Yeremiya 36

Yehoyakim katoo Yeremiya tɔne

1Yuda gyoo Yosiya bu Yehoyakim kedi gyoori kulutooneŋ anaarate keŋ man te nombia kɛŋa leewɔ Degbeŋgyoo gyaŋ kɔŋ Yeremiya gyaŋ nyiaa. 2Mo tɔne anebɔɔŋ keŋ na n ke ŋmarase ŋan pou mɔɔ yako lee Iserae, na Yuda na tɛɛlese akaŋ ŋan pou wose man lee debaŋ keŋ mɔɔ gyoo kolosina ŋon keŋ Yosiya ne di gyoori kaalii naŋ gyɛŋ. 3Mberem Yudatena de nyii mena keŋ mɔɔ bake nyi, maa yela nombiikum ke yala wɔ nɛ, na be man walaŋ kamasɛ waa kyɛɛkee lee ɔ dukum keyɛɛ gbɛɛneŋ man, kenaŋ na maa mo ba nkaraŋkaraŋ na be dukum keyɛɛ kyɛɛ wɔ.>>

4Te Yeremiya baake Neriya bu Baruke te Yeremiya tɔlɛɛ nombia ŋan Degbeŋgyoo be yako e nɛ fa e, keŋte Baruke ŋmarase ŋa do tɔne anebɔɔŋ man. 5Keŋte Yeremiya yako Baruke nyi, <<Ba te tɔ maŋ gbɛɛ, tekaboena nyi maa gyoo Degbeŋgyoo ɔsom deni dinaa keŋ man ya. 6Mena dɔɔ nyaŋ gyu Degbeŋgyoo ɔsom deni dinaa keŋ man nɔɔkebake wee keŋ. Na n ke kala Degbeŋgyoo nombia ŋan bɔɔ yako te n be ŋmarase do tɔne anebɔɔŋ keŋ man. Kala ŋa fa Yudatena baŋ pou bɔɔ lee be donɔɔse man kɔŋ nɛ. 7Mberem na baa buŋ ba doona dɔɔ sola Degbeŋgyoo, na baa kyɛɛkee lee be gbɛɛneŋ kumɛɛ man, nawolo nyi Degbeŋgyoo baŋ na ɔ baŋkum keŋ ɔ be yako tia balaŋ kɛwɔ nɛ boe.>>

8Neriya bu Baruke yɛɛ kpene kamasɛ keŋ Gbalare Yeremiya be yako e nyi waa yɛ nɛ, Degbeŋgyoo ɔsom deni dinaa keŋ man te ɔ kala Degbeŋgyoo nombia ŋan lee tɔne anebɔɔŋ keŋ man. 9Yuda gyoo Yosiya bu Yehoyakim kee di gyoori kulutooneŋ anoŋte ŋon, ɔ gyaalaŋna kadaalete ŋon man, te ba see wee fa nɔɔkebake Degbeŋgyoo siaman fa balaŋ baŋ pou be kyaa Yerusalɛm na baŋ pou bɔɔ lee Yuda donɔɔse man nɛ. 10Lee tɔne ŋmarasele Safane bu Gemariya deni keŋ doo be dɛɛgyaŋee dekpaŋalaŋ keŋ ɔgyeŋdɔɔ gyu denaanɔɔ wɔle keŋ doo gyu Degbeŋgyoo ɔsom deni dinaa keŋ gyaŋ, te Baruke kala Yeremiya nombia ŋan doo tɔne anebɔɔŋ keŋ man fa balaŋ baŋ pou. 11Gemariya bu Mikaiya ŋon ɔ naana yɛna Safane kenyii Degbeŋgyoo nombia ŋan pou bɔɔ kale lee tɔne anebɔɔŋ keŋ man nɛ, 12ɔ tisiwɔ gyu ŋmarasere deni keŋ man gyooro dɛɛ keŋ, na kyaarabia baŋ pou kyaa botɔɔ, baŋ yɛna tɔne ŋmarasele Ɛlisama na Semaya bu Delaiya, Akebore bu Ɛlenatan, na Safane bu Gemariya na Hananiya bu Sedekiya na kyaarabia akaŋ baŋ pou. 13Mikaiya keyako wɔ kpene kamasɛ keŋ ɔ be nyii Baruke be kale lee tɔne anebɔɔŋ keŋ man fa balaŋ baŋ nɛ, 14kyaarabia baŋ pou kpila Kusi bu Selemiya ŋon ɔ naanabii yɛna Netaniya nɛ bu Yehudi nyi waa gyu keyako Baruke nyiaa, <<Mo tɔne anebɔɔŋ keŋ n be kale fa balaŋ baŋ nɛ kɔŋ.>> Keŋ dɔɔ Neriya bu Baruke moo ke do ɔ nyiŋmaa man gyina wɔ. 15Be yako e nyiaa << Waaseda tisi kyaa na n kekala ke fa daa

keŋte Baruke kala ke fa wɔ. 16Be ke nyii nombia kɛŋa pou nɛ, be wola be nɔɔ gɛɛse kɛɛ dɔŋa, te be yako Baruke nyiaa, <<Kaboena nyi dɛɛ yako nombia kɛŋa fa gyoo.>> 17Keŋte be bɔɔse Baruke nyiaa, <<Yako daa sena yaa n yɛɛwɔ te n ŋmarase ŋa pou? Yeremiya tɔlɛɛna ŋa fa neŋ?

18Baruke tiranɔɔ nyi <<Ayi, ŋon tɔlɛɛna nombia kɛŋa pou fa maŋ te ma moo pɛŋ ŋmarase ŋa do tɔne Anebɔɔŋ man.>>

19Keŋte kyaarabia baŋ yako e nyi, <<Ɛmɛɛna Yeremiya, Ɛ yeu ka yo, ɛ naa yele ŋolo ka gyeŋ ɛ dekyae ya.>>

20Be kamo tɔne anebɔɔŋ keŋ see Ɛlisama tɔne ŋmarasele ŋon deni man nɛ, te be gyuuwɔ gyoo gyaŋ dekpaŋalaŋ degyaŋee man ke yako e kpene kamasɛ. 21Gyoo ŋon kpila Yehudi nyi waa gyu ka mo tɔne anebɔɔŋ keŋ kɔŋ, te ɔ gyuuwɔ ka mo ke lee tɔne ŋmarasere Ɛlisama deni man kɔŋ, te ɔ kala ke fa gyoo na kyaarabia baŋ ba seŋɛɛ ɔ gyaŋ nɛ pou. 22Ke yɛɛ gyaalaŋna kadaalete ŋon man, na gyoo kyaa ɔ waare deni man, na be ta do boalaŋ ɔ siaman fa e ɔ ne woli. 23Yehudi da betaa kala tɔne anebɔɔŋ keŋ, kegyuusu atooro yaa anaara nɛ, na gyoo ta mo silabii kara ke te ɔ fuŋ ŋa do boalaŋ keŋ man, kaboena ɔ too tɔne anebɔɔŋ keŋ pou boalaŋ man. 24Gyoo na ɔ kyaarabia baŋ pou ke nyii nombia kɛŋa pou nɛ, gyakoloŋ te kyaŋ wɔ, yaa baa tirii ba kegbase ya. 25Doo nyi Ɛlenatan, na Delaiya, na Gemariya waase gyoo nyi ɔ naa too tɔne anebɔɔŋ keŋ ya, mɔna ɔ te nyii wɔ ya. 26Mɔna gyoo ŋon kaŋaa do gyoorobu Yerameele, na Aseriele bu Seraiya, na Abedeele bu Selemiya nyi baa kyaŋ tɔne ŋmarasele Baruke na gbalare Yeremiya. Mɔna Degbeŋgyoo weese wɔ.

27Gyoo ka too tɔne anebɔɔŋ keŋ Yeremiya be yako te Baruke be ŋmarase taŋ nɛ, Degbeŋgyoo nombia kɔŋawɔ Yeremiya gyaŋ nyiaa. 28<<Mo tɔne anebɔɔŋ wɔle na n ke ŋmarase nɔɔwoya ŋan doo gyaŋgbate keŋ Yuda gyoo Yehoyakim ba too nɛ do ke man. 29Bese yako Yuda gyoo Yehoyakim nyiaa, <Nnɛ yaa Degbeŋgyoo ne yako. N too tɔne anebɔɔŋ keŋ te n yakowɔ nyiaa, <<woŋ dɔɔ te n ŋmarasewɔ do ke man nyi de yɛɛ senaa Babilɔn gyoo waa kɔŋ na ɔ kaa wɔlɛɛ tɛɛle kee, na ɔ kaa koe ke man balaŋ na ke wonembia?>> 30Mena dɔɔ nnɛ yaa Degbeŋgyoo ne yako lee Yuda gyoo Yehoyakim wose man. Ɔ be gyae waa nyiŋ ŋolo ke kyaa Dawide gyooro gbeli dɔɔ ya, baa fuŋ ɔ woo lɔ na weese ke gyɔ ke weeseteŋteŋ na waare ke gyɔ ke nelim 31Maa wɔŋ ŋon na ɔ bia na ɔ kyaarabia deŋele, lee be dukum keyɛɛ dɔɔ. Maa yela nombiikum kamasɛ keŋ mɔɔ yako ke kɔŋ baŋ na baŋ pou be kyaa Yerusalɛm, na Yudatena dɔɔ, nawolo nyi ba te tei maŋ ya.> >>

32keŋte Yeremiya moo tɔne anebɔɔŋ wɔle, te ɔ moo ke fa Neriya bu tɔne ŋmarasere Baruke, te Baruke ŋmarase ke dɔɔ ŋgba mena keŋ Yeremiya be kolosi ke nɛ, Baruke ŋmarase kpene kamasɛ keŋ doo tɔne anebɔɔŋ keŋ, Yuda gyoo Yehoyakim ba too nɛ do ke man. Te ba moo nɔɔwoya burum ŋan yɛɛ ŋgba ŋan nɛ kpuna ŋa.