŋmeleŋ keŋ bɛɛ mo maa, gyae ke ta lee botɔɔ teeŋ kelii Garebe bula dɔɔ na ke go gyu Goa. 40Detaŋgya keŋ bee wuu balaŋ te bɛɛ mo woŋsila leki ke man na tɛɛle keŋ doo Kideron detaŋgya keŋ doo adoyenaŋ kelii naŋ dɛɛkyɔŋse denaanɔɔ keŋ doo gyu weese dɛɛlee yenaŋ nɛ gyae ke yɛɛ fereŋkyeŋ fa Degbeŋgyoo. Bɔɔ gyae baa wɔlɛɛ donɔɔ dinaa keŋ yaa baa yɛlɛɛ ke bela ya.>>