Yeremiya 43

1Yeremiya ke yako balaŋ baŋ Degbeŋgyoo be Wurubuarɛ nombia ŋan pou, kpene kamasɛ keŋ Degbeŋgyoo be yako e nyi waa yako wɔ nɛ, 2Hosaiya bu Asariya na Karea bu Yohanaŋ, na baala baŋ pou be dana agaŋtaŋ nɛ yako Yeremiya nyiaa, <<N na beo bo, Degbeŋgyoo de Wurubuarɛ te kpila neŋ nyi n kaa yako nyi, <Tekaboena nyi yaa gyu Igyipite ke kyaa botɔɔ ya.> 3Mɔna Neriya bu Baruke ne feefula do neŋ tia daa, na n ka mo daa do Babilɔntena nyiŋmaa man, na baa nyiŋ ko daa yaa baa mo daa gyu yoogbeŋiri man Babilɔn.>>

4Mena dɔɔ Karea bu Yohanaŋ na yoonɔɔtena kegyiise na balaŋ baŋ pou te di Degbeŋgyoo mmaraa keŋ dɔɔ, na baa kyaa Yuda tɛɛle man ya. 5Mɔna Karea bu Yohanaŋ na yoonɔɔtena kegyiise baŋ moo Yudatena akaŋ baŋ bɔɔ lee tɛɛlese ŋan pou man bɔɔ yaasee gyu nɛ man kɔŋ nyi be kaa kyaa Yuda nɛ laŋ. 6Ba besewɔ mo ala na baala na bia, na gyoo bia alebia baŋ yoonɔɔtena kegyia Nebusaradan ŋon ɔ ne kɛɛ gyeera baŋ dɔɔ ba mo wɔ do Safane bu Ahikam bu Gedaliya nyiŋmaa man nɛ. Ba moo gbalare Yeremiya na Neriya bu Baruke mɔ kpuna wɔ. 7Be te nyii Degbeŋgyoo dei ya te be gyuuwɔ Igyipite, te be ke liiwɔ naŋ Tahepanehɛse.

8Degbeŋgyoo yako Yeremiya Tahepanehɛse nyiaa, 9<<Mo boya dinaana na n ka mo ŋa baŋee Faaro gyooro dekpaŋalaŋ gbɛɛ keŋ bɔɔ mo birikisise yɛɛ ke Tahepanehɛse nɛ Yudatena baŋ pou siaman. 10Na n ke yako wɔ nyiaa, <Nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako. Maa kpila ka mo me somere Babilɔn gyoo Nebukadenɛsa kɔŋ, na maa see ɔ gyoorogbeli boya ŋan mɔɔ bam kɛbo nɛ dɔɔ, na waa fɛlɛɛ ɔ gyooro kanyaŋ wuu ŋe dɔɔ. 11Waa kɔŋ kaa yoo Igyipite, te baŋ be kaboena yeŋ baa yeŋ, baŋ be kaboena nyi baa gyu yoo gbeŋiri man baa gyu yoo gbeŋiri man, na yoosila ke gyu baŋ be kaboena yoosila nɛ dɔɔ. 12Waa too Igyipite wurubuarɛse ɔsom denɛɛ, waa too bɔ ɔsom denɛɛ na waa mo be wurubuarɛse ŋgba yoogbeŋa nɛ. Mena keŋ namensekɛɛlere ne gberaa batorona lee ɔ kegbase man nɛ, mena te waa gberaa ayimɛɛ lee Igyipite man na waa ta keyoodi man. 13Waa yɛlɛɛ piilase fereŋkyeŋ ŋan doo be bane weese ɔsom deni keŋ man, na waa too be wurubuarɛse ɔsom denɛɛ pou Igyipite tɛɛle man.> >>