Hɛsekiɛle 5

Wurubuarɛ nombiakedi akapa

1<Nɛnɛɛ, Deniwalaŋ bu, mo yoosila keŋ kɛɛ bee nɛ na n ka mo ke yɛɛ akapa tisi n nyee na n nɔɔfata. Na n ka mo Sikeli kpala nyeenyɔɔse ŋan. 2N ketɔdo wee de kɔŋ ɔto nɛ, too n nyeenyɔɔse ŋan kekpala man atooro man dokoloŋ donɔɔ dinaa keŋ man. Mo kekpala atooro keŋ man alate gyakaa donɔɔ dinaa keŋ boya dɔɔ kilisi na n ka mo yoosila keretii ŋa kpetekpete. Na n ke ŋmatee kekpala atoorote keŋ feliŋ man. Nawolo nyi maa wɔŋ yoosila lee gbegya man mo gegi wɔ. 3Mɔna mo nyeenyɔɔse ŋan kyomii bake n kegba nɔɔbii man. 4Bese mo kyomii fuŋ do boalaŋ man na ŋa ke kpa. Boalaŋ gyae ke yaasee lee botɔɔ ka gyoo Iserae pou man.

5< Nnɛ yaa Degbeŋgyoo Doŋ Pou Nyee ne yako, Yerusalɛm keŋ mɔɔ mo see tɛɛlese nsana, te donɔɔse pou be kilise e nɛ yaa kei. 6Mɔna wa akpanyanyaŋ dɔɔ, ɔ ta seŋ tia maŋ mmaraase na kawolase kela balaŋ na tɛɛlese ŋan be kilisi e nɛ. Ɔ te bɛɛ maŋ mmaraase, te ɔ te di me kawolase dɔɔ ya.

7<Mena dɔɔ nnɛ yaa Degbeŋgyoo Doŋ Pou Nyee ne yako, n te yɛɛ nombia kumɛɛ kela tɛɛlese ŋan be kilisi neŋ nɛ, te n te di maŋ mmaraase na kawolase dɔɔ ya. Ya ayɛɛsa koraŋ kela tɛɛlese ŋan be kilisi ŋon nɛ wui.

8<Mena dɔɔ nnɛ yaa Degbeŋgyoo Doŋ Pou Nyee ne yako, maŋ gbagba mɛɛ seŋ tia nyaŋ Yerusalɛm, te maa wɔŋ n deŋele tɛɛlese ŋan siaman. 9Lee n duwaare bɛɛneŋ baŋ dɔɔ, maa yɛɛ neŋ keŋ ma te yɛɛta see ya, te mɔɔ gyae maa yɛɛ ke bela ya. 10Mena dɔɔ lolara baa tao be bia, te bia baa tao ba lolara ɛ man. Maa wɔŋ ɛ deŋele na maa yaasee n balaŋ akaŋ baŋ pou do feliŋse man. 11Degbeŋgyoo Doŋ Pou Nyee ta toro yako nyiaa, ma te kaŋ ma wose ntam nyi, lee keŋ n ba mo bɛɛneŋ na duwaare ayɛɛsa do ma fereŋkyeŋ keŋ ayimɛɛ dɔɔ nɛ, mɔɔ gyae maa wii n waraŋase yaa maa tina neŋ yela ya. 12Kaweekum yaa tanam keyala gyae ka ko n balaŋ dekpeŋ dokoloŋ lee akpeŋ atooro man, na dekpeŋ dokoloŋ ka yeŋ yoosila nɔɔman n dekyaŋ keŋ wɔle, na maa yaasee dekpeŋ atoorote keŋ do feliŋ man, na maa wɔŋ me yoosila lee ke bɔɔlee man gegi wɔ.

13<Kenaŋ na maa tina me baŋ yela, na me baŋ nedoŋ keŋ mɔɔ gyem tia wɔ nɛ nɔɔ ke yɔkɔse na me konɔɔ ke fɛɛ maŋ. Te ma lese me baŋ nedoŋ wola wɔ nɛ, baa gyeŋ nyi maŋ Degbeŋgyoo kolosila me sia keyɛɛ man. 14Maa yɛlɛɛ neŋ na baa kulu neŋ tɛɛlese ŋan ŋɔɔ kilisi neŋ nɛ man, na baŋ bɛɛ lam botɔɔ nɛ pou siaman. 15Debaŋ keŋ maa wɔŋ n deŋele lee me baŋ na me baŋ nedoŋ, na ma kekalana beiŋ man nɛ, baa kulu neŋ na baa tee neŋ, te n ka bese kyɔɔla kafee na gyakoloŋ ka gyoo tɛɛlese ŋan ŋɔɔ kilisi neŋ nɛ. Maŋ Degbeŋgyoo kolosila 16Ma mo ma yeŋ na kewɔlɛɛ tanam keyala baŋdaŋ nyeela tɔ neŋ nɛ, maa tɔ ke wɔlɛɛ neŋ. Maa mo tanam keyala beiŋ kɔŋ n dɔɔ, te mɔ gyae maa tekaa yela weenɛɛ ke de ya. 17Maa yela tanam na wonembiakumɛɛ kaa seŋ tia ŋon, te baa koe ɛ bia. Kaweekum na balaŋ kako gyae ke waale ŋon, na maa mo yoosila keŋ kɔŋ ɛ dɔɔ. Maŋ Degbeŋgyoo kolosila.