Yeremiya 35

Rekabetena

1Nombia ŋan ba lee Degbeŋgyoo gyaŋ kɔŋ Yeremiya gyaŋ debaŋ keŋ Yuda gyoo Yosiya bu Yehoyakim ne di gyoori nɛ yaa. 2<<gyu Rekabetena dekpaŋalaŋ man na n ke baake wɔ kɔŋ Degbeŋgyoo ɔsom deni dinaa keŋ deni yenaŋ te keŋ daale man na n ke fa wɔ waen baa nyɔɔ.>>

3Mena dɔɔ me gyuuwɔ kamo Yeremiya wɔle ŋolo bu Yaasaniya ŋon ɔ yɛ Habasiniya ɔ naanabii na ɔ kegyiise na ɔ bia pou na Rekabetena loŋtoro keŋ pou kɔŋ. 4Ma mɔɔ wɔ kɔŋ Degbeŋgyoo ɔsomdeni dinaa keŋ man kaa gyoo Wurubuarɛ walaŋ Igedaliya bu Hanane bia deni man. keŋ gyakaa laa kyaarabia deni keŋ dɔɔ te keŋ mɔ gyakaa Salum ŋon ɔ ne kɛɛ denaanɔɔ keŋ dɔɔ bu Maaseya wii dɔɔ. 5Te ma doo waen wulu kuruwaase na leenɔɔse see Rekabetena baŋ siaman, te me yako wɔ nyi <<Waen yaa ɛ nyɔɔ.>>

6Mɔna be tiranɔɔ nyiaa, <<De bɛɛ nyɔɔ soloŋ ya, Nawolo nyi De naana Rekabe Bu Yehonadabe 1 Faree daa nyi, <Daa yaa de duuluŋmantena ŋolo na ŋolo naa nyɔɔ waen pɛnpɛŋ ya. 7Nɛnɛɛ mo na, de naa baŋee akpaŋalaŋse, te ɛ naa duu, yaa ɛ ke fara gerepo wɔɔ pɛnpɛŋ ya. Ɛ naa yɛ abɔɔ ŋenaŋ pou pɛnpɛŋ ya, mɔna debaŋ kamasɛ na ɛ kyaa kanyaŋ denɛɛ man bo. kenaŋ na ɛ ke kyaa tɛɛle keŋ ɛ kyaa ke man ŋgba balaŋ baŋ bee tu kyakee nɛ.> 8De te dii kpene kamasɛ keŋ de naana Rekabe bu Yehonadabe be faaree daa nɛ dɔɔ. Daa, yaa de wɛɛla, yaa de bia alebia na tewulɛɛ te nyɔɔ ta soloŋ pɛnpɛŋ ya 9yaa dɛɛ baŋee akpaŋalaŋ dɛɛ kyaa ŋe man yaa dɛɛ fara gerepo wɔɔse yaa wɔɔ yaa weenɛɛ ya. 10Dɛɛ kyakee bo kanyaŋ denɛɛ man, te de te di mmaraa kamasɛ keŋ de naana Yehonadabe be fa daa nɛ dɔɔ. 11Mɔna debaŋ keŋ Babilɔn gyoo Nebukadenɛsa be kɔŋ kaa yoo tia tɛɛle kei nɛ de yakowɔ nyiaa, <Kɔŋ, kaboena dee gyu Yerusalɛm na dee yeu lee Babilɔntena na Arametena yoonɔɔtena nyiŋmaa man.> menadɔɔ te de dɔɔwɔ Yerusalɛm.>> 12Keŋte Degbeŋgyoo nombia kɔŋawɔ Yeremiya gyaŋ nyiaa. 13<<Kee yaa Degbeŋgyoo Iserae Wurubuarɛ kpataakpere ŋon ne yako, gyu na n kaa yako Yudatena na balaŋ baŋ pou be kyaa Yerusalɛm nyi, < Ɛ be gyae ɛ ke kasee kolo na ɛ kamo obuo fa me nombia ye?> Degbeŋgyoo torola yako. 14Rekabe bu Yehonadabe bu faa Ɔ duuluŋmantena nyi be naa nyɔɔ waen ya te be sɛɛ be dana mena mmaraa kenaŋ keŋkeŋ. Kaalii gyɛŋ be sɛɛ be bɛɛ nyɔɔ waen ya, nawolo nyii bee bu be naanaɔ mmaraa keŋ. Mɔna me gyakaa mɛɛ kolosi na ŋon agbaatee agbaatee, mɔ ɛ bɛɛ mo obuo fa maŋ ya. 15Me kpila ma somla gbalara baŋ kɔŋ ɛ gyaŋ agbaatee agbaatee. Be yako ŋon nyi <<Ɛ man kamasɛ waa kyɛɛkee lee ɔ nombia kumɛɛ gbɛɛneŋ man na waa desina waa ayɛɛsa. Ɛ naa sila wurubuarɛse wɔlɛɛ na ɛ ka som wɔ ya. kenaŋ na ɛ ke kyaa tɛɛle keŋ mɔɔ mo fa ɛmɛɛ na ɛ naanaɔ nɛ.>> Mɔna ɛ te nyii maŋ yaa ɛ ke tei maŋ ya. 16Rekabe bu Yehonadabe duuluŋmantena kyaŋa mmaraa keŋ be naanaɔ be fa wɔ nɛ keŋkeŋ, mɔna balaŋ kɛɔ ta mo obuo fa maŋ ya.>

17<<Mena dɔɔ nnɛ yaa Degbeŋgyoo Doŋ Pou Nyee, Iserae Wurubuarɛ ŋon ne yako. <Ɛ tei, maa yela nombiikum kamasɛ keŋ mɔɔ yako lee Yuda na baŋ pou be kyaa Yerusalɛm wose man nɛ ke kɔŋ mena. Me kolosiwɔ na wɔ, mɔna ba te tei maŋ ya. Me baake wɔ mɔna ba tekpa maŋ ya.> >>

18Keŋte Yeremiya yako Rekabe dekpaŋalaŋmantena baŋ nyiaa, nnɛ yaa Degbeŋgyoo Dekpataakpere Iserae Wurubuarɛ ŋon kpa yako. ɛ moo obuo fa ɛ naana Yehonadabe mmaraa ŋan ɔ be fa ŋon kɛ te ɛ sila ŋe kawola te ɛ yɛ kpene kamasɛ keŋ ŋɔɔ wola ŋon nyi yaa yɛ nɛ.> 19mena dɔɔ kee yaa Degbeŋgyoo kpataakpere Iserae Wurubuarɛ ŋon ne yako. < Be gyae ke kɔŋ nyi Rekabe bu Yehonadabe be gyae waa nyiŋ duuluŋmantena N baa som maŋ ya.> >>