Yeremiya 34

Ba ke faree Sedekiya

1Debaŋ keŋ Babilɔn gyoo Nebukadenɛsa na ɔ yoonɔɔtena pou na gyooridediise na balaŋ baŋ be doo ɔ gyoorideedii dinaa tɛɛ kee yoo Yerusalɛm na ke donɔɔse ŋan be kilisi ke nɛ, Degbeŋgyoo kolosiwɔ fa Yeremiya nyi, 2<<Nnɛ yaa Degbeŋgyoo, Iserae Wurubuarɛ ne yako, Gyu ke yako Yuda gyoo Sedekiya nyiaa, Nnɛ yaa Degbeŋgyoo ne yako, Mɛɛ gyae maa mo donɔɔ dinaa kei do Babilɔn gyoo nyiŋmaa man, na waa too ke. 3N be gyae n ke tale yeu lee ɔ nyiŋmaa man ya. Mɔna de yɛɛ senaa baa kyaŋ neŋ, na baa mo neŋ do ɔ nyiŋmaa man. Nyaŋ gbagba n ka mo n sibii naa Babilɔn gyoo, na ɛmɛɛna e kekolosi sia na sia. Na n kegyu Babilɔn.

4Mɔna Yuda gyoo Sedekiya, tei Degbeŋgyoo keyakosee fa neŋ. Nnɛ yaa Degbeŋgyoo ne yako lee n wose man. N be gyae n ka yeŋ yoosila nɔɔman ya, 5nyaŋ ka yeŋ wosefɛɛreŋ man. Ŋgba mena keŋ bɛɛ do boalaŋ mo do n naanaɔ, gyooneŋ baŋ bɔɔ kyaa pɛ nyaŋ be kɔŋ bɛrɛɛ nɛ, mena ke te baa do boalaŋ mo do neŋ bɛrɛɛ na baa wii neŋ nyi, <<Ao me gbeŋgyoo.>> Maŋ gbagba yakona nombii kei see,Degbeŋgyoo torola yako.>>

6Keŋte gbalare Yeremiya yako kɛŋa pou fa Yuda gyoo Sedekiya Yerusalɛm, 7debaŋ kenaŋ na Babilɔn gyoo yoonɔɔtena gyakaa bee yoo Yerusalɛm, na Yuda donɔɔse dinaana Lakisi na Aseka. Ŋan yɛna Yuda donɔɔse dinaana akaŋ ŋan bɔɔ ma akyaŋse kilisi ŋa.

Gbeŋa ke nyiŋ ba wose

8Gyoo Sedekiya kebake nɔɔ see fa Yerusalɛmtena pou nyi baa tina gbeŋa baŋ yela wɔle nɛ, te Degbeŋgyoo nombia kɔŋawɔ Yeremiya gyaŋ nyi, 9Walaŋ kamasɛ waa tina ɔ Hiburu gbeŋi yela, nyi ɔ yɛɛ alo e yaa baale o, ŋolo be dana gbɛɛ nyi waa ŋere ɔ dɔɔ Hiburu walaŋ do gbeŋiri man bela ya. 10Mena dɔɔ kyaarabia baŋ pou, na balaŋ baŋ bɔɔ lɛɛ nɔɔkebakesee kei do nɛ sɛɛwɔ nyi baa tina be gbeŋa ala na baala baŋ yela, keŋ bɔɔ tekaa ŋere wɔ do gbeŋiri man bela ya. Be sɛɛwɔ te be tinaa wɔ yela. 11Mɔna kenaŋ wɔle nɛ, be kyɛɛkee ba nyeempɔ te ba besewɔ kekyaŋ gbeŋa baŋ bɔɔ tina wɔ yela nɛ, te besenaa wɔ yɛɛ be gbeŋa bela.

12Keŋte Degbeŋgyoo nombia kɔŋawɔ Yeremiya gyaŋ nyiaa, 13<<Nnɛ yaa Degbeŋgyoo Iserae Wurubuarɛ ne yako. Me ka mo ɛ naanaɔ lee gbeŋiri man lee Igyipite tɛɛle man nɛ, me bakenɔɔ see fa wɔ nyiaa, 14<Kulutooneŋ nyetooro kamasɛ na, kaboena nyi walaŋ kamasɛ waa tina ɔ dɔɔ Hiburu walaŋ ŋon ɔ be yɔɔ ɔ wose fa neŋ nɛ yela. Nyi ba som neŋ kulutooneŋ looro wɔle na kaboena nyi nyaa tina wɔ yela na baa ta. Mɔna ɛ naanaɔ te nyii maŋ yaa baa see deŋele fa maŋ ya. 15Weeya akalansɛɛ kɛŋa man te ɛ kyɛɛkee ya nyeempɔ te ɛ yɛɛ keŋ tenɛɛ me siaman. Ɛ man walaŋ kamasɛ gyɔɔ wosekelɛɛ dekpeŋkpeŋ fa ŋon gbagba ɔ walaŋ. Ɛ bakenɔɔsee me siaman, me deni keŋ ma yele gyakaa ke dɔɔ nɛ man. 16Mɔna nɛnɛɛ ɛ ta besena ɛ wose waalaa maŋ, te ɛ man ɔkamasɛ besewɔ ka mo ɔ gbeŋi ala na baala baŋ ɛ be tina wɔ yela nyi baa ta gyu botɔɔ keŋ bɛɛ gyae nɛ. Ɛ ta ŋere wɔ nyi baa bese ɛ gbeŋa bela.

17Degbeŋgyoo kpa, nnɛ yaa Degbeŋgyoo ne yako. Ɛ te nyii me dei ya, ɛ te gyɔ wosekelɛɛ dekpeŋkpeŋ fa ɛmɛɛ gbagba ɛ balaŋ ya. Mena dɔɔ mɛɛ gyɔ <<wosekelɛɛ>> dekpeŋkpeŋ fa ŋon. <wosekelɛɛ keŋ ɛ ke yala yoosila, na tanam, na kaweekum man,> Degbeŋgyoo ta toro yako nyiaa <wose ke lɛɛ> keŋ ɛ ke yala yoosila nɔɔman, na kaweekum, na tanam. Maa yela ɛ ke yɛɛ gyakoloŋ fa tɛɛlese pou gyooridediise. 18Baŋ bɔɔ wɔlɛɛ me nɔɔkebakesee keŋ, te be te di nɔɔkebakesee keŋ bɔɔ yɛɛ me siaman mmaraase dɔɔ ya nɛ, maa yɛɛ wɔ ŋgba nunkyue bu ŋon bɔɔ bɛɛse e yaale ala, te bɔɔ tɛɛ ŋa nsana laŋ nɛ. 19Yuda na Yerusalɛm siamantena, na dekpaŋalaŋ kegyiise na saese na tɛɛle keŋ man balaŋ baŋ pou bɔɔ tɛɛ nunkyue bu ŋon yaaleŋ ŋan nsana nɛ. 20Maa mo wɔ do be kɔlara baŋ bɛɛ gyae baa ko wɔ nɛ nyiŋmaa man. Ba woya gyae ka bese gyebuse na ŋaleman wonembia weenɛɛ.

21Maa mo Yuda gyoo Sedekiya na ɔ kyaarabia do be kɔlara baŋ bɛɛ gyae wɔ baa ko nɛ nyiŋmaa man, maa mo wɔ do Babilɔn gyoo yoonɔɔtena baŋ, bɔɔ wɔŋ ba wose lee wɔle yoo man nɛ nyiŋmaa man. 22Degbeŋgyoo kpa, mɛɛ gyae maa fa mmaraa, na maa besena wɔ kɔŋ donɔɔ dinaa kei man. Baa yoo ke, baa mo ke na baa too ke. Na maa yela Yuda donɔɔse ke wɔlɛɛ, keŋ ŋolo be kyaa botɔɔ ya.>>