Hɛsekiɛle 10

Wurubuarɛ gyoorobiiri ta lee ɔsom deni dinaa keŋ man

1Me kɛɛwɔ te me naa kolo ŋgba lapise lasuli gyoorogbeli nɛ, ŋɔma ŋan wuɛ kerubise baŋ nyeeya dɔɔ nɛ adido. 2Keŋte Degbeŋgyoo yako balee ŋon ɔ doona akaralɛɛ kegba keŋ nɛ nyiaa, <Gyoo naawɔɔ anefiileŋ ŋan doo kerubise baŋ ateta nɛ nsana. Lese boalaŋ na nyewalaŋ lee kerubise baŋ nsana wulu n nyiŋmaase, na n ka mo ŋa ŋmatee donɔɔ dinaa keŋ man.> Me kɛɛna e te ɔ gyoowɔ.

3Na kerubise baŋ seŋɛɛ ɔsom deni dinaa keŋ atayenaŋ, debaŋ keŋ balee ŋon ba gyoo nɛ, te debuŋta kaa lɛɛ dekpaŋalaŋ tɔɔmante keŋ man pou. 4Keŋte Degbeŋgyoo gyoorobiiri korowɔ lee kerubise baŋ dɔɔ gyu ɔsom deni dinaa keŋ denaanɔɔ man. Debuŋta keŋ lɛɛ ɔsom deni dinaa keŋ man pou, te Degbeŋgyoo gyoorobiiri keŋalakee lɛɛ dekpaŋalaŋ keŋ pou. 5Kerubise baŋ beŋkelɛɛ yeesa ne liinaŋ dekpaŋalaŋ keŋ debɔɔ man, ŋgba Wurubuarɛ Dekpataakpere kekolosi woya nɛ.

6Degbeŋgyoo ke faedo balee ŋon ɔ doona akaralɛɛ kegba keŋ nyi, <Gyu ka lese boalaŋ lee naawɔɔ anefiileŋ ŋan na kerubise baŋ nsana nɛ, balee ŋon gyuuwɔ ka seŋ nae anefiileŋ keŋ daale gyaŋ. 7Botɔɔ te kerubi ŋolo tenee ɔ nyiŋmaa gyu boalaŋ keŋ doo ba nsana nɛ gyaŋ. Ɔ lese nyewalaŋ ŋan ŋaale te ɔ moowɔ do balee ŋon ɔ doona akaralɛɛ kegba keŋ nɛ nyiŋmaase man. Ɔ lɛɛ ke te ɔ leewɔ laŋ. 8(Kolo doo kerubise baŋ ateta ŋgba walaŋ nyiŋmaase nɛ.)

9Me kɛɛwɔ, te me naa naawɔɔ anefiileŋ anaara kerubise baŋ yenaŋ, dokoloŋ doo kerubi kamasɛ yenaŋ. Naawɔɔ ŋan ne ŋalakee ŋgba topase nɛ. 10Naawɔɔ anefiileŋ anaara ŋan pou lee dɔŋa bo. Dekamasɛ wɔɛ ŋgba be yɛɛ ke bo do kedɔɔ nae anefiileŋ man nɛ. 11Nyi ŋee gyu na, ŋe dɔŋ bo yenaŋse anaara ŋan dokoloŋ man botɔɔ keŋ kerubise baŋ sia teena nɛ. Yenaŋ kamasɛ keŋ kerubise baŋ da mo ba nyee baŋ na, ŋe dɔŋ bo botɔɔ te ŋe bɛɛ besena ya. 12Sia te wulu ba wose pou, be maamase na be nyiŋmaase na be beŋkelɛɛ, ŋgba mena keŋ be wulu be naawɔɔ anefiileŋ anaara ŋan nɛ. 13Me nyiiwɔ be baake naawɔɔ anefiileŋ ŋan nyi, <koloŋoloŋ naawɔɔ anefiileŋ.> 14Kerubise baŋ kamasɛ dana siagbɛɛ anaara. Gyaŋgbate keŋ yɛɛ kerubi siagbɛɛ, alate keŋ yɛɛ deniwalaŋ siagbɛɛ, atoorote keŋ yɛɛ dinaate siagbɛɛ te anaarate keŋ yɛɛ otoloku siagbɛɛ.

15Botɔɔ te kerubise baŋ korowɔ adido. Baŋ yɛna wonembia baŋ mɔɔ naa Kebare boo nɔɔman nɛ. 16Akpaa kerubise baŋ ne tɛɛ na, naawɔɔ anefiileŋ ŋan doo ba yenaase nɛ mɔ ne tɛɛ, te akpaa kerubise baŋ de fɛlɛɛ be beŋkelɛɛ nyi baa furufu na, naawɔɔ anefiileŋ ŋan bɛɛ lee ba yenaase ya. 17Akpaa kerubise baŋ da sem na, ŋan mɔ ta sem, te akpaa kerubise baŋ da koro adido na ŋan mɔ ta koro kpuna wɔ. Nawolo nyi wonembia baŋ feliŋ doo bo ŋe man.

18Keŋte Degbeŋgyoo gyoorobiiri keŋ leewɔ ɔsom deni dinaa keŋ denaanɔɔ man, te gyuuwɔ ka seŋ kerubise baŋ adido. 19Me ka seŋ mɛɛ kɛɛ nɛ, kerubise baŋ fɛlɛɛ be beŋkelɛɛ te ba korowɔ lee tɛɛle man, bee gyu na naawɔɔ anefiileŋ ŋan mɔ kpuɛna wɔ. Be ka seŋawɔ Degbeŋgyoo ɔsom deni dinaa keŋ weese dɛɛlee denaanɔɔ keŋ nɔɔman, na Iserae Wurubuarɛ ŋon gyoorobiiri gyakaa ba adido.

20Kɛwɔ yɛna wonembia baŋ mɔɔ naa Iserae Wurubuarɛ tɛɛ Kebare boo nɔɔman, te ma gyeŋawɔ nyi be yɛɛ kerubisewɔ. 21Ɔkamasɛ dana siagbɛɛ anaara na beŋkelɛɛ anaara, te kolo ŋgba walaŋ nyiŋmaase nɛ doo be beŋkelɛɛ ŋan ateta. 22Be siagbɛɛ betaa wɔɛ ŋgba baŋ mɔɔ naa Kebare boo nɔɔman nɛ. Ɔkamasɛ gyuu ɔ siaman teeŋ.