Yeremiya 32

Yeremiya te lɛɛ tɛɛle

1Kei yɛna nombia ŋan ba lee Degbeŋgyoo gyaŋ kɔŋ fa Yeremiya gyaŋ kulutooneŋ kufute ŋon Yuda gyoo Sedekiya ne di gyoori keŋ yɛɛ Nebukadenɛsa gyoori kedi kulutooneŋ kufu gyanaarate ŋon man nɛ. 2Na Babilɔn gyoo yoonɔɔtena te tɔ Yerusalɛm do, te be kyaŋa gbalare Yeremiya mo e do gyeera baŋ nyiŋmaa man Yuda gyooro dekpaŋalaŋ keŋ man.

3Yuda gyoo Sedekiya te kyaŋ e tɔ deni botɔɔ te ɔ bɔɔse e nyiaa, <Weera n ne gbale mena? N ne yako nyi, <Degbeŋgyoo ne yako nyi mɛɛ gyae maa mo donɔɔ dinaa kei, do Babilɔn gyoo nyiŋmaa man na waa yoo di ke dɔɔ. 4Yuda gyoo Sedekiya be gyae waa tale yeu lee Babilɔntena gyaŋ ya, mɔna de yɛɛ senaa baa mo e do Babilɔn gyoo nyiŋmaa man keŋ waa naa e sia na sia na waa kolosina e. 5Degbeŋgyoo kpa yako nyiaa, Baa mo Sedekiya gyu Babilɔn, waa kyaa botɔɔ kelii debaŋ keŋ maa yɛɛ ɔ wose man tom. Ɛ yoona Babilɔntena na ɛ be gyae ɛ ke di be dɔɔ ya.> >>

6Yeremiya yakowɔ nyiaa, Degbeŋgyoo nombia kɔŋawɔ me gyaŋ. 7Nya agbele Salum bu Hanamele waa kɔŋ n gyaŋ na waa yako neŋ nyiaa, <Lɛɛ me tɛɛle keŋ doo Anatote nɛ, nawolo nyaŋ yɛna ma loŋto ŋon n benaana maŋ keŋ kaboena nyi nyaa lɛɛ ke.>

8Ŋgba keŋ Degbeŋgyoo be yako nɛ, ma agbelebii Hanamele kɔŋawɔ me gyaŋ gyeela dekpaŋalaŋ man te ɔ yakowɔ nyiaa <Lɛɛ me tɛɛle keŋ doo Anatote keŋ doo Bɛneyameŋ tɛɛle man nɛ. Nyaŋ te kaboena nyi nyaa lɛɛ ke fa n wose.>>

<<Ma gyeŋ nyi Degbeŋgyoo nɔɔwoya yaa, 9keŋ dɔɔ me lɛɛ wɔɔ keŋ doo Anatote nɛ lee ma agbelebii Hanamele gyaŋ, te me keri kɔba wolom bia kufu nyetooro (17) fa e. 10Ma moo me nyiŋmaa ŋere ke tɔna, te me tɔɔ ke nɔɔ te me nyiŋa adansɛɛtena, te ma moo Sikeli keri kɔba wolom keŋ. 11Ma moo tɔne keŋ dɔɔ yɛɛ tɔ ke nɔɔ nɛ, keŋ dɔɔ ŋmarase do ke man na keŋ da te tɔ ke nɔɔ ya nɛ, 12te ma moo tɔne kenaŋ fa Maseiya ɔ naanabii Baruke bu Neriya, ma agbelebii Hanamele na adansɛɛtena baŋ bɔɔ mo be nyiŋmaa ŋere tɔne keŋ man na Yudatena baŋ pou be kyaa gyeera dekpaŋalaŋ keŋ man nɛ siaman.

13Be siaman te ma moo mena kawola kei fa Baruke. 14Nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako. Mo tɛɛle tɔne keŋ bɔɔ tɔ ke nɔɔ na keŋ ba te tɔ ke nɔɔ ya nɛ, na n ka mo ŋa do tɛɛle osuŋ man na ke kenyiŋ kyare. 15Nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako, baa bese lɛɛ akpaŋalaŋ na tɛɛlese na gerepo wɔɔse bela tɛɛle kei dɔɔ.>

16<<Me ka mo tɛɛle tɔne keŋ fa Neriya bu Baruke taŋ nɛ, me fanewɔ fa Degbeŋgyoo.

17Ao Degbeŋgyoo Doŋ Pou Nyee, n moo n doŋ dinaa na n baam yɛɛ adido na tɛɛle. Kolo be dana doŋ keŋ n be tale yɛɛ ya. 18N na lese n kegyae wola balaŋ kakpoŋse, mɔna n na mo kyaɔ dukum deŋele kewɔŋ kɔŋ be bia baŋ baa kɔŋ be wɔle nɛ dɔɔ. Wurubuarɛ dinaa na doŋte, ŋon n yele yɛna Nnɛ yaa Degbeŋgyoo Doŋ Pou Nyee. 19n nyeeman kebake boe, te ŋan n ne yɛɛ nɛ kerɛɛ. N sia gyakaa deniwalaŋ gbɛɛneŋ pou dɔɔ. N ne tɔ ɔkamasɛ kom lee be dinɔɔ na keŋ ba ayɛɛsa kaboena nɛ. 20N yɛɛ kagyene na gyakoloŋ nombia Igyipite, te n gyakaa n ne yɛɛ ŋa Iserae na denibalaŋ pou man gyɛŋ wee kei, te n lɛɛ yele keŋ ke yɛɛ n wui kaalii gyɛŋ wee kei. 21N kagyene na gyakoloŋ nombia na n baam doŋte na n baam keŋ n ba tenee na keŋeŋii dinaa te n moowɔ lese n balaŋ Iseraetena lee Igyipite. 22N moo tɛɛle kei keŋ n be kaŋ ntam nyi nyaŋ ka mo fa be naanaɔ nɛ fa wɔ, tɛɛle kpaakpaa kei keŋ kee de abɔɔ nideli nɛ. 23Be kɔŋawɔ kaa mo ke bese be wii, mɔna be te nyii n dei yaa di nyaŋ mmaraa dɔɔ ya, te ba te yɛɛ keŋ n be yako wɔ nyi baa yɛɛ nɛ ya. Mena dɔɔ te n moo nombiakumɛɛ kɛŋa pou kaa lɔ be dɔɔ.

24<<Kɛɛ mena keŋ bɔɔ tɔ daa do na baa mo donɔɔ dinaa keŋ. Nawolo nyi lee yoosila na tanam na kaweekum dɔɔ baa mo donɔɔ dinaa kei do Babilɔntena baŋ bee yoo daa nɛ nyiŋmaa man. Nombii keŋ n be yako nɛ, te kɔŋ ŋgba mena keŋ n ne naa ke nɛ. 25Doo nyi baa mo donɔɔ dinaa keŋ do Babilɔntena nyiŋmaa man nɛ, nyaŋ Degbeŋgyoo Doŋ Pou Nyee yako maŋ nyiaa, <Mo kɔba wolom lɛɛ tɛɛle keŋ na n ke yela adansɛɛtena kena ka kelɛɛ man.> >>

26Keŋte Wurubuarɛ nombia kɔŋawɔ Yeremiya gyaŋ nyi 27Maŋ yɛna Degbeŋgyoo denibalaŋ pou Wurubuarɛ. Kolo dana doŋ fa maŋ? 28Mena dɔɔ nnɛ yaa Degbeŋgyoo ne yako, mɛɛ gyae maa mo donɔɔ dinaa kei fa Babilɔntena na Babilɔn gyoo Nebukadenɛsa na baa mo ke. 29Babilɔntena baŋ bee yoona donɔɔ dinaa kei nɛ, baa kɔŋ kaa too ke na ka ke kpa, mo kpuna akpaŋalaŋ ŋan balaŋ baŋ na too oliifi denɛɛ nyeeya dɔɔ fa Baale te bee woli soloŋ fa be wurubuarɛse mo do maŋ baŋ nɛ.

30<<Iseraetena na Yudatena te yɛɛ kolo ya, mɔna dukum te bɛɛ yɛɛ me siaman leenaŋ be tobiiritɛɛ. Ampaŋ Iseraetena te yɛɛ kolo ya, mɔna ba doo maŋ baŋ nideli lee keŋ bɔɔ mo be nyiŋmaase yɛɛ nɛ dɔɔ. Degbeŋgyoo torola yako 31Leenaŋ debaŋ keŋ bɔɔ baŋ donɔɔ dinaa kei kaalii naŋ gyɛŋ, ke ta do maŋ baŋ yela me ta gyeŋ baŋ beiŋ dɔɔ, maa lese ke lee me siaman. 32Iseraetena, na Yudatena, na be gyooneŋ na kyaarabia, na be saese na gbalara, na Yuda baala na baŋ be kyaa Yerusalɛm nɛ, dukum ayɛŋ pou ta do maŋ baŋ. 33Be ta besena be wɔle tee maŋ, na be siagbɛɛ ya, doo nyi me ta wola wɔ agbaatee agbaatee koraŋ nɛ, bɔɔ ne tei maŋ yaa baa nyii me katenee ya. 34Ba te baŋee be bɛɛneŋ baŋ be dana duwaare nɛ deni keŋ ma yele gyakaa ke dɔɔ nɛ man te be waalaa ke. 35Be baŋee botɔɔse ŋan korɛɛ nɛ fa Baale, Bɛne Hinom detaŋgya keŋ man, na baa mo be bia alebia na tewulɛɛ deesi fa Molɛke. Doo nyi ma te fa wɔ gbɛɛ nyi baa yɛɛ ke yaa ke kɔŋ ma gyueŋ man nyi baa yɛɛ kolo anekɔlaŋ kei na ke yela Yuda ke yɛɛ dukum ya.

36<<Ɛ ne yako lee donɔɔ dinaa kei wose man nyi <Lee yoosila, na tanaŋ na kaweekum man te baa mo ke do Babilɔn gyoo nyiŋmaa man,> mɔna n nnɛ yaa Degbeŋgyoo Iserae Wurubuarɛ ne yako 37Ampaŋ maa yilaa wɔ lee tɛɛlese ŋan pou lee me baŋ beiŋ dɔɔ mɔɔ gegi wɔ gyu nɛ man. Maa mo wɔ bese kɔŋ kɛbo bela na maa yela baa kyaa wosefɛɛreŋ man. 38Baa yɛɛ me balaŋ, na maa yɛɛ be Wurubuarɛ. 39Maa yela ba nyeempɔ na ba ayɛɛsa ke yɛɛ dokoloŋ, na baa nyiŋ yee maŋ debaŋ kamasɛ, na abɔɔ pou ke nyiŋ gyu nideli fa baŋ na be duuluŋmantena. 40Daa na wɔ dɛɛ yɛɛ nɔɔkebakesee kekpaakekpaa. Mɔɔ gyae maa tina deeli keyɛɛ fa wɔ yela korakora ya, te maa mo kegyae do be konɔɔse man na bɔɔ nyiŋ lee me wɔle ya. 41Maa nyaŋee lee deeli keyɛɛ fa wɔ man, te de yɛɛ senaa maa mo me konɔɔ na ma woo pou baŋ wɔ lili tɛɛle kei man. 42<<Nnɛ yaa Degbeŋgyoo ne yako. Mena keŋ mɔɔ mo kayeyɛɛ dinaa kɔŋ balaŋ kɛwɔ dɔɔ nɛ, mena ke te maa fa wɔ abɔɔ kpaakpaa ŋan pou mɔɔ yakosee fa wɔ nɛ. 43Baa bese lɛɛ tɛɛlese tɛɛle kei keŋ ɛ be yako nyi, <<Ke yɛɛ tɛɛle keŋ be wɔlɛɛ te ke doo yakaa, keŋ balaŋ yaa wonembia be kyaa ke man ya, nawolo nyi be ta mo ke do Babilɔntena nyiŋmaa man.>> 44Baa mo kɔba wolom lɛɛ tɛɛlese, na baa yɛɛ ŋe tɔna na baa mo be nyiŋmaa ŋere ŋe dɔɔ, na baa tɔ ŋe nɔɔ na adansɛɛtena Bɛneyameŋ tɛɛle man, na akuraase ŋan kyaa Yerusalɛm, na Yuda donɔɔse, na donɔɔse ŋan kyaa bulasebia tɛɛlese man, na bulase bia teŋase man, na ata yenaŋ depampaa tɛɛlese man, na maa besena wɔ seŋ ba beneŋ man. Degbeŋgyoo torola yako.>>