Yeremiya 44

Nombiikum keyala lee bane ɔsom dɔɔ

1Nombii keŋ Degbeŋgyoo be yako Yeremiya lee Yudatena baŋ pou be kyaa Igyipite otisidɔɔ donɔɔse, Migedole na Tahepanehɛse na Memefise na Igyipite ɔgyeŋ dɔɔ yaa. 2<<Nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako. Ɛ naa nombiikum dinaa keŋ mɔɔ yele be yala Yerusalɛm na Yuda donɔɔse ŋan pou dɔɔ. Gyɛŋ ba te bɛɛ ŋa te ŋa te yɛlɛɛ, 3lee nombiakumɛɛ ŋan bɔɔ yɛɛ dɔɔ. Ba too oliifi mo som wurubuarɛse baale keŋ baŋ yaa ɛmɛɛ yaa ɛ naanaɔ ta gyeŋ wɔ ya mo do maŋ baŋ. 4Me kpila ma somera gbalara baŋ agbaatee agbaatee ke yako ŋon nyi, <Ɛ naa yɛɛ kpene anekɔlaŋ kei keŋ mɛɛ kɔle nɛ ya.> 5Mɔna ba te tei maŋ yaa baa see deŋele nyii ya. Ba te kyɛɛkee lee ba akpanyanyaŋ keyɛɛ man, yaa baa tina oliifi katoo fa wurubuarɛse baale yela ya. 6Mena dɔɔ ma lese me baŋkum debɔɔ, te ke kpaa Yuda donɔɔse na Yerusalɛm abɔnterese man, te yelaa ŋa bese donɔɔ benɛɛ te ŋe wɔlɛɛwɔ ŋgba mena keŋ ŋe doo gyɛŋ kei nɛ.

7<<Nɛnɛɛ nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako. Weera te ɛ moo kayeyɛɛ dinaa kei lɔ ɛ dɔɔ, nyi ɛ ka lese ala na baala na bia, na kyokyoose lee Yuda tɛɛle man, keŋ nyi ɛ man ŋolo be kaa ya? 8Weera te ɛ na mo ŋan ɛ ba mo nyiŋmaase yɛɛ nɛ do maŋ baŋ, keŋ ɛ na too oliifise fa wurubuarɛse baale Igyipite, botɔɔ keŋ ɛ be kɔŋ ɛ kaa kyaa nɛ? Ɛ ke wɔlɛɛ ɛ wose na ɛ ka mo ɛ wose bese kefaala,1 na tɛɛlese ŋan kyaa tɛɛle kei dɔɔ nɛ ke kulu ŋon? 9Ɛ te wolee akpanyanyaŋ nombia ŋan ɛ naanaɔ na Yuda gyooneŋ na ala gyooneŋ be yɛɛ, na akpanyanyaŋ nombia ŋan ɛmɛɛ na ɛ wɛɛla be yɛɛ Yuda tɛɛle man na Yerusalɛm abɔnterese man nɛ? 10Mɔna kaalii naŋ gyɛŋ wee kei nɛ, ba te yɔkɔse ba wose yaa baa mo obuo fa maŋ, yaa baa di maŋ mmaraa na me kawolase ŋan mɔɔ fa ɛmɛɛ na ɛ naanaɔ nɛ dɔɔ ya.

11<<Mena dɔɔ nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako, Ma te bake nyi maa yela nombiikum ke yala ŋon, na maa wɔlɛɛ Yuda pou. 12Maa yela Yudatena akaŋ baŋ bɔɔ yɛɛ ba gyueŋ nyi baa gyu ke kyaa Igyipite nɛ ke wɔlɛɛ. Be popou baa munu Igyipite, baa yala yoosila nɔɔman, yaa tanam gyae ke yala wɔ. Lee ba kemaasa kelii be kegyiise pou dɔɔ, baa yekee lee yoosila nɔɔman yaa tanam nɔɔman. Baa bese kefaala na kekulu, na kefaala na baa mo be sia tiu tɛɛle. 13Maa mo yoosila, na tanam keyala na kaweekum wɔŋ baŋ be kyaa Igyipite nɛ deŋele, ŋgba mena keŋ mɔɔ wɔŋ Yerusalɛmtena deŋele nɛ. 14Yudatena akaŋ baŋ bɔɔ gyu ke kyaa Igyipite nɛ, be man ŋolo be gyae waa nyiŋ gbɛɛ yeu yaa waa nyiŋ nyeedoŋ na waa bese gyu Yuda tɛɛle keŋ ne gyɔ wɔ loo nyi baa bese gyu ke kyaa ke man nɛ ya. Be man ŋolo na ŋolo be gyae waa bese kɔŋ ya, gyisɛ kyomii baŋ bɔɔ yekii nɛ baageŋ. 15Keŋte baala baŋ pou ba gyeŋ nyi be wɛɛla na too oliifi fa wurubuarɛse baale, mo kpuna ala baŋ pou be kyaa botɔɔ, balaŋ burum baale na balaŋ baŋ be kyaa Igyipite otisidɔɔ na ɔgyeŋdɔɔ nɛ yako Yeremiya nyiaa, 16<<Dɔɔ gyae dee tei nombia ŋan n be kolosi fa daa lee Degbeŋgyoo yele man nɛ ya! 17De yɛɛ senaa dɛɛ yɛɛ kpene kamasɛ keŋ de kpa dɛɛ yɛɛ. Dɛɛ too oliifi fa adido alagyoo na dee woli soloŋ fa e, ŋgba mena keŋ daa na de naanaɔ, na de gyooneŋ na kegyiise na de kyaarabia be yɛɛ Yuda donɔɔse man na Yerusalɛm abɔnterese man nɛ. Debaŋ kenaŋ na, de dana weenɛɛ burum te de dana da wose mɔ, keŋ dɔɔ ne naa diyem daale ya. 18Mɔna leenaŋ de ke tina oliifi katoo fa adido alagyoo, na soloŋ kewoli fa e yela nɛ, dɔɔ ne nyiŋ kolo bela ya te yoosila na tanam keyala na koena daa.>>

19Te ala baŋ mɔ yakowɔ nyiaa, <<Debaŋ keŋ dɛɛ too oliifi fa Adido Alagyoo te dee woli soloŋ fa e na, de baalawɔ ba gyeŋ nyi dɛɛ yɛɛ kyakpɛlɛse na da te yɛɛ ɔ dinɔɔ mataa ŋe dɔɔ, na da te woli soloŋ deesi fa e yee?>>

20Te Yeremiya yako balaŋ baŋ pou, ala na baala baŋ bɔɔ tiranɔɔ fa e nɛ nyiaa, 21<<Ɛ ba gyeŋ nyi Degbeŋgyoo ne tɔɔse oliifise ŋan ɛmɛɛ na ɛ naanaɔ, na ɛ gyooneŋ na ɛ kyaarabia na balaŋ baŋ ba too Yuda donɔɔse na Yerusalɛm abɔnterese man nɛ yee? 22Degbeŋgyoo bɛɛ tekaa gyae ya akpanyanyaŋ nombia, na abɔɔ anekɔlaŋ ŋan ɛ be yɛɛ, te ɛ tɛɛle ba bese kefaala te ke doo yakaa keŋ balaŋ be kyaa ke man ya, ŋgba mena keŋ ke doo gyɛŋ kei nɛ. 23Lee keŋ ɛ ba too oliifi te ɛ be yɛɛ dukum tia Degbeŋgyoo, keŋ ɛ te nyii ɔ dei ya te ɛ te di ɔ mmaraa yaa ɔ kawola yaa ɔ kefaaree dɔɔ ya, te nombiikum kei yala ŋon ŋgba mena keŋ ɛ ne naa ke nɛ.>>

24Keŋte Yeremiya yako balaŋ baŋ pou mo kpuna ala baŋ nyiaa, <<Ɛmɛɛ Yudatena baŋ pou ɛ kyaa Igyipite nɛ, ɛ nyii Degbeŋgyoo nombia. 25Nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako, Ɛmɛɛ na ɛ wɛɛla te yɛɛ kpene keŋ ɛ be yakosee nyi ɛ ke yɛɛ nyi, <De yɛɛ senaa dee di da ntam keŋ dɔɔ kam, nyi dɛɛ too oliifi na dee woli soloŋ deesi fa Adido Alagyoo ŋon nɛ dɔɔ.>

<<Ɛ gyu ɛ siaman, ɛ yɛɛ keŋ ɛ be yakosee nyi ɛ ke yɛɛ nɛ. Ɛ di ya ntam keŋ dɔɔ. 26Mɔna ɛmɛɛ Yudatena baŋ ɛ kyaa Igyipite nɛ, ɛ nyii Degbeŋgyoo nombia, <Degbeŋgyoo kpa, ma te kɛɛ ma yele dinaa keŋ nyi, Yuda walaŋ na walaŋ ŋon ɔ kyaa Igyipite tɛɛle yenaŋ kamasɛ, be gyae waa baake ma yele yaa waa mo ma yele kaŋ ntam nyi, <<Degbeŋgyoo Doŋ Pou Nyee nyiŋaa ɔ kyaa nɛ.>> ya 27Nawolo nyi me sia gyakaa be dɔɔ nyi dukum dee tuŋ wɔ, na kolo kpaakpaa ya. Yudatena baŋ be kyaa Igyipite nɛ baa yeŋ yoosila na tanam keyala nɔɔman, kaboena be popou ke wɔlɛɛ. 28Baŋ baa yeu lee yoosila nɔɔman lee Igyipite kɔŋ Yuda tɛɛle man nɛ baa yɛɛ kyomii bo. Kenaŋ na Yudatena akaŋ baŋ bɔɔ kɔŋ kaa kyaa Igyipite nɛ, baa gyeŋ nyi amɔte nombia yɛna ampaŋ. Me wui yaa baŋ wui.

29Degbeŋgyoo ta toro yako nyiaa, << <Kei ne gyaela ke yɛɛ kagyene nyi maa wɔŋ ɛ deŋele kɛbo kei, na ɛ ka gyeŋ nyi dukum keŋ me kpa maa yela ke kɔŋ ɛ dɔɔ nɛ, de yɛɛ senaa ke gyae ke kɔŋ mena.> 30Nnɛ yaa Degbeŋgyoo ne yako. <Maa mo Igyipite gyoo Faaro Hofera do ɔ kɔlara baŋ bɛɛ gyae baa ko e nɛ nyiŋmaa man, ŋgba mena keŋ mɔɔ mo Yuda gyoo Sedekiya do ɔ kɔlare Babilɔn gyoo Nebukadenɛsa ŋon ɔ ne gyae waa ko e nyiŋmaa man nɛ.> >>