Hɛsekiɛle 6

Iserae bulase kewɔlɛɛ

1Degbeŋgyoo yako maŋ nyiaa, 2<Deniwalaŋ bu, mo n sia tee Iserae bulase ŋan na n ke gbala tia ŋa, 3na n ke yako nyiaa,<<Ɛmɛɛ Iserae bulase, ɛ nyii Degbeŋgyoo Doŋ Pou Nyee nombii. Nnɛ yaa Degbeŋgyoo Doŋ Pou Nyee ne yako bulase na bulasebia, na boya bɔɔneŋ na detaŋgyase. Mɛɛ gyae maa mo yoosila kɔŋ ɛ dɔɔ, na maa wɔlɛɛ ɛ botɔɔse ŋan pou ɛ ne gyaŋee som dakoreese dɔɔ nɛ. 4Maa yɛlɛɛ ɛ kedeesaboya ŋan na maa naŋ yɔ oliifi kedeesaboya ŋan, na maa koe ɛ balaŋ ɛ bɛɛneŋ baŋ siaman. 5Maa mo Iseraetena woya baŋ see be bɛɛneŋ baŋ siaman, na maa yaasee ɛ ŋɔɔ kilisi ɛ kedeesaboya ŋan. 6Yenaŋ kamasɛ keŋ ɛ kyaa nɛ, maa yela ɛ donɔɔse ke doo yakaa na maa wɔlɛɛ botɔɔse ŋan pou ɛ ne gyaŋee som dakoreese ŋan dɔɔ nɛ, na ɛ kedeesaboya ke doo yakaa na ŋa ke wɔlɛɛ. 7Baa koe ɛ balaŋ ɛ man, na ɛ ka gyeŋ nyi maŋ yɛna Degbeŋgyoo.

8< <<Mɔna maa yela ɛ man baale ke nyiŋ nyeedoŋ. Nyi be yaasee ŋon gyu tɛɛlese na tɛɛle kei dɔɔ nɛ, ɛ man baale baa nyiŋ gbɛɛ yeu lee yoosila nɔɔman. 9Kenaŋ na baŋ bɔɔ nyiŋ gbɛɛ yeu lee nɛ, baa tɔɔse maŋ tɛɛlese ŋan man bɔɔ mo wɔ gyu yoogbeŋiri man nɛ. Baa tɔɔse mena keŋ bɔɔ do maŋ baŋ lee keŋ bɔɔ lese be konɔɔse lee me dɔɔ, na mena keŋ bɔɔ mo be loo gyakaa be bɛɛneŋ dɔɔ nɛ dɔɔ. Gyae ke takaa wɔ lee nombiakumɛɛ ŋan bɔɔ yɛɛ, na ayɛɛsa anekɔlaŋ ŋan pou dɔɔ. 10Na baa gyeŋ nyi maŋ yɛna Degbeŋgyoo. Na ma doo wɔ gyakoloŋ bo yakaa nyi maa yela nombiikum kei ke yala wɔ ya.

11< <<Nnɛ yaa Degbeŋgyoo Doŋ Pou Nyee ne yako, <<Ɛ gyɔ ɛ nyiŋmaase na ɛ ke tokii ɛ naawɔɔ na ɛ ke wii keŋkeŋ nyiaa,<Lee Iseraetena akpanyanyaŋ nombia, na abɔɔ anekɔlaŋ pou keyɛɛ dɔɔ, yoosila na tanam dinaa na kaweekum gyae ke yala wɔ. 12Ŋon ɔ kyaa lem waa yeŋ kaweekum man, te ŋon ɔ benaa waa yala yoosila nɔɔman. Ŋon ɔ be kaa na waa yeŋ tanam kayala nɔɔman. Mena te maa lese me baŋ nedoŋ wola wɔ. 13Akpaa ba koe be balaŋ lɔ be bɛɛneŋ na ba kedeesaboya gyaŋ, na bulabii kamasɛ dɔɔ na bulase pou nyeeya dɔɔ na daase wuluŋ tɛɛ na kpeli daase ŋan ŋe dana faareŋse tɛɛ botɔɔse ŋan bɛɛ too oliifise ofoŋnyiŋan fa be bɛɛneŋ nɛ, botɔɔ te baa gyeŋ nyi maŋ yɛna Degbeŋgyoo. 14Maa gyina me nyiŋmaa be dɔɔ na maa yela be tɛɛle ke doo yakaa lee depampaa man kelii Ribela yenaŋ kamasɛ keŋ be kyaa nɛ. Botɔɔ te baa gyeŋ nyi maŋ yɛna Degbeŋgyoo.