Yeremiya 42

1Keŋte yoonɔɔtena kegyiise baŋ pou, mo kpuna Karea bu Yohanaŋ na Hosaiya bu Yesaniya na balaŋ baŋ pou, lee ba kemaasase dɔɔ kelii be kegyiise dɔɔ tuuwɔ kɔŋ, 2kaa yako gbalare Yeremiya nyiaa, <<Waaseda nyii de kasola na n ke fane fa Degbeŋgyoo n Wurubuarɛ lee balaŋ akaŋ kɛwɔ dɔɔ. Nawolo nyi nafɔ da boe, mɔna nɛnɛɛ daa balaŋ kyomii kɛwɔ kaalaa ŋgba mena keŋ n ne naa nɛ. 3Fane fa Degbeŋgyoo n Wurubuarɛ, na waa wola daa botɔɔ keŋ dee gyu na kpene keŋ dɛɛ yɛɛ.>>

4Te gbalare Yeremiya yako wɔ nyiaa, <<Me nyiiwɔ, maa fane fa Degbeŋgyoo ɛ Wurubuarɛ ŋgba mena keŋ ɛ be bɔɔse nɛ. Nombii kamasɛ keŋ Degbeŋgyoo de yako na maa yako ŋon, keŋ mɔɔ gyae maa mo kolo weese ŋon ya.>>

5Te be yako Yeremiya nyiaa, <<Nyi da te yɛɛ kpene kamasɛ keŋ Degbeŋgyoo n Wurubuarɛ de yako neŋ nyi nyaa yako daa ya nɛ, kenaŋ na Degbeŋgyoo n Wurubuarɛ waa yɛɛ anokoare adansɛɛte tia daa. 6Nyi ke dei fa daa yaa be dei fa daa ya koraŋ nɛ, dee nyii Degbeŋgyoo de Wurubuarɛ ŋon gyaŋ dee kpila neŋ nɛ dei na ke nyiŋ de fa daa. Nawolo nyi dee nyii Degbeŋgyoo de Wurubuarɛ dei.>>

7Weeya kufu wɔle nɛ Degbeŋgyoo kolosiwɔna Yeremiya. 8Mena dɔɔ ɔ baake Karea bu Yohanaŋ yoonɔɔtena kegyiise baŋ pou be kpuɛna e, na balaŋ baŋ pou lee ba kemaasase dɔɔ kelii kegyiise dɔɔ yilaa. 9Ɔ yako wɔ nyiaa, <<Nnɛ yaa Degbeŋgyoo Iserae Wurubuarɛ ŋon ɛ be kpila maŋ ɔ gyaŋ nyi maa mo ɛ kasola gyina e nɛ ne yako. 10<Nyi ɛ ke kyaa tɛɛle kei dɔɔ nɛ, maa yela ɛ ke kyaa gbeli te mɔɔ wɔlɛɛ ŋon ya, maa yela ɛ ke baŋee lila te mɔɔ gyae maa kulu ŋon ya. Nawolo nyi nombiikum keŋ mɔɔ mo lɔ ɛ dɔɔ nɛ ta wee maŋ. 11Ɛ naa yee Babilɔn gyoo ŋon ɛ ne yee e nɛ ya. Ɛ naa yee e ya, nawolo nyi me kpuɛna ŋon te maa lɛɛ ɛ nyee, na maa lɛɛ ŋon lee ɔ nyiŋmaa man. Degbeŋgyoo torola yako. 12Maa wii ɛ waraŋase na ŋon mɔ ke wii ɛ waraŋase, na waa yela ɛ ka bese kyaa ɛ tɛɛle keŋ man.>

13<<Mɔna akpaa ɛ yako nyi, <Dɔɔ gyae dɛɛ kyaa tɛɛle kei dɔɔ ya, te ɛ te nyii Degbeŋgyoo ɛ Wurubuarɛ dei ya, 14te ɛ yako nyi, <Koa, dee gyu ke kyaa Igyipite. Dɔɔ gyae dee nyii yoo, yaa dee nyii yoo kaberɛ yaa tanam ka ko daa botɔɔ ya,> nɛ, 15kenaŋ na ɛmɛɛ Yudatena baŋ ɛ be kaa nɛ, ɛ nyii Degbeŋgyoo nombia. Nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako, <Akpaa ɛ te bake nyi ɛ ke gyu Igyipite, te ɛ gyu ke kyaa botɔɔ nɛ, 16kenaŋ na yoosila keŋ ɛ ne yee nɛ gyae ke yala ŋon botɔɔ, na tanam keŋ ɛ ne yee nɛ ke sila ŋon gyu Igyipite, na ɛ ka yeŋ botɔɔ. 17Ke gbagba na baŋ pou bɔɔ bake nyi baa gyu Igyipite ke kyaa botɔɔ nɛ, baa yeŋ yoosila, na tanam, na kaweekum nɔɔ man. Be man ŋolo na ŋolo be gyae waa ka, yaa waa lee nombiikum keŋ maa mo lɔ be dɔɔ nɛ man ya.> 18Nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako, <Mena keŋ mɔɔ lese me baŋ na me baŋkum wola balaŋ baŋ be kyaa Yerusalɛm nɛ, mena ke te akpaa ɛ gyu Igyipite na maa lese me baŋkum wola ŋon. Ɛ ka bese kefaala. Baa mo ɛ yele falaa, yaa baale baa naa nyi ba te falaa ŋon na baa kulu ŋon. Ɛ be gyae ɛ kena kɛbo kei bela ya.>

19Ɛmɛɛ Yudatena baŋ ɛ be kaa nɛ, Degbeŋgyoo te yako ŋon nyi, <Ɛ naa gyu Igyipite ya.> Ɛ wulaa kɛɛ ke nideli, mɛɛ faaree ŋon baa gyɛŋ, 20nyi ɛ te yɛɛ ke nideli ya, ŋgba ɛ be kpila maŋ Degbeŋgyoo ɛ Wurubuarɛ gyaŋ nyi, <Fane fa Degbeŋgyoo de Wurubuarɛ fa daa, yako daa kpene kamasɛ keŋ ɔ be yako na dee di ke dɔɔ nɛ.> 21Ma te yako ŋon ke gyɛŋ, mɔna ɛ sɛɛ ɛ te nyii Degbeŋgyoo ɛ Wurubuarɛ dei, lee ŋan pou ɔ be kpila maŋ nyi me kaa yako ŋon nɛ ya. 22Mena dɔɔ nɛnɛɛ ɛ wulaa gyeŋ nyi, yoosila na tanam na kaweekum gyae ka ko ŋon botɔɔ keŋ ɛ ne gyae nyi ɛ ke gyu ke kyaa nɛ.>>