Yeremiya 41

1Kulutoo kenaŋ gyaalaŋna nyetoorote man nɛ, Ɛlisama bu Netaniya bu Isemɛle ŋon ɔ yɛɛ gyoorobu e te ɔ yɛɛ gyoo kegyiisi baŋ man ŋolo e nɛ, moo balaŋ kufu (10) kpuna ɔ wose gyu Ahikam bu Gedaliya gyaŋ Misipa. Ba ke kyaa bee dii debodokoloŋ botɔɔ nɛ, 2Netaniya bu Isemɛle na balaŋ kufu (10) baŋ be kpuɛna e nɛ korowɔ mo be yoosilase ko Safane bu Ahikam bu Gedaliya ŋon Babilɔn gyoo ba lese e nyii waa kyaa ɔ naawɔɔ man tɛɛle keŋ dɔɔ nɛ. 3Isemɛle mɔ koo Yudatena baŋ pou be kpuɛna Gedaliya nɛ Misipa mo kpuna Babilɔn yoonɔɔtena baŋ be kyaa botɔɔ nɛ.

4Be ka ko Gedaliya tɛɛkena pɛ ŋolo ka gyeŋ ke nɛ, 5baala sɔŋonaara (80) baŋ bɔɔ tisi be nɔɔfatase, te bɔɔ tirii ba kegbase, te bɔɔ kɛrɛɛ ba wose nɛ, moo weenɛɛ kedeesa na oliifi lee Sekɛm na Silo, na Samaria kɔŋ Degbeŋgyoo ɔsom deni dinaa keŋ man. 6Keŋte Netaniya bu Isemɛle leewɔ Misipa gyu ke gyaŋeena wɔ na ɔ ne wii. Ɔ kelii be gyaŋ nɛ, ɔ yako wɔ nyiaa, <<Ɛ kɔŋ Ahikam bu Gedaliya gyaŋ.>> 7Be ka gyoo donɔɔ dinaa keŋ man nɛ, Netaniya bu Isemɛle na balaŋ baŋ be kpuɛna e nɛ koe wɔ, te be fuŋa wɔ do detiribuŋ daale man. 8Mɔna be man kufu yako Isemɛle nyi, <<Ɛ naa ko daa ya. De dana aboŋ na kameese na oliifi nuŋ na teebɔɔ ŋan weesɛɛ ŋale man.>> Mena dɔɔ ɔ tinaa wɔ yela, keŋ ɔ ta ko wɔ kpuna be tebia baŋ ya. 9Detiribuŋ keŋ man bɔɔ fuŋii balaŋ baŋ bɔɔ koe kpuna Gedaliya woya do nɛ, yɛna keŋ gyoo Asa be wulu nyi waa mo gyee ɔ wose lee Iserae gyoo Baasa dɔɔ nɛ. Netaniya bu Isemɛle moo woya baŋ wulu ke.

10Isemaele kyaŋa balaŋ akaŋ baŋ pou be kyaa Misipa nɛ, na gyoo bia alebia mo kpuna baŋ bɔɔ kaa botɔɔ keŋ yoonɔɔtena kegyia Nebusaradan ŋon ɔ yɛɛ gyeera baŋ siamante e ba lese Ahikam bu Gedaliya nyi waa di be dɔɔ nɛ. Netaniya bu Isemɛle kyaŋa wɔ yoogbeŋa, nyi waa mo wɔ gbaa gyu Amonitena tɛɛle man.

11Karea bu Yohanaŋ na yoonɔɔtena kegyiise baŋ pou be kpuɛna e, ke nyii nombia kumɛɛ ŋan Netaniya bu Isemɛle be yɛɛ nɛ, 12ba moo be yoonɔɔtena pou gyu nyi be kaa yoo Netaniya bu Isemɛle. Te be gyuuwɔ ke tuŋ e depaa dinaa keŋ doo Gibeon nɛ gyaŋ. 13Balaŋ baŋ pou Isemɛle be kyaŋ wɔ kena Karea bu Yohanaŋ na ɔ yoonɔɔtena kegyiisi baŋ be kpuɛna e nɛ, yɛɛ wɔ gyoŋ. 14Balaŋ baŋ pou Isemɛle be kyaŋ wɔ yoogbeŋa Misipa nɛ besewɔ be wɔle gyu Karea bu Yohanaŋ gyaŋ. 15Mɔna Netaniya bu Isemɛle na ɔ balaŋ gyanaara nyiŋa gbɛɛ yeu lee Yohanaŋ nyiŋmaa man te be yeuwɔ gyu Amonitena tɛɛle man.

Keyeu gyu Igyipite

16Keŋte Karea bu Yohanaŋ na yoonɔɔtena kegyiise baŋ pou be kpuɛna e nɛ, moo Misipa balaŋ baŋ pou bɔɔ kaa, baŋ Yohanaŋ be lɛɛ wɔ lee Netaniya bu Isemɛle gyaŋ, debaŋ keŋ Isemaele ba ko Ahikam bu Gedaliya wɔle nɛ. Baŋ yɛna yoonɔɔtena na ala, na bia, na nombia dedii man kegyiise baŋ Netaniya bu Ismɛle be lɛɛ wɔ lee Gibeon nɛ. 17Ba ka mo gbɛɛ bee gyu Igyipite nɛ, be ka seŋawɔ Gerute Kimehame keŋ benaana Bɛtelɛhɛm nɛ. 18na baa yeu lee Babilɔntena nyiŋmaa man. Bee yee wɔ nawolo nyi Netaniya bu Isemɛle ta ko Ahikam bu Gedaliya, ŋon Babilɔn gyoo ba lese e nyi waa di tɛɛle keŋ dɔɔ nɛ.