Yeremiya 38

Be ka mo Yeremiya do detiribuŋ keŋ loŋ be doo ke man ya

1Matan bu Sefatiya, na Pasehure bu Gedaliya, na Selemiya bu Yehukale,1 Na Malekiya Bu Pasehure kenyii keŋ Yeremiya ne yako balaŋ baŋ pou nyiaa, 2<<Nnɛ yaa Degbeŋgyoo ne yako. <Ɔkamasɛ ŋon waa kyaa donɔɔ dinaa kei man nɛ waa yala yoosila nɔɔman, yaa tanam yaa kaweekum man, mɔna ɔkamasɛ ŋon waa gyu Babilɔn na waa nyiŋ nyeedoŋ. Baa yeu lɛɛ ba nyee, baa nyiŋ nyeedoŋ.> 3Nnɛ yaa Degbeŋgyoo ne yako. <De yɛ senaa baa mo Donɔɔ dinaa kei do Babilɔn gyoo yoonɔɔtena nyiŋmaa man, na baa di ke dɔɔ.> >>

4keŋte kegyiise baŋ yako gyoo ŋon nyiaa <<Kaboena nyi baa ko balee kei. Ɔ na mo nombia ŋan ɔ ne yako nɛ, tekerii yoonɔɔtena baŋ bɔɔ kaa donɔɔ dinaa kei man, na balaŋ baŋ pou awoya man. Balee kei bɛɛ gyae balaŋ baŋ deeli ya, mɔna ba kewɔlɛɛ te ɔ ne gyae.>>

5Gyoo Sedekiya tiranɔɔ nyiaa, <<Ɔ doo ɛ nyiŋmaa man, gyoo be tale tɔ ŋon gbɛɛ ya.>>

6Mena dɔɔ ba moo Yeremiya ka do gyoo bu Malekiya detiribuŋ keŋ ke doo gyeera dekpaŋalaŋ keŋ man nɛ man. Ba moo ŋmeleŋ kpaŋ e te be tisinaa e do detiribuŋ keŋ loŋ be doo ke man ya mɔna apɛtɛɛ doo laa ke man nɛ te Yeremiya munuwɔ apɛtɛɛ ŋan man.

7Mɔna Kusi baale Ebede Meleke 2 ɔ kyaa gyooro dekpaŋalaŋ man kenyii nyi be ta mo Yeremiya do detiribuŋ keŋ loŋ be doo ke man ya man. Debaŋ kenaŋ na gyoo kyaa nombia dedii man Bɛneyameŋ denaanɔɔ man. 8Ebede Meleke leewɔ gyooro dɛɛ ke yako gyoo nyiaa, 9<<Me gbeŋgyoo gyoo, Balaŋ kɛo te yɛɛ akpanyanyaŋ lee kpene kamasɛ keŋ bɔɔ yɛɛ tia gbalare Yeremiya nɛ. Be te fuŋ e do detiribuŋ keŋ loŋ be doo ke man ya nɛ man, tanam gyae ke kpa e na waa yeŋ botɔɔ, nawolo nyi weenɛɛ ba tekaa doo donɔɔ dinaa kei man ya.>>

10Keŋte gyoo faewɔ do Kusi baale Ebede Meleke nyiaa, <<Mo baala Saona kufu (30) lee kɛbo na ɛ ke gyu ke wɔŋ gbalare Yeremiya lee detiribuŋ keŋ loŋ be doo ke man ya nɛ man pɛna waa yeŋ.>>

11Te Ebede Meleke moo baala baŋ te be gyuu deni keŋ doo gyooro dekpaŋalaŋ keŋ bɛɛ see abɔɔ nɛ man. ɔ moo kakyeŋgbelaase na kegbase benɛɛ ŋan ŋɔɔ pɔɔ nɛ lee botɔɔ, te ɔ moo ŋa kpaŋna ŋmeleŋ te ɔ tisina ŋa fa Yeremiya detiribuŋ keŋ loŋ be doo ke man ya nɛ man. 12Te Kusi baale Ebede Meleke yako Yeremiya nyiaa, <<Mo kakyeŋgbelaase na kegbase benɛɛ ŋan ŋɔɔ pɔɔ nɛ taa n lalatɛɛ, na ŋmeleŋ keŋ be nyiŋ keketee neŋ ya.>> te Yeremiya yɛɛwɔ mena, 13te be wɔŋa e lese lee detiribuŋ keŋ loŋ be doo ke man ya nɛ man. Te Yeremiya kyaawɔ gyeera baŋ dekpaŋalaŋ man.

Sedekiya kabese bɔɔse Yeremiya bela

14Keŋte gyoo Sedekiya kpilawɔ baake gbalare Yeremiya kɔŋ ɔ gyaŋ, te ba moo e kɔna e Degbeŋgyoo ɔsom deni dinaa dɛɛgyoe atoorote keŋ man. Te gyoo yako Yeremiya nyi <<mɛɛ gyae maa bɔɔse neŋ kolo, naa mo kolo weese maŋ ya.>>

15Te Yeremiya yako Sedekiya nyiaa, <<Nyi me tiranɔɔ fa neŋ na, n be gyae n ka ko maŋ yee? Nyi me kolosi fa neŋ koraŋ na, n be gyae n ke tei maŋ ya.>>

16Mɔna gyoo Sedekiya yoowɔ kaŋ ntam fa Yeremiya nyiaa, <<Degbeŋgyoo ŋon ɔ ne fa daa weesɛɛ nyiŋaa ɔ kyaa nɛ, mɔɔ gyae maa ko neŋ yaa maa mo neŋ fa balaŋ baŋ bɛɛ gyae baa ko neŋ ya.>>

17Keŋte Yeremiya yako Sedekiya nyiaa, <<Nnɛ yaa Degbeŋgyoo, Wurubuarɛ Doŋ Pou Nyee, Iserae Wurubuarɛ ŋon ne yako, <Nyi n mo n wose fa Babilɔn gyoo somera baŋ nɛ, kenaŋ na bɔɔ gyae baa ko neŋ ya, te bɔɔ gyae baa too donɔɔ dinaa kei bela ya, ɛmɛɛ na n loŋtona ɛ ke kyaa nyeedoŋ man. 18Mɔna nyi n ta mo n wose fa Babilɔn gyoo kyaarabia na, baa mo donɔɔ dinaa kei do Babilɔntena nyiŋmaa man na baa too ke, te nyaŋ gbagba be gyae n ke lɛɛ n nyee ya.> >>

19Gyoo Sedekiya yako Yeremiya nyiaa, <<Mee yee Yudatena baŋ bɔɔ gyu ke bomna Babilɔntena nɛ, n te kɛɛ ya na Babilɔntena baa mo maŋ do be nyiŋmaa man, na baa naase maŋ diyem.>>

20Yeremiya tiranɔɔ nyiaa, <<Bɔɔ gyae baa mo neŋ do be nyiŋmaa man ya, mo obuo fa Degbeŋgyoo na n ke tei keŋ maa yako neŋ nɛ.>> Kenaŋ na gyae ke de fa neŋ, te bɔɔ gyae baa ko neŋ ya. 21Mɔna n bɛɛ nyi n ba mo n wose fa ya nɛ, nnɛ yaa Degbeŋgyoo lesewɔ wola maŋ. 22Baa lese ala baŋ pou bɔɔ kaa Yuda gyoo gyooro dekpaŋalaŋ man nɛ debɔɔ fa Babilɔn gyoo kyaarabia. Ala benaŋ baa yako neŋ nyiaa,

< <<Ba beo neŋ te be dii n dɔɔ,

n gyoona baŋ n na mo n wose lɔ be dɔɔ

N nawɔɔ te munu apɛtɛɛ man,

n gyoona te bɛɛ neŋ.>>

23Baa lese ɛ wɛɛla na ɛ bia pou fa Babilɔntena, ɛmɛɛ gbagba be tale lɛo ɛ wose lee be nyiŋmaa man ya, mɔna Babilɔn gyoo waa yoo kyaŋ ŋon na baa too donɔɔ dinaa kei.>>

24Keŋte Sedekiya yako Yeremiya nyiaa, <Naa yela ŋolo ke nyii defa kei ya, na mena ya na nyaŋ ka yeŋ. 25Nyi kyaarabia baŋ de nyii nyi daa na neŋ te kolosi, te be kɔŋ n gyaŋ te be yako nyiaa, <Yako daa keŋ n be yako gyoo na keŋ gyoo mɔ be yako neŋ nɛ, naa weese daa ya na mena ya na dɛɛ ko neŋ,> 26na Yako wɔ nyiaa, <Mɛɛ waase gyoo bo nyi ɔ naa besena maŋ gyu Yonataŋ dɛɛ na maa yeŋ botɔɔ ya.> >>

27Kyaarabia baŋ pou kɔŋa Yeremiya gyaŋ kaa bɔɔse e, te ɔ yako wɔ kpene kamasɛ keŋ gyoo be yako e nyi waa yako nɛ. Mena dɔɔ be ta tekaa yako e kolo ya, nawolo ŋolo te nyii ŋon na gyoo defa keŋ ya.

28Te Yeremiya dɔɔwɔ gyeera baŋ dekpaŋalaŋ man kelii wee keŋ bɔɔ yoo kyaŋ Yerusalɛm.

Yerusalɛm ke yala tɛɛle man

Nnɛ yaa ba moo Yerusalɛm.