Hɛsekiɛle 4

Yerusalɛm ketɔdo kagyene

1<Nɛnɛɛ Deniwalaŋ bu, mo tɛɛle degbaŋ, mo ke see n siaman na n ke yɛɛ Yerusalɛm donɔɔ dinaa wɔŋtaa gyakaa ke dɔɔ. 2Na n ke tɔ ke do, na n ke baŋ keŋ baa mo tɔ wɔ do nɛ, na n ka see yoonɔɔtena kilisi ke, na n ke baŋee daase ŋan baa mo yɛlɛɛ dekyaŋ keŋ nɛ kilisi ke. 3Na n ka mo nyeele tasa, na n ka see ke ŋgba nyeele dekyaŋ nɛ ɛmɛɛ na donɔɔ dinaa keŋ nsana, na n ka besena n sia tee ke. Baa tɔ ke do, te nyaŋ ne gyaela n ke tɔ ke do. Kei gyae ke yɛɛ kagyene fa Iseraetena.

4<Na n ke doo n demena dɔɔ na n ka mo Iseraetena dukum gyakaa n nyee dɔɔ1 Nyaŋ ka seele be dukum weeya ŋan nyaŋ ke doo n yenaŋ dɔɔ nɛ. 5Me ta mo be dukum kulutooneŋ yɛɛ weeya kekala fa neŋ. Mena dɔɔ n ka seele Iseraetena dukum weeya sɔŋonoŋse atooro na sɔŋonaara na kufu (390).

6<N yɛɛ kei taŋ na bese doo bela, nɛnɛɛ dɔɔ doo n dunoluŋ dɔɔ na n ka mo Yudatena dukum seele. Ma te fa neŋ weeya sɔŋola fa kulutooneŋ sɔŋola. 7Besena n sia tee Yerusalɛm ketɔ do keŋ, na n ka kpee n kegba na n ke gbala tia e. 8Maa mo ŋmeleŋ bake neŋ na n be tale besena lee yenaŋ daale gyu yenaŋ daale ya, kelii weeya ŋan n ke taŋ n ketɔ do.

9<Mo aboŋ na kameese na wona na keboase na amɔla na wamela, mo ŋa desina do osuŋ man, na n ka mo yɛɛ weenɛɛ fa n wose. N ke di ŋa weeya sɔŋonoŋse atooro na sɔŋonaara na kufu (390) ŋan n ke doo n yenaŋ dɔɔ nɛ man. 10Keri weenɛɛ sɛkɛlese sao keŋ nyaŋ ke di wee kamasɛ, na n ke di ke debaŋ keŋ bɔɔ fa neŋ nɛ dɔɔ. 11Maa loŋ mɔ leenɔɔse ala na n ke nyɔɔ ke debaŋ keŋ baa fa neŋ nɛ dɔɔ. 12Di weenɛɛ ŋan ŋgba kameese weenɛɛ nɛ, mo boalaŋ keŋ bɔɔ mo walaŋ pena do nɛ wɔke ke balaŋ baŋ siaman.> 13Degbeŋgyoo kpa nyiaa, <Nnɛ te Iseraetena baa di weenɛɛ ŋan bɔɔ waalaa tɛɛlese ŋan maa gegi wɔ gyu nɛ man.>

14Botɔɔ te me yakowɔ nyiaa, <Koa, Degbeŋgyoo Doŋ Pou Nyee! Ma te waalaata ma wose see ya. Leenaŋ me tobiiritɛɛ kaalii gyɛŋ kei nɛ, me te diita kolo deyeŋe yaa keŋ wonembu kum baa koo nɛ ya. Naane keŋ ka be faafoɛ ya nɛ, te tinaata me nɔɔ see ya.>

15Te ɔ yako maŋ nyiaa, <Yoo, maa yela n ka mo nunkyue pena wɔke n weenɛɛ, te na walaŋ pena bela ya.

16Te ɔ yako maŋ nyiaa, <Deniwalaŋ bu, kɛɛ, maa yela weenɛɛ be gyae ka tekaa de Yerusalɛm ya. Balaŋ baŋ baa di weenɛɛ ŋan bɔɔ keri fa wɔ nɛ kayeyɛɛ man, na baa nyɔɔ loŋ keŋ bɔɔ maa fa wɔ nɛ wose ketekerii man, 17nawolo nyi weenɛɛ na loŋ gyae ke yɛɛ baŋ. Be naa dɔŋa na, ba wose gyae ka yeŋ wɔ, na baa wɔlɛɛ lee be dukum dɔɔ.