Hɛsekiɛle 1

Wurubuarɛ kalese abɔɔ wola Hɛsekiɛle

1Kulutooneŋ sao na kufute ŋon ɔ gyaalaŋna banaarate ŋon weeya anoŋte ŋon man keŋ me kyaa kpuna baŋ bɔɔ yoo kyaŋ gyu gbeŋiri man te be kyaa Kebare boo gyaŋ nɛ, adido torowɔ te Wurubuarɛ lese abɔɔ wola maŋ.

2Kulutooneŋ anoŋte ŋon ɔ gyaalaŋ weeya anoŋte keŋ gyoo Yehoyakyin ŋon bɔɔ yoo kyaŋ gyu gbeŋiri man nɛ, 3Degbeŋgyoo yako sae Hɛsekiɛle, ŋon ɔ kya yɛna Busi, te ɔ kyaa Kebare boo gyaŋ Babilɔn tɛɛle man nɛ. Botɔɔ te Degbeŋgyoo moo ɔ nyiŋmaa gyakaa ɔ dɔɔ.

4Me kɛɛwɔ te me naa feliŋ dinaa daale ta lee ado yenaŋ na keŋmaŋee keŋ be kilisi ŋɔma tuum nɛ ne kɔŋ. Boalaŋ keŋ nsana wɔɛ ŋgba nyeele keŋ boalaŋ be yase ke nɛ. 5te me naa abɔɔ ŋaale ŋgba wonembia banaara nɛ boalaŋ keŋ man. Be wɔɛ ŋgba walaŋ nɛ, 6mɔna be man ɔkamasɛ dana siagbɛɛ anaara na beŋkelɛɛ anaara. 7Be naawɔɔ tenɛɛ. Be naawɔɔ wɔɛ ŋgba nunkyue bu wui nɛ te ŋɛɛ ŋalakee ŋgba kɔbere keŋ kɛɛ ŋalakee nɛ. 8Be banaara baŋ man ɔ kamasɛ dana walaŋ nyiŋmaase ɔ beŋkelɛɛ anaara ŋan ateta. Be banaara pou dana siagbɛɛ na beŋkelɛɛ. 9Te be man ɔkamasɛ beŋkelɛɛ ne tina ɔ dɔɔ wui. Be man ɔkamasɛ ne gyu ɔ siaman teeŋ, te bee gyu na bɔɔ ne gɛɛse kɛɛ ya.

10Nnɛ yaa be siagbɛɛ wɔɛ, be banaara dana walaŋ siagbɛɛ, te ɔkamasɛ dana dinaate siagbɛɛ ɔ dunoluŋ dɔɔ na nunkyue baale siagbɛɛ ɔ demena dɔɔ te be man ɔkamasɛ mɔ dana otoloku siagbɛɛ. 11Mena te be siagbɛɛ wɔɛ. Be man ɔkamasɛ dana beŋkelɛɛ ala te be fɛlɛɛ ŋa gyu adido, keŋ ɔkamasɛ beŋkeli ne tina ɔ dɔɔ ŋon ɔ seŋɛɛ ɔ gyaŋ nɛ wui, te ba moo beŋkelɛɛ ala ŋan mɔ wuu ba wose. 12Be man ɔkamasɛ dɔŋɛɛ bee gyuu tee. Botɔɔ keŋ feliŋ ŋon waa gyu na, bee gyu keŋ bɔɔ gɛɛse kɛɛ ya. 13Wonembia baŋ dinɔɔ wɔɛ ŋgba boalaŋ nyewalaŋ, yaa ŋgba kefulu nɛ. Boalaŋ keŋ dɔŋ wonembia baŋ man sia na wɔle, te kɛɛ ŋalakee, te keŋmaale na lee ke man. 14Wonembia baŋ ne yeu gyu sia na wɔle wɔle ŋgba keŋmaale nɛ.

15Me ke kɛɛ wonembia baŋ na, me naa naawɔɔ anefiileŋ tɛɛleman doo wonembia baŋ be dana siagbɛɛ anaara nɛ ɔkamasɛ gyaŋ. 16Nnɛ te naawɔɔ anefiileŋ ŋan wɔɛ na mena keŋ bɔɔ yɛɛ ŋa. Ŋɛɛ ŋalakee ŋgba boe kpaakpaate keŋ bɛɛ baake ke nyi topase nɛ, te ŋa anaara pou lee dɔŋa bo. Nae anefiileŋ kamasɛ wɔɛ ŋgba be yɛɛ ke bo do kedɔɔ nae anefiileŋ man nɛ. 17Ŋe dɔŋ na ŋɛɛ moo gbɛɛ keŋ man wonembia baŋ ba mo be sia tee nɛ. Naawɔɔ anefiileŋ ŋan te kyɛɛkee ŋe gbɛɛ ya. 18Ŋa nyeela anefiileŋ ŋan korɛɛ te ŋe dana gyakoloŋ, te nyeela anefiileŋ anaara ŋan pou dana sia kilisi ŋa.

19Akpaa wonembia baŋ dɔŋ na, naawɔɔ anefiileŋ ŋan mɔ dɔŋ, te akpaa wonembia baŋ de furufu lee tɛɛle man na, naawɔɔ anefiileŋ ŋan mɔ na koro adido. 20Botɔɔ keŋ feliŋ ŋon waa gyu na, baŋ mɔ ne gyuu na naawɔɔ anefiileŋ ŋan ta koro kpuna wɔ, nawolo nyi wonembia baŋ feliŋ doo naawɔɔ anefiileŋ ŋan man. 21Akpaa wonembia baŋ dɔŋ na, ŋan mɔ dɔŋ, akpaa wonembia baŋ da sem na ŋan mɔ ta sem, te wonembia baŋ de furufu gyu adido na, ŋan mɔ ta koro adido, nawolo nyi wonembia baŋ feliŋ doo naawɔ anefiileŋ ŋan man.

22Te kolo ŋgba ŋɔma nɛ fɛlɛɛwɔ wuu wonembia baŋ, te ne ŋalakee ŋgba diiku keŋ ke dana koyadoŋ te ke dana gyakoloŋ nɛ. 23Ba te fɛlɛɛ be beŋkelɛɛ dokoloŋ tee dɔŋa ŋɔma keŋ ateta, te ɔkamasɛ dana beŋkelɛɛ ala ala keŋ be wuu ɔ wose, 24Akpaa wonembia baŋ de furufu na, mee nyii be beŋkelɛɛ ŋan ne wii ŋgba booneŋ ŋan ŋɔɔ wuu kemuusu nɛ, ŋgba Dekpataakpere kewii nɛ. Ba sem na ba te tisita be beŋkelɛɛ ŋan.

25Be ka seŋ tisina be beŋkelɛɛ te me nyii woya ŋaale lee ŋɔma ŋan wuɛ be dɔɔ nɛ adido. 26Ŋɔma ŋan ŋɔɔ fɛlɛɛ wuu ba nyeeya dɔɔ adido nɛ, wɔɛ ŋgba gyoorogbeli keŋ bɔɔ mo boya koyadoŋ nyiŋan ŋan bɛɛ baake nyi Lapise lasuli yae nɛ. Te kolo ŋgba walaŋ nɛ kyaa gyoorogbeli keŋ dɔɔ adido. 27Me naa kolo lee ɔ teŋa man mo gyeŋ, keŋ wɔɛ ŋgba nyeele keŋ kɛɛ ŋalakee boalaŋ man nɛ, te lee botɔɔ mo kɔŋ wa ateta wɔɛ ŋgba boalaŋ na keŋmaŋee ne ŋalakee kilisi e nɛ. 28Keŋalakee keŋ be kilisi e nɛ, wɔɛ ŋgba mena keŋ okyimaale na lee ŋɔma man ɔga wee nɛ.

Kei yɛna mena keŋ Degbeŋgyoo ba lese ɔ gyoorobiiri wola. Ma ke naa ke nɛ, me tisiwɔ mo me sia buŋ tɛɛle man, na mee nyii woya ŋaale kolosi.