Yeremiya 37

Ba kekyaŋ Yeremiya tɔ deni

1Babilɔn gyoo Nebukadenɛsa moo Yosiya bu Sedekiya see Yuda gyoo, ɔ dii gyoori Yehoyakim bu Yehoyakyin 1 naawɔɔ man. 2Ŋon, yaa ɔ kyaarabia, yaa tɛɛle keŋ man balaŋ te tei nombia ŋan Degbeŋgyoo be tɛɛ gbalare Yeremiya dɔɔ kolosi fa wɔ nɛ ya.

3Gyoo Sedekiya moo nɔɔwoya kɛŋa kpila Selemiya bu Yehukale, na Maaseya bu sae Sefaniya gyu gbalare Yeremiya gyaŋ nyiaa. <<Waaseda fane fa Degbeŋgyoo de Wurubuarɛ fa daa.>>

4Na Yeremiya ne tale ta gyu kɔŋ botɔɔ keŋ ɔ ne gyae, nawolo nyi debaŋ kenaŋ na ba te kyaŋata e tɔ do deni ya. 5Faaro yoonɔɔtena kebake gbegya lee Igyipite bɛɛ kɔŋ te Babilɔntena baŋ bɔɔ tɔ Yerusalɛm do kenyii nɛ, te ba leewɔ Yerusalɛm. 6Keŋte Degbeŋgyoo nombia kɔŋawɔ gbalare Yeremiya gyaŋ nyiaa, 7<<Nnɛ yaa Degbeŋgyoo Iserae Wurubuarɛ ŋon ne yako. Yako Yuda gyoo ŋon ɔ be kpila ŋon nyi yaa kɔŋ kaa bɔɔse ma nyee man nyiaa, <Faaro yoonɔɔtena baŋ bɔɔ bake gbegya kaa kyɔ ŋon nɛ, baa bese gyu baŋ gbagba be tɛɛle man Igyipite. 8kenaŋ wɔle nɛ Babilɔntena baŋ baa kɔŋ be kaa yoo tia donɔɔ dinaa kei, baa di ke dɔɔ na baa too ke.>

9Nnɛ yaa Degbeŋgyoo ne yako. Na beo n wose na n ka gyueŋ nyi, <De yɛɛ senaa Babilɔntena kɛwɔ baa tina daa yela ya, koa na mena ya. 10Dekɔŋ nyi ɛ te yoo di Babilɔntena yoonɔɔtena kɛwɔ baŋ bɛɛ yoo ŋon, te de ka baŋ boo gooli be kyaa be kanyaŋ denɛɛ man koraŋ nɛ, baa lee kaa too donɔɔ dinaa kei.>>

11Babilɔntena ke wɔŋ ba wose lee Yerusalɛm, lee Faaro yoonɔɔtena dɔɔ nɛ, 12na Yeremiya taŋ ɔ na lee donɔɔ dinaa keŋ man waa gyu Bɛneyameŋ tɛɛle man, na ɔ kaa gyae ɔ wui dedii balaŋ baŋ man botɔɔ. 13Mɔna ɔ kelii Bɛneyameŋ Denaanɔɔ man nɛ, te gyeera baŋ siamante Hananiya ɔ naanabii Selemiya bu Iriya kyaŋa e te ɔ yako e nyiaa, <<N ne bɛɛ daa baa n ke gyu Babilɔntena gyaŋ.>>

14Te Yeremiya tiranɔɔ nyi <<Ka te yɛɛ ampaŋ nyi mɛɛ bɛɛ ŋon na maa gyu Babilɔntena gyaŋ ya.>> Mɔna Iriya te tei ya, keŋ ɔ be yɛɛ yɛna nyi ɔ kyaŋa e te ɔ moo e kɔŋa kegyiise. 15Ba gyeŋa baŋ do e nideli, te be yela be tuku e te be kyaŋa e tɔ do deni ŋmarasele Yonataŋ dɛɛ keŋ bɔɔ mo bese botɔɔ keŋ bɛɛ kyaŋ balaŋ tɔ deni.

16Ba moo Yeremiya do deni ateta detiŋtɛɛ tuum man, keŋ ɔ doowɔ botɔɔ kyare. 17Keŋ wɔle te gyoo Sedekiya kpilawɔ baa mo e kɔŋ gyooro dekpaŋalaŋ man, botɔɔ te ɔ bɔɔse e nombia ŋonna be bala nyiaa, <<Nombii daale ta lee Degbeŋgyoo gyaŋ?

te Yeremiya tiranɔɔ nyiaa, <<Ayi, Baa mo neŋ do Babilɔn gyoo nyiŋmaa man.>>

18Keŋte Yeremiya bɔɔse gyoo Sedekiya nyiaa, <<Woŋ Dukum yaa me yɛɛwɔ tia neŋ, yaa n somera yaa balaŋ kɛo te ɛ kyaŋa maŋ tɔ deni? 19Nde n gbalara baŋ bɔɔ gbale fa neŋ nyi, <Babilɔn gyoo be gyae waa yoo tia neŋ yaa tɛɛle kei ya>? 20Me gbeŋgyoo gyoo mɔna waaseda nɛnɛɛ tei maŋ. Yela maa mo me kasola see n siaman. Naa yele maa bese gyu ŋmarasele Yonataŋ dɛɛ bela ya, na mena ya na maa yeŋ botɔɔ.>>

21Botɔɔ te gyoo Sedekiya faewɔ do nyi baa mo Yeremiya see gyeera baŋ dekpaŋalaŋ keŋ man, na baa fa e bodobodo lee bodobodo wɔkera kosɔ man wee kamasɛ kelii debaŋ keŋ donɔɔ dinaa keŋ bodobodo gyae ke taŋ. Mena dɔɔ Yeremiya dɔɔwɔ gyeera baŋ dekpaŋalaŋ man.