Hɛsekiɛle 3

1Te ɔ yako maŋ nyiaa, <Deniwalaŋ bu, di keŋ doo n siaman nɛ, tao mena tɔne kei, na n ke gyu ke kolosi fa Iseraetena baŋ.> 2Mena dɔɔ me gyuusu me nɔɔ, te ɔ moo tɔne keŋ bɔɔ bɔ ke nɛ fa maŋ me taowɔ.

3Botɔɔ te ɔ yako maŋ nyiaa, <Deniwalaŋ bu, tao tɔne kei keŋ mɔɔ mo mɛɛ fa neŋ nɛ na ka ke baa neŋ. Mena dɔɔ me tao ke, te ke dana gyoŋ ŋgba teebɔɔ nɛ.

4Te ɔ yako maŋ nyiaa, <Deniwalaŋ bu, nɛnɛɛ gyu Iseraetena baŋ gyaŋ na n kaa kolosi me nombia fa wɔ. 5Na balaŋ baŋ bɔɔ gyeŋ kekolosi, yaa dei wɔle gyaŋ yaa mee kpila neŋ ya, mɔna Iseraetena gyaŋ yaa mee kpila neŋ. 6te na balaŋ burum baŋ bɔɔ gyeŋ kekolosi yaa be dei wɔle keŋ n bee nyii be nombia man nɛ gyaŋ yaa mee kpila neŋ ya. Ampaŋ, deŋ yɛɛ balaŋ benaŋ gyaŋ yaa mee kpila neŋ nɛ nafɔ baa tei neŋ. 7Mɔna Iseraetena bɛɛ gyae baa tei neŋ ya, nawolo nyi bɔɔ ne gyae baa tei maŋ ya, lee keŋ Iseraetena pou be bake be konɔɔse te bɔɔ besena be wɛle tee maŋ dɔɔ. 8Mɔna maa yela n sia ke yɛɛ doŋ na n konɔɔ ke yɛɛ yuŋ ŋgba baŋ nɛ. 9Maa yɛɛ n tirinɔɔ ŋgba boe keŋ ke dana doŋ nɛ, gyae ke yɛɛ doŋ kela boe keŋ kɛɛ bee nɛ. Doo nyi be dana deŋeledoŋ, mɔna naa yee wɔ yaa baa ŋmaase neŋ ya.>>

10Te ɔ yako maŋ nyiaa, <Deniwalaŋ bu, tei nideli na n ka mo nombia ŋan pou maa yako neŋ nɛ do n nyeeman. 11Nɛnɛɛ gyu n balaŋ baŋ be kyaa gbeŋiri man nɛ gyaŋ na n ke yako wɔ nyiaa, <<Nnɛ yaa Degbeŋgyoo Doŋ Pou Nyee ne yako, Be tei o yaa ba te tei ya o.>

12Botɔɔ te Feliŋ ŋon gate maŋ adido, te me nyii woya dinaana ŋaale me wɔle debaŋ keŋ Degbeŋgyoo gyoorobiiri keŋ ba koro lee botɔɔ keŋ ka seŋɛɛ nɛ. 13Ŋe yɛɛ wonembia baŋ beŋkelɛɛ ŋan ŋɛɛ gyɔ dɔŋa, na naawɔ anefiileŋ ŋan doo ba yenaase nɛ kewii, ke yɛɛ woya dinaana kewii ke. 14Feliŋ ŋon gate maŋ te ɔ moo maŋ laŋ, te me gyuuwɔ weeleŋ na baŋ man, na Degbeŋgyoo nyiŋmaa nedoŋ keŋ gyakaa me dɔɔ. 15Te me kɔŋa gbeŋa baŋ be kyaa Tele Afife benaana Boo Kebare nɛ gyaŋ. Me kyaawɔ be man weeya nyetooro, te ma wose gbirisi maŋ nideli.

Hɛsekiɛle tom keyɛɛ ŋgba gyeere nɛ

16Weeya nyetooro ŋan kelii nɛ, te Degbeŋgyoo yako man nyiaa, 17<Deniwalaŋ bu, ma te yɛɛ neŋ gyeere fa Iseraetena, mena dɔɔ nyii nombii keŋ mɛɛ yako nɛ, na n ke faree wɔ fa maŋ. 18Akpaa me yako akpanyanyaŋte nyi, <N ka yeŋ bo>> te n te faree e yaa yako e na waa lee ɔ gbɛɛneŋ kumɛɛ dɔɔ na n ke lɛɛ ɔ nyee ya nɛ, mena dukum yɛɛre ŋonan waa yeŋ ɔ dukum man, mɔna maa bɔɔse ɔ fatabo akɔntaa lee n gyaŋ. 19Mɔna akpaa n faree akpanyanyaŋte te ɔ te kyɛɛkee lee wa akpanyanyaŋ man yaa ɔ gbɛɛneŋ kumɛɛ dɔɔ ya nɛ, waa yeŋ lee ɔ dukum dɔɔ, mɔna nyaŋ te lɛɛ n nyee.

20Mena mɔ te akpaa ŋon ɔ tenɛɛ da lee ɔ katenee man te ɔ yɛɛ dukum, te ma mo kolo tɔ ɔ gbɛɛ na, waa yeŋ. Lee keŋ n te faree e ya dɔɔ, waa yeŋ lee ɔ dukum dɔɔ. Bɔɔ gyae baa tekaa tɔɔse abɔɔ ŋan tenɛɛ ɔtenate be yɛɛ nɛ ya, te maa bɔɔse ɔ fatabo akɔntaa lee n gyaŋ. 21Mɔ nyi akpaa n faree ŋon ɔ tenɛɛ nyi ɔ naa yɛɛ dukum ya, te ɔ te yɛɛ dukum ya na, waa nyiŋ nyeedoŋ nawolo nyi ɔ te nyii kefaree keŋ, te nyaŋ n ke lɛɛ nyaŋ gbagba n nyee.>

22Degbeŋgyoo nyiŋmaa gyakaa me dɔɔ botɔɔ, te ɔ yako maŋ nyiaa, <Koro na n ke gyu detaŋgya man, na maa kolosina neŋ botɔɔ.> 23Mena dɔɔ ma korowɔ te me gyuu detaŋgya keŋ man. Na Degbeŋgyoo gyoorobiiri seŋɛɛ botɔɔ, ŋgba gyoorobiiri keŋ mɔɔ naa Boo Kabare gyaŋ nɛ, te me tisiwɔ mo me sia buŋ tɛɛle man.

24Botɔɔ te Feliŋ ŋon kaa gyoowɔ me maŋ te ɔ gate maŋ seŋ me naawɔ dɔɔ. Ɔ yakowɔ nyiaa, <Gyu ke tɔ n wose do n deni man. 25Te nyaŋ, Deniwalaŋ bu, baa mo ŋmeeseŋ bake neŋ, baa bake neŋ keŋ n be tale lee gyu balaŋ baŋ man ya. 26Maa yela n laakem ke mataa kyaŋ n nɔɔ na n ke yɛɛ yididi na n be tale kalana wɔ ya, nawolo nyi be yɛɛ deŋeledoŋtenawɔ. 27Mɔna, akpaa me kolosina neŋ na, maa gyuusu n nɔɔ na n ke kolosina wɔ nyiaa, <<Nnɛ yaa Degbeŋgyoo Doŋ Pou Nyee ne yako,>> Ɔkamasɛ ŋon waa tei na, yela waa tei, te ɔkamasɛ ŋon waa bɛɛ nyi ɔ be tei ya na, waa bɛɛ, nawolo nyi be yɛɛ deŋeledoŋtenawɔ.