Hɛsekiɛle 8

Bɛɛneŋ kasom Ɔsom Deni Dinaa keŋ man

1Kulutooneŋ loorote ŋon ɔ gyaalaŋna loorote ŋon wee anoŋte keŋ me kyaa me dɛɛ te Yuda kegyiise baŋ kyakɛɛ me siaman nɛ, Degbeŋgyoo Doŋ Pou Nyee ŋon moo ɔ nyiŋmaa gyakaa me dɔɔ botɔɔ. 2Me kɛɛwɔ te me naa kolo ŋgba deniwalaŋ dinɔɔ nɛ. Lee botɔɔ keŋ yɛɛ ŋgba ɔ teŋa man mo tisi yɛɛ ŋgba boalaŋ nɛ. Te lee botɔɔ mo gyu wa adido ne ŋalakee ŋgba nyeele keŋ ne ŋalakee nɛ. 3Ɔ tenee kolo ŋgba nyiŋmaa nɛ te ɔ kyaŋa maŋ ma nyeenyɔɔse man. Te Feliŋ ŋon gate maŋ adido na me doo adido na tɛɛle nsana, te Wurubuarɛ kalese wola man na moo maŋ gyu Yerusalɛm, ka seŋ ba dekpaŋalaŋ tɔɔmante keŋ ka denaanɔɔ doo adoyenaŋ, botɔɔ keŋ bane ŋon ɔ na do baŋ seŋɛɛ nɛ. 4Te me naa Iserae Wurubuarɛ ŋon gyoorobiiri me siaman botɔɔ, ŋgba mena keŋ ɔ ba lese wola maŋ detaŋgya keŋ man nɛ.

5Keŋte ɔ yako maŋ nyiaa, <Deniwalaŋ bu, kɛɛ adoyenaŋ.> Mena dɔɔ me kɛɛwɔ te me naa bane ŋon ɔ na do baŋ nɛ kedeesaboe keŋ adoyenaŋ denaanɔɔ gbɛɛ keŋ nɔɔman.

6Keŋte ɔ yako maŋ nyiaa, <Deniwalaŋ bu, n ne naa kpene keŋ bɛɛ yɛɛ? Iseraetena ne yɛɛ abɔɔ anekɔlaŋ kumɛɛ ŋan gyae ke gegi maŋ lee ma fereŋkyeŋ keŋ man gyu lem. Mɔna nyaŋ kena abɔɔ ŋan mɛɛ kɔle kela kɛŋa.

7Keŋte ɔ moo maŋ kɔŋ dekpaŋalaŋ keŋ denaanɔɔ man. Me kɛɛwɔ te me naa bɔɔ dekyaŋ keŋ man. 8Keŋte ɔ yako maŋ nyiaa, <Deniwalaŋ bu, wula dekyaŋ keŋ man.> Mena dɔɔ me wula dekyaŋ keŋ man, te me naa denaanɔɔ botɔɔ.

9Te ɔ yako maŋ nyiaa, <Gyoo ke man na n ke kɛɛ akpanyanyaŋ nombia na abɔɔ anekɔlaŋ ŋan bɛɛ yɛɛ kɛbo.> 10Mena dɔɔ ma gyoowɔ ke kɛɛ, te me naawɔ nyi ba te yɛɛ wonembia baŋ bee tuuna tɛɛle, na wonembia baŋ bɛɛ kɔle na Iserae bɛɛneŋ pou dinɔɔse mataa akyaŋse keŋ dɔɔ. 11Na Iserae kegyiise sɔŋotooro na kufu (70) seŋɛɛ be siaman, keŋ Safane bu Yaasaniya mɔ seŋɛɛ be man. Ɔkamasɛ dana gbɛŋgbɛŋ ɔ nyiŋmaa man, na oliifi ofoŋte nyɔɔse na koro lee ke man.

12Te ɔ yako maŋ nyiaa, <Deniwalaŋ bu, n naa keŋ Iserae kegyiise ne yɛɛ detiŋtɛɛ man, keŋ ɔkamasɛ seŋɛɛ ŋon gbagba ɔ bane deni siaman? Bɛɛ yako nyi, <<Degbeŋgyoo bɛɛ naa daa ya, Degbeŋgyoo te bɛɛ tɛɛle keŋ.>> > 13Ɔ besewɔ yako maŋ nyiaa, <Nyaŋ kena wɔ na bɛɛ yɛɛ abɔɔ anekɔlaŋ ŋan kela kɛŋa.>

14Keŋte ɔ moo maŋ kɔŋ Degbeŋgyoo ɔsom deni dinaa keŋ adogbɛɛ denaanɔɔ keŋ nɔɔman, te me naa ala kyakɛɛ botɔɔ bee di wurubuarɛ Tamuse waraŋsa. 15Te ɔ yako maŋ nyiaa, <Deniwalaŋ bu, n naa kei? Nyaŋ kena abɔɔ anekɔlaŋ ŋan kela kei.>

16Botɔɔ te ɔ moo maŋ kɔŋ Degbeŋgyoo ɔsom deni dinaa keŋ dekpaŋalaŋ tɔɔmante keŋ man. Te me naa baala sao banoŋ (25) ɔsom deni dinaa keŋ denaanɔɔ man. Ba seŋɛɛ poto keŋ na kedeesaboe keŋ nsana. Be wɔle teena Degbeŋgyoo ɔsom deni dinaa keŋ, na be siagbɛɛ teena weese dɛɛlee, na bee buŋ som weese, weese dɛɛlee.

17Te ɔ yako maŋ nyiaa, <Deniwalaŋ bu, n naa kei? Abɔɔ anekɔlaŋ ŋan Yudatena ne yɛɛ kɛbo nɛ yɛɛ kolo peperee ke? Kaboena nyi baa mo nombia akaraŋkaraŋ wulu tɛɛle keŋ, na be gyakaa bɛɛ do maŋ baŋ? Kɛɛ mena keŋ bɛɛ mo ba ayɛɛsa tee maŋ! 18Mena dɔɔ maa mo baŋ di be nombia, mɔɔ gyae maa wii be waraŋase yaa maa mo kyɛɛ wɔ ya. Nyi be wii baake maŋ koraŋ nɛ, mɔɔ gyae maa nyii wɔ ya.