Hɛsekiɛle 2

Wurubuarɛ kebaake Hɛsekiɛle ŋgba gbalare nɛ

1Degbeŋgyoo yako maŋ nyiaa, <Deniwalaŋ bu, koro seŋ n naawɔ dɔɔ na maa kolosina neŋ> 2Ɔ kɛɛ kolosina maŋ nɛ, feliŋ ŋon kaa gyoowɔ me man te ɔ gate maŋ seŋ, te me nyiiwɔ ɔ ne kolosina maŋ.

3Ɔ yakowɔ nyiaa, <Deniwalaŋ bu, mee kpila neŋ Iseraetena gyaŋ, tɛɛle deŋeledoŋte ŋon ɔ be yɛɛ deŋeledoŋ tia maŋ nɛ gyaŋ. Baŋ na be naanaɔ ta besena be nimboo tee maŋ kaalii naŋ gyɛŋ kei. 4Balaŋ baŋ mee kpila neŋ be gyaŋ nɛ yɛɛ balaŋ baŋ bɔɔ ne nyii dei ya te be dana konɔɔyuŋ. Yako wɔ nyiaa, <<Nnɛ yaa Degbeŋgyoo Doŋ Pou Nyee ne yako.>> 5Be tei o, ba te tei ya o, baa gyeŋ nyi be kpila gbalare ŋolo kɔŋ be gyaŋ, nawolo nyi be yɛɛ deŋeledoŋtenawɔ. 6Te nyaŋ deniwalaŋ bu, naa yee wɔ yaa be nombia ya. Naa yee ya, doo nyi kpalamse na kpaŋkpaŋkorolose te kilisi neŋ pou, te n kyaa kanase man. Naa yee keŋ baa yako yaa baa ŋmaase neŋ ya nawolo nyi be yɛɛ deŋeledoŋtenawɔ. 7Baa tei o, yaa bɔɔ tei ya o, kaboena nyi nyaa yako me nombia ŋan fa wɔ, nawolo nyi be yɛɛ deŋeledoŋtenawɔ. 8Mɔna, nyaŋ deniwalaŋ bu, tei keŋ mɛɛ yako neŋ nɛ. Naa yɛɛ deŋeledoŋ ŋgba mena deŋeledoŋtena benaŋ nɛ ya. Gyuusu n nɔɔ na n ke di keŋ maa fa neŋ nɛ.>

9Botɔɔ te me kɛɛwɔ, te me naa nyiŋmaa keŋ kɔɔ tenee kɔŋ me gyaŋ, na ke dana tɔne keŋ bɔɔ bɔ ke nɛ, 10te ɔ fɛlɛɛ ke me siaman. Na ba te ŋmarase katoroŋ na waraŋsa na laako nombia do ke sia na ke wɔle.