Hɛsekiɛle 7

Wurubuarɛ waa di Iserae nombia

1Degbeŋgyoo yako maŋ nyiaa, 2<Nyaŋ Deniwalaŋ bu, Nnɛ yaa Degbeŋgyoo Doŋ Pou Nyee ne yako Iserae tɛɛle,

< <<Ɔto keŋ! Ɔto keŋ te kɔŋ

fa tɛɛle keŋ kebɔtalase anaara ŋan!

3Nɛnɛɛ ɔto keŋ te kɔŋ n dɔɔ,

te maa lese me baŋ tia neŋ.

Maa di n nombia lee nya ayɛɛsa dɔɔ,

na maa tɔ neŋ kom lee nya ayɛɛsa anekɔlaŋ ŋan pou n be yɛɛ nɛ dɔɔ.

4Mɔɔ gyae maa wii n waraŋase ya,

mɔɔ gyae maa mo kyɛɛ neŋ ya.

De yɛɛ senaa maa tɔ neŋ kom lee nya ayɛɛsa

anekɔlaŋ ŋan pou n be yɛɛ nɛ dɔɔ.

< <<Botɔɔ te ɛ ka gyeŋ nyi maŋ yɛna Degbeŋgyoo.>>

5<Nnɛ yaa Degbeŋgyoo Doŋ Pou Nyee ne yako,

< <<Nombiikum! Nombiikum keŋ de te nyiita see ya,

Kɛɛ, ka te kɔŋ.

6Ɔto keŋ te kɔŋ!

Ɔto keŋ te kɔŋ!

Ke ta koro tia neŋ.

Kɛɛ, ka te kɔŋ!

7Kewɔlɛɛ te kɔŋ ɛ dɔɔ,

te kɔŋ ɛmɛɛ baŋ ɛ kyaa tɛɛle keŋ dɔɔ nɛ dɔɔ.

Debaŋ keŋ te kɔŋ! Wee keŋ ta benaa!

Gyakoloŋ doo bulase ŋan dɔɔ, te yɛɛ kenyaŋee ya.

8Mɛɛ gyae maa lese me baŋ nedoŋ wola ŋon

na maa gyeŋ baŋ tia ŋon.

Maa di ɛ nombia lee ya ayɛɛsa dɔɔ,

na maa tɔ ŋon kom lee ayɛɛsa anekɔlaŋ ŋan pou ɛ be yɛɛ nɛ dɔɔ.

9Mɔɔ gyae maa wii ɛ waraŋase ya,

mɔɔ gyae maa mo kyɛɛ ŋon ya.

Maa tɔ ŋon kom lee ya ayɛɛsa

na abɔɔ anekɔlaŋ ŋan ɛ ne yɛɛ nɛ dɔɔ.

< <<Botɔɔ te ɛ ka gyeŋ nyi maŋ Degbeŋgyoo yɛna ŋon mɔɔ gyɔ ŋon lɔ.

10< <<Kɛɛ, wee keŋ!

Kɛɛ, ka te kɔŋ!

Kewɔlɛɛ te bɛɛ lee,

dambila keŋ ta potee,

agaŋtaŋ ta lese kyeŋkyeŋkɔɔse!

11Nyeeman doŋ ta koro,

gbutu keŋ baa mo wɔŋ akpanyanyaŋte deŋele.

Balaŋ baŋ man ŋolo be gyae waa ka ya,

dikpii kenaŋ man ŋolo,

na ba wosekenyiŋ,

abɔɔ ŋan na lee koya be gyae ke ka ya.

12Debaŋ keŋ te kɔŋ!

Wee keŋ te lii!

Abɔɔ lɛɛre naa nyaŋee,

yaa abɔɔ yɔɔre ke di waraŋsa ya,

nawolo nyi me baŋ nedoŋ te kɔŋ dikpii keŋ pou dɔɔ.

13Debaŋ keŋ abɔɔ lɛɛre na abɔɔ yɔɔre nyiŋaa be kyaa nɛ,

Abɔɔ yɔɔre be gyae waa nyiŋ

ɔ dedii keŋ ɔ be yɔɔ nɛ bela ya,

Nawolo nyi keŋ bɔɔ lese wola wɔ lee balaŋ dikpii keŋ man,

be gyae ka bese lee ke wɔle ya.

Lee be dukum dɔɔ be man dokoloŋ,

be gyae waa lɛɛ ɔ nyee ya.

14< <<Be ta wola kaberɛ keŋ,

ba te bake gbegya,

mɔna ŋolo be gyae waa gyu yoo ya,

nawolo nyi me baŋ nedoŋ gyakaa balaŋ dikpii keŋ pou dɔɔ.

15Yoosila kyaa donɔɔ dinaa keŋ wɔle,

kaweekum na tanam keyala kyaa donɔɔ dinaa keŋ man.

Baŋ be kyaa tɛɛle keŋ man,

baa yeŋ yoosila nɔɔman,

baŋ be kyaa donɔɔ dinaa keŋ man nɛ,

tanam dinaa na kaweekum gyae kewɔlɛɛ wɔ.

16Baŋ bɔɔ nyiŋ gbɛɛ yeu lee nɛ

baa yekii gyu bulase dɔɔ,

be popou baa mutii,

ŋgba detaŋgya man awuluŋna nɛ

ɔkamasɛ fa ŋon gbagba ɔ dukum.

17Nyiŋmaa kamasɛ gyae ke yɔkɔse,

te foŋfoŋ gyae ke fɔ doono kamasɛ.

18Baa wuu titire kotokuse,

na gyakoloŋ ka gyoo wɔ.

Desɛŋ gyae ke kyaŋ be popou,

na be popou ke gbee be nyeeya.

19< <<Baa fuŋii be kɔba wolom lɔ abɔnterese man,

na be kɔba yayam ke yɛɛ wɔ ŋgba kpene keŋ ke dana ayimɛɛ nɛ.

Be kɔba wolom na be kɔba yayam,

be gyae ke tale lese wɔ

Degbeŋgyoo baŋ nedoŋ wee keŋ ya.

Ka be gyae ka ko be tanam nɔɔ,

yaa ke baa wɔ ya,

nawolo nyi ka te yele ba te kpaŋte gyoo dukum man.

20Be gate ba wose lee ba abɔɔ anemiaŋ kyeo nyiŋan ŋan dɔɔ,

te ba moo ŋa yɛɛ be bɛɛneŋ anekɔlaŋ baŋ.

Ba moo ŋa yɛɛ abɔɔ akaraŋkaraŋ dinɔɔse,

mena dɔɔ maa yɛɛ ke kolo keŋ ka wose dana ayimɛɛ nɛ fa wɔ.

21Maa mo ba wosekenyiŋ fa ŋɔɔla ŋgba yooman abɔɔ nɛ,

na tɛɛle dɔɔ akpanyanyaŋtena ke kuu ŋa,

na baa waalaa ŋa.

22Maa lese me sia lee balaŋ baŋ dɔɔ,

na ŋmɛɛlatena kaa waalaa botɔɔ keŋ mɛɛ gyae nideli nɛ.

Baa gyoo ke man,

na baa waalaa ke.

23Ɛ desina anewanterese!

Nawolo nyi balaŋ kakoe te lɛɛ tɛɛle keŋ,

te nombia akaraŋkaraŋ keyɛɛ te lɛɛ donɔɔ dinaa keŋ.

24Maa mo tɛɛlese baŋ be dana akpanyanyaŋ beiŋ nɛ kɔŋ

na be kaa mo ba akpaŋalaŋse bese be wui.

Maa yela be doŋtena wose kegate ke kɔŋ ɔto,

na baa waalaa ba fereŋkyeŋse ŋan.

25Nyi gyakoloŋ de kɔŋ na,

baa kɛo wosefɛɛreŋ kina.

26Kayeyɛɛ gyae ke sila kayeyɛɛ kɔŋ,

na be kpa be kpa ke sila be kpa be kpa.

Baa ta kɛo nyi baa naa nombia lee gbalare gyaŋ,

saese mmaraase ŋan man kawola gyae ke taŋ,

kegyiise baŋ kekolosido gyae ke kɔŋ ɔto.

27Gyoo waa di waraŋsa,

nombia ketakaa gyae ke wuu siamante,

na tɛɛle keŋ dɔɔ balaŋ nyiŋmaase ke seree.

Ba ayɛɛsa te maa mo tɔ wɔ kom,

te keŋ kaboena wɔ nɛ te maa mo di be nombia.

< <<Botɔɔ te baa gyeŋ nyi maŋ yɛna Degbeŋgyoo.>> >