Yeremiya 33:3

Kabese seŋ keyakosee

1Ba ke kyaŋ Yeremiya do gyeera baŋ dekpaŋalaŋ man te Degbeŋgyoo nombia kɔŋawɔ ɔ gyaŋ bolate. 2<<Nnɛ yaa Degbeŋgyoo ŋon ɔ be yɛɛ tɛɛle te ɔ ba see ka mokɔɔ te ɔ be yele kɔɔ sem te ɔ yele yɛna Degbeŋgyoo nɛ ne yako. 3<<Baake maŋ na maa kpa neŋ, na maa yako neŋ nombia dinaana na nombia aweeseŋ ŋan n ba gyeŋ ya.> 4Nawolo nyi nnɛ yaa Degbeŋgyoo Iserae Wurubuarɛ ŋon ne yako, lee akpaŋalaŋ ŋan doo donɔɔ dinaa kei man na Yuda gyooro dekpaŋalaŋ ŋan bɔɔ yɛlɛɛ mo tia ketɔdo na yoosila, 5debaŋ keŋ bee yoona Babilɔntena nɛ wose. <Balaŋ baŋ lee me baŋ na baŋ beiŋ dɔɔ maa koe wɔ nɛ woya baa lɛɛ botɔɔ. Maa lese me sia lee donɔɔ dinaa kei dɔɔ lee ba akpanyanyaŋ ayɛŋ pou dɔɔ.

6< <<Mɔna maa mo wosedoŋ na kawee kekyɔ kɔna wɔ. Maa mo kawee kekyɔ kɔna me balaŋ na baa nyiŋ wosefɛɛreŋ na kegyee gbagba. 7Maa lese Yuda na Iserae lee yoogbeŋiri man, na maa yela baa bese baŋ lila ŋgba ba beneŋ. 8Maa feefo be dukum keŋ pou bɔɔ yɛɛ tia maŋ, na maa mo be deŋeledoŋ dukum keŋ bɔɔ yɛɛ tia maŋ nɛ pou kyɛɛ wɔ. 9Kenaŋ na donɔɔ dinaa kei gyae ke yela maa lɛɛ yele na kenyaŋee na yele kalese na obuo. Tɛɛlese ŋan kyaa tɛɛle kei dɔɔ pou baa nyii nombia kpaakpaa ŋan pou mɔɔ yɛɛ fa ke na baa wola be nɔɔ, na baa seree lee abɔɔ kpaakpaa ŋan pou na wosefɛɛreŋ keŋ mɔɔ fa ke nɛ dɔɔ.>

10Nnɛ yaa Degbeŋgyoo ne yako. <Ɛ ne yako lee kebo kei wose man nyiaa <<Kɛbo doo yakaa, keŋ balaŋ yaa wonembia be kyaa ke dɔɔ ya.>> Mɔna Yuda donɔɔse man na Yerusalɛm abɔnterese keŋ bɔɔ bɛɛ te balaŋ yaa wonembia be kyaa botɔɔ ya nɛ baa bese nyii, 11kenyaŋee na gyoŋ yeesa, alowɔle na alowɔle baale weeya na baŋ bɛɛ mo karaŋ kefa abɔɔ kɔŋ Degbeŋgyoo ɔsom deni dinaa man nɛ weeya keŋ bɛɛ yako nyiaa,

<<Ɛ fa Degbeŋgyoo Doŋ Pou Nyee ŋon karaŋ,

nawolo nyi Degbeŋgyoo dei,

ɔ kegyae doo kekpaakekpaa.>

Degbeŋgyoo kpa nyi, mena keŋ tɛɛle keŋ be doo kaalaŋ nɛ, maa besena ke see ka beneŋ man.>

12Nnɛ yaa Degbeŋgyoo Doŋ Pou Nyee ne yako. <Kɛbo kei na ke donɔɔse ŋan doo yakaa te balaŋ yaa wonembia be kyaa ya nɛ, gyae kaa bese wonembia dedii na defɛɛfoe fa namensekɛɛlera na be namense. 13Donɔɔse ŋan kyaa bulasebia man, na weese dɛɛyalae bulasebia teŋa man, na ata yenaŋ depampaa man, ŋan kyaa Bɛneyameŋ tɛɛlese man, na akuraase ŋan be kilisi Yerusalɛm, na Yuda donɔɔse man nɛ, wonembia kɛɛlera baa bese kala be wonembia botɔɔ bela.>> Degbeŋgyoo yakola.

14Degbeŋgyoo kpa, < <<Weeya ŋaale ne kɔŋ, keŋ maa di ma keyakosee kpaakpaa keŋ mɔɔ yako fa Iseraetena na Yudatena nɛ dɔɔ.

15< <<Weeya ŋenaŋ man na debaŋ kenaŋ nɛ,

Maa yela katenee tombii ka potee lee Dawide woŋ man,

waa yɛɛ keŋ doo kegbɛɛ dɔɔ na keŋ tenɛɛ tɛɛle keŋ man.

16Weeya ŋenaŋ man nɛ, baa lɛɛ Yuda nyee,

te Yerusalɛm waa kyaa kegyee man.

Yele keŋ baa baake e yɛna nyi,

Degbeŋgyoo, da nyeelɛɛre ŋon ɔ tenɛɛ.

17Nawolo nyi nnɛ yaa Degbeŋgyoo ne yako. <Walaŋ ŋon waa kyaa Iserae gyoorogbeli dɔɔ, be gyae kebɔ Dawide korakora ya, 18mena mɔ te sae ŋon waa seŋ me siaman debaŋ kamasɛ na waa yɛɛ katoo kedeesa, na weenɛɛ katoo kedeesa na waa deesi nɛ be gyae kebɔ Lewitena ya.> >>

19Degbeŋgyoo nombia kɔŋawɔ Yeremiya gyaŋ. 20Nnɛ yaa Degbeŋgyoo ne yako. <<Akpaa n ke tale wɔlɛɛ ma wee nɔɔkebakesee keŋ, na n ke wɔlɛɛ me nelim nɔɔkebakesee keŋ, na wee na nelim ba tekaa kɔŋ ŋa debaŋ man ya nɛ, 21kenaŋ na me nɔɔkebakesee keŋ mɔɔ yɛɛ fa ma somre Dawide, na me nɔɔkebakesee keŋ mɔɔ yɛɛ fa Lewitena baŋ be yɛɛ saesewɔ te bɛɛ som me siaman nɛ gyae ke tale wɔlɛɛ, te Dawide ba tekaa nyiŋ ɔ duuluŋman walaŋ ŋon waa kyaa ɔ gyooro gbeli dɔɔ di gyoori ya. 22Maa yela me somere Dawide duuluŋmantena, na Lewitena baŋ bɛɛ som me siaman nɛ yaanɔɔle ka bo ŋgba kyolobiise keŋ bɔɔ tale kala wɔ ya, yaa ŋgba ɛpo nɔɔman aŋasa ŋan bɔɔ tale maa ŋa ya nɛ.> >>

23Degbeŋgyoo nombia kɔŋawɔ Yeremiya gyaŋ nyiaa. 24N bee nyii nyi balaŋ kɛwɔ ne yako nyi, <Degbeŋgyoo te bɛɛ gyooridediise ala ŋan ɔ ba lese nɛ yee? 1 Mena dɔɔ ba doo me balaŋ desɛŋ te bɔɔ ne kɛɛ wɔ nyi be yɛɛ tɛɛle daale bela ya. 25Nnɛ yaa Degbeŋgyoo ne yako. <<Nyi meŋ te bakenɔɔsee fa wee na nelim, na maa see mmaraase fa adido na tɛɛle ya nɛ, 26kenaŋ na maa bɛɛ Yakɔbe duuluŋmantena, na ma somre Dawide, te mɔɔ gyae maa lese ɔ bia man ŋolo nyi waa di gyoori Aberaham, na Yisake, na Yakɔbe duuluŋman ya. Nawolo nyi maa besena wɔ see ba beneŋ man, na maa wii be waraŋase.>> >