Hɛsekiɛle 9

Bane somra nombia kedi

1Keŋte me nyii Wurubuarɛ baake maŋ ma deŋela man keŋkeŋ nyiaa, <Mo baŋ bɔɔ lese wɔ nyi baa di donɔɔ dinaa kei man balaŋ nombia nɛ kɔŋ siaman, ɔkamasɛ waa tela ɔ yoo abɔɔ.> 2Te me naa baala looro leewɔ adogbɛɛ denaanɔɔ keŋ ke sia teena adoyenaŋ nɛ kɔŋ, na ɔkamasɛ dana yoo abɔɔ kumɛɛ. Na balee ŋolo kpuɛna wɔ keŋ ɔ doona akaralɛɛ kegba. Ɔ dana kolo keŋ waa ŋmarase abɔɔ gyakaa ke dɔɔ nɛ ɔ yenaŋ. Ba gyoowɔ kɔŋ kaa seŋ kɔbere kedeesaboe keŋ yenaŋ.

3Te Iserae Wurubuarɛ gyoorobiiri keŋ korowɔ lee kerubi ŋon dɔɔ botɔɔ keŋ nafɔ ke doo nɛ, te ke gyuuwɔ ka seŋ ɔsom deni dinaa keŋ denaanɔɔ man. Te Degbeŋgyoo baake balee ŋon ɔ doona akaralɛɛ kegba te ɔ dana kolo keŋ waa ŋmarase abɔɔ gyakaa ke dɔɔ ɔ yenaŋ nɛ, 4te ɔ yako e nyiaa, <Gyu keta kila Yerusalɛm donɔɔ dinaa keŋ man, na n ka do baŋ bee di waraŋsa te bɛɛ toroŋ lee abɔɔ anekɔlaŋ ŋan bɛɛ yɛɛ ke man nɛ nso be tirinɔɔse dɔɔ.>

5Me kee tei nɛ, ɔ yako balaŋ akaŋ baŋ nyiaa, <Ɛ sila e kila donɔɔ dinaa keŋ man na ɛ ka koe wɔ keŋ ɛ naa wii wɔ yaa ɛ ke wii be waraŋase ya. 6Ɛ koe kegyiise na alebia na tewulɛɛ na ala kegyiise na bia, mɔna ɛ naa koe baŋ bɔɔ do wɔ nso keŋ nɛ ya. Ɛ mo lee ma fereŋkyeŋ keŋ man.> Mena dɔɔ ba moowɔ lee kegyiise baŋ be kyaa ɔsom deni dinaa keŋ siaman nɛ dɔɔ.

7Botɔɔ te ɔ yako wɔ nyiaa, <Ɛ waalaa ɔsom deni dinaa keŋ, na ɛ ka mo balaŋ baŋ ɛ ba koe nɛ kaa wulu ka dekpaŋalaŋ man. Ɛ ta!> Mena dɔɔ ba ŋerewɔ gyoo donɔɔ dinaa keŋ man ka koe balaŋ. 8Be ke gyu bɛɛ koe balaŋ baŋ nɛ, kaa maŋ maageŋ, te ma moo me sia buŋ tɛɛle man te me wiiwɔ keŋkeŋ nyiaa, <Ao Degbeŋgyoo Doŋ Pou Nyee, nyaŋ ke wɔlɛɛ Iseraetena akaŋ baŋ pou lee n baŋ nedoŋ keŋ n ba gyem do Yerusalɛm dɔɔ?>

9Te ɔ tiranɔɔ fa maŋ nyiaa, <Iseraetena na Yudatena nombiakumɛɛ ta boo gbaa. Balaŋ kako te lɛɛ tɛɛle keŋ, te bɔɔ ne di nombia kegbɛɛ dɔɔ donɔɔ dinaa keŋ man ya. Bɛɛ yako nyiaa, <<Degbeŋgyoo te bɛɛ tɛɛle keŋ, Degbeŋgyoo bɛɛ naa ya.>> 10Mena dɔɔ mɔɔ gyae maa wii be waraŋase yaa maa mo kyɛɛ wɔ ya, mɔna maa yela kpene keŋ bɔɔ yɛɛ nɛ ke busaana baŋ gbagba.>

11Keŋte balee ŋon ɔ doona akaralɛɛ kegba te ɔ dana kpene keŋ bɛɛ ŋmarase abɔɔ gyakaa ke dɔɔ ɔ yenaŋ nɛ besewɔ kɔŋ kaa yako nyiaa, <Ma te yɛɛ kpene keŋ n be faedo maŋ nyi maa yɛɛ nɛ.>