Yeremiya 40

Be ketina Yeremiya yela

1Ba moo agbaraagbaraase bake Yeremiya gyu Rama mo kpuna baŋ pou bɔɔ mo wɔ lee Yerusalɛm, na Yudatena baŋ bɔɔ kyaŋ wɔ ŋgba yoogbeŋa bee gyu Babilɔn nɛ. Botɔɔ te yoonɔɔtena kegyia Nebusaradan ŋon ɔ ne kɛɛ gyeera baŋ dɔɔ lese Yeremiya lee deni keŋ man. Kenaŋ wɔle Degbeŋgyoo kolosiwɔna Yeremiya. 2Yoonɔɔtena kegyia ŋon kena Yeremiya nɛ, ɔ yako e nyiaa, <<Degbeŋgyoo n Wurubuarɛ te yako nyi, nombiikum kei gyae ke yala kɛbo kei. 3Te nɛnɛɛ Degbeŋgyoo te yele ka te kɔŋ, ɔ te yɛɛ ŋgba mena keŋ ɔ be yako nyi waa yɛɛ nɛ. Kɛŋa pou kɔŋawɔ ɛ dɔɔ nawolo nyi ɛ te yɛɛ dukum tia Degbeŋgyoo te ɛ te nyii ɔ dei ya. 4Mɔna gyɛŋ me ta lese agbaraagbaraase ŋan lee n nyiŋmaase man. Akpaa n ne gyae na sila maŋ gyu Babilɔn na maa kɛɛ n dɔɔ. Mɔna akpaa n bɛɛ gyae ya na kyaa kɛbo. Kɛɛ, tɛɛle keŋ pou doola n siaman, gyu yenaŋ kamasɛ keŋ dei fa neŋ.>> 5Mɔ pɛna Yeremiya ka besena ɔ wose waa gyu nɛ, Nebusaradan yako nyiaa, <<Waaseda bese gyu Safane bu Ahikam bu Gedaliya ŋon Babilɔn gyoo ba lese e nyi waa kɛɛ Yuda donɔɔse ŋan dɔɔ nɛ gyaŋ, na n kaa kyaa ɔ gyaŋ ɔ balaŋ man, yaa nyaŋ ke tale gyu yenaŋ kamasɛ keŋ dei fa neŋ.>>

Keŋte yoonɔɔtena kegyia ŋon faa e weenɛɛ na abɔɔ ŋaale burum te ɔ lɔɔ e gbɛɛ. 6Mena dɔɔ Yeremiya gyuuwɔ Ahikam bu Gedaliya gyaŋ Misipa te ɔ ke kyaawɔ ɔ gyaŋ balaŋ baŋ bɔɔ kaa tɛɛle keŋ man nɛ man.

Be kako Gedaliya

7Yoonɔɔtena siamantena baŋ pou, na be balaŋ baŋ be kyaa ŋale man kenyii nyi Babilɔn gyoo ta lese Ahikam bu Gedaliya nyi waa kɛɛ tɛɛle keŋ dɔɔ, te ɔ lese e nyi waa kɛɛ ala na baala na bia baŋ be yɛɛ ayematenawɔ tɛɛle keŋ man, te be ta mo wɔ gyu yoogbeŋiri man Babilɔn ya dɔɔ nɛ, 8be kɔŋawɔ Gedaliya gyaŋ Misipa. Baŋ yɛna Netaniya bu Isemɛle na Karea bia Yohanaŋ na Yonataŋ na Tanhumete bu Seraiya, na Netofati baale Efai bia na Maakati bu Yasaniya na be man baala. 9Safane bu Ahikam bu Gedaliya kaŋa ntam fa baŋ na be balaŋ nyiaa, <<Ɛ naa yee nyi ɛ ka som Babilɔntena ya. Ɛ kyaa tɛɛle keŋ man na ɛ ka som Babilɔn gyoo na ke de fa ŋon. 10Maŋ gbagba maa kyaa Misipa na maa seŋ ɛ nawɔɔ man Babilɔntena baŋ baa kɔŋ de gyaŋ nɛ siaman, mɔna kaboena nyi yaa yilaa gerepose mo yɛɛ waen, na dugbututɛɛ daasebia na ɛ ka lese oliifi nuŋ na ɛ ka mo ŋa do yɔ osuŋse man see, na ɛ ke kyaa donɔɔse ŋan ɛ ba mo bese ɛ wui nɛ man.>>

11Yudatena baŋ be kyaa Moabe na Amon na Ɛdom, na tɛɛlese akaŋ ŋan pou man kenyii nyi Babilɔn gyoo te tina baale yela Yuda, te ɔ lese Safane bu Ahikam bu Gedaliya nyi waa seŋ gyoo naawɔɔ man di be dɔɔ nɛ, 12be popou besewɔ lee tɛɛlese ŋan bɔɔ yaasee gyu nɛ man kɔŋ Gedaliya gyaŋ Misipa Yuda tɛɛle man. Te be yilaa gerepo bia mo yɛɛ waen na dugbututɛɛ weenɛɛ burum.

13Te Karea bu Yohanaŋ na yoonɔɔtena kegyiise baŋ pou bɔɔ gyoo ŋale nɛ kɔŋawɔ Gedaliya gyaŋ Misipa, 14te be yako e nyiaa, <<N gyeŋ nyi Amonitena gyoo Baalise te kpila Netaniya bu Isemɛle nyi waa kɔŋ kaa ko neŋ? Mɔna Ahikam bu Gedaliya te lɛɛ wɔ di ya.

15Keŋte Karea bu Yohanaŋ yoowɔ yako Gedaliya Misipa nyiaa, <<Yela maa gyu ka ko Netaniya bu Isemɛle keŋ ŋolo ba gyem ya. Weera dɔɔ te waa ko neŋ, na ke yela Yudatena baŋ bɔɔ yilaa kilisi neŋ nɛ ke yaasee, na Yudatena akaŋ baŋ ke munu?>>

16Mɔna Ahikam bu Gedaliya yako Karea bu Yohanaŋ nyiaa, <<Naa yɛɛ ke ya. Nombia ŋan n ne yako lee Isemɛle wose man nɛ te yɛɛ ampaŋ ya.>>