Yeremiya 39

Yerusalɛm keyɛlɛɛ

1Yuda gyoo Sedekiya kedi gyoori kulutooneŋ kadaalete ŋon, ɔ gyaalaŋna kufute man nɛ, Babilɔn gyoo Nebukadenɛsa na ɔ yoonɔɔtena pou bake gbegya gyu Yerusalɛm ke tɔ wɔ do. 2Sedekiya kedi gyoori kulutooneŋ kufudaalete ŋon ɔ gyaalaŋna banaarate ŋon weeya kadaalete man nɛ, te be yɛlɛɛ donɔɔ dinaa keŋ dekyaŋ gyoo ke man. 3Keŋte Babilɔn gyoo kyaarabia pou kɔŋawɔ kaa kyaakee be gbelɛɛ dɔɔ denaanɔɔ nsanate keŋ man. Baŋ yɛna Samegare baale Nɛgale Sarɛsɛle na yoonɔɔtena kegyia Saresekim, na kyaarabia man kegyia Nɛgale Sarɛsɛre na Babilɔn gyoo kyaarabia akaŋ baŋ pou. 4Yuda gyoo Sedekiya na yoonɔɔtena baŋ pou kena wɔ nɛ be yeuwɔ. Ba leewɔ donɔɔ dinaa keŋ man nelim mo gyoo wɔɔbii keŋ gbɛɛ lee denaanɔɔ keŋ doo akyaŋse ala ŋan nsana te ba moo ba nyee baŋ Yɔɔdan detaŋgya1 yenaŋ.

5Mɔna Babilɔntena yoonɔɔtena kuuwɔ kyaa be dɔɔ, te be gyuuwɔ ke tuŋ Sedekiya Yeriko depampaa keŋ man. Be kyaŋa e te ba moo e gyina Babilɔn gyoo Nebukadenɛsa Ribela keŋ doo Hamate tɛɛle man nɛ. Botɔɔ te Nebukadenɛsa dii ɔ nombia bu e fɔɔ. 6Ribela botɔɔ te Babilɔn gyoo kɛrɛɛ Sedekiya bia tewulɛɛ nyeeya ŋon gbagba siaman, te ɔ besewɔ koe Yuda gyoorobia pou. 7Keŋte ɔ kulii Sedekiya siabia te ɔ moo kɔbere agbaraagbaraase bake e na waa mo e gyu Babilɔn.

8Babilɔntena baŋ too gyooro dekpaŋalaŋ keŋ na balaŋ baŋ akpaŋalaŋse, te be yɛlɛɛ Yerusalɛm akyaŋse ŋan. 9Babilɔn yoonɔɔtena kegyia Nebusaradan ŋon ɔ ne kɛɛ gyeera baŋ dɔɔ nɛ moo balaŋ baŋ bɔɔ kaa donɔɔ dinaa keŋ man, na baŋ bɔɔ gyu ke kpuna e nɛ, na balaŋ akaŋ baŋ pou gyu gbeŋiri man Babilɔn. 10Mɔna Yoonɔɔtena kegyia Nebusaradan tinaa ayematena baŋ bɔɔ dana kolo ya nɛ yela Yuda tɛɛle keŋ man, te ɔ faa wɔ gerepo wɔɔse na tɛɛlese.

11Te Babilɔn gyoo Nebukadenɛsa faa yoonɔɔtena kegyia Nebusaradan mmaraa lee Yeremiya wose man nyiaa, 12<<Mo e na n ke kɛɛ ɔ dɔɔ nideli, naa yɛɛ e kolo kum ya, mɔna kpene kamasɛ keŋ ɔ bɔɔse na yɛɛ ke fa e.>> 13Mena dɔɔ yoonɔɔtena kegyia Nebusaradan, na kyaarabia baŋ siamante Nebusaseban, na kegyiise baŋ kegyia Nɛgale Sarɛsɛre, na Babilɔn gyoo kyaarabia akaŋ baŋ pou, 14kpilawɔ gyu ka lese Yeremiya lee gyeera baŋ dekpaŋalaŋ keŋ man. Te ba moo e ka do Safane bu Ahikam bu Gedaliya nyiŋmaa man nyi waa besena e gyu ɔ dɛɛ. Mena dɔɔ ɔ gyuuwɔ ke kyaa ŋon gbagba ɔ balaŋ man.

15Debaŋ keŋ bɔɔ tɔ Yeremiya do gyeera baŋ dekpaŋalaŋ man nɛ, Degbeŋgyoo yako e nyiaa, 16<Gyu ke yako Kusi baale Ebede Meleke nyiaa, <<Nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako. Mɛɛ gyae maa yela nombia ŋan mɔɔ yako tia donɔɔ dinaa kei nɛ kekɔŋ mena. Ke yɛɛ nombiikum ke, te na wose kenyiŋ nombii ya. Debaŋ kenaŋ nɛ, ŋe gyae kekɔŋ mena nyaŋ gbagba n siaman. 17Mɔna Degbeŋgyoo kpa nyiaa, maa lese neŋ mena wee kenaŋ, bɔɔ gyae baa mo neŋ do baŋ n ne yee wɔ nɛ nyiŋmaa man ya. 18Maa lɛɛ n nyee, n be gyae n ke yala yoosila nɔɔman ya, mɔna nyaŋ ke yeu lɛɛ n nyee, nawolo nyi n moo n wose lɔ me dɔɔ, Degbeŋgyoo torola yako.>> >