Hɛsekiɛle 11

Wurubuarɛ nombia kedi Yerusalɛm dɔɔ

1Keŋte Feliŋ ŋon gate maŋ adido te ɔ moo maŋ kɔŋ Degbeŋgyoo dekpaŋalaŋ denaanɔɔ keŋ teena weese dɛɛlee nɛ. Baala sao banoŋ seŋɛɛ denaanɔɔ keŋ nɔɔman, na Asure bu Yaasaniya na Benaiya bu Pelatiya baŋ be yɛɛ donɔɔ keŋ siamantenawɔ nɛ kpuɛ be man. 2Te Degbeŋgyoo yako maŋ nyiaa, <Deniwalaŋ bu, kɛwɔ yɛna balaŋ baŋ bɛɛ mo agyueŋkumɛɛ te bɛɛ wola balaŋ akpanyanyaŋ nombia keyɛɛ donɔɔ dinaa keŋ man nɛ. 3Bɛɛ yako nyiaa, <<Na weeya ala kɛŋa yaa de desina da akpaŋalaŋse baŋee yee? Donɔɔ dinaa keŋ yɛna Saabu keŋ, te daa yɛna naane keŋ doo ke man.>> 4Mena dɔɔ gbala tia wɔ. Deniwalaŋ bu, gbala.>

5Keŋte Degbeŋgyoo Feliŋ kaa gyoowɔ me man, te ɔ yako maŋ nyi maa yako nyiaa, <Nnɛ yaa Degbeŋgyoo ne yako, mena nombii kei yaa ɛmɛɛ Iserae kegyiise ne yako. Mɔna ma gyeŋ ŋan pou doo ya nyeempɔ man. 6Ɛ ta koe balaŋ burum donɔɔ dinaa kei man, te ɛ yelaa ba woya wulu ka abɔnterese man.

7<Mena dɔɔ nnɛ yaa Degbeŋgyoo Doŋ Pou Nyee ne yako, woya baŋ ɛ be fuŋii lɔ botɔɔ nɛ yɛna naane keŋ, te donɔɔ dinaa kei yɛna saabu keŋ, mɔna maa gegi ŋon lee ke man. 8Ɛ ne yee yoosila, te yoosila te maa mo kɔŋ ɛ dɔɔ. Degbeŋgyoo Doŋ Pou Nyee torola yako. 9Maa gegi ŋon lee donɔɔ dinaa keŋ man na maa mo ŋon do ŋɔɔla nyiŋmaa man na maa wɔŋ ɛ deŋele. 10Ɛ ke yala yoosila nɔɔman, na maa di ɛ nombia Iserae wuluse man. Botɔɔ te ɛ ka gyeŋ nyi maŋ yɛna Degbeŋgyoo. 11Donɔɔ dinaa kei be gyae ke yɛɛ ɛ saabu ya, yaa ɛmɛɛ ke yɛɛ naane ke man ya. Maa di ɛ nombia Iserae wuluse man. 12Na ɛ ka gyeŋ nyi maŋ yɛna Degbeŋgyoo, nawolo nyi ɛ te di me kawolase na maŋ mmaraase dɔɔ ya, mɔna ɛ ta mo ɛ wose do tɛɛlese ŋan be kilisi ŋon nɛ ayɛɛsa man.>

13Te me kɛɛ gbale nɛ, Benaiya bu Pelatiya yeŋawɔ. Keŋte me tisiwɔ doo mo me sia buŋ tɛɛle man te me lɔɔ nɔɔ wii keŋkeŋ nyiaa, <Ao Degbeŋgyoo Doŋ Pou Nyee, nyaŋ ke wɔlɛɛ Iserae akaŋ baŋ kerekere?>

Keyakosee lee Iserae kabese kɔŋ wose man

14Keŋte Degbeŋgyoo yako maŋ nyiaa, 15Deniwalaŋ bu, Yerusalɛmtena ne kolosi lee n tebia baŋ bɔɔ kyaŋ wɔ gyu yoogbeŋiri man, na Iseraetena akaŋ baŋ wose man nyiaa,<<Be kyaa lemlem lee Degbeŋgyoo gyaŋ. Daa te ba moo tɛɛle kei fa nyi ke dɛɛ bese de wui.>>

16Mena dɔɔ yako nyi, <<Nnɛ yaa Degbeŋgyoo Doŋ Pou Nyee ne yako, doo nyi ma te gegi ŋon gyu tɛɛlese lemlem man, te me yaasee wɔ do donɔɔse man koraŋ nɛ, mɔna ma bese fereŋkyeŋ fa wɔ debaŋ kyomii daale donɔɔse ŋan man bɔɔ gyu nɛ.>>

17Mena dɔɔ yako nyi, <<Nnɛ yaa Degbeŋgyoo Doŋ Pou Nyee ne yako, Maa yilaa ŋon lee tɛɛlese ŋan man, na maa besena ŋon lee donɔɔse ŋan man mɔɔ yaasee ŋon gyu nɛ man kɔŋ, na maa besena Iserae tɛɛle fa ŋon bela.>>

18Baa bese kɔŋ ke man na baa lese duwaare dinɔɔse na bɛɛneŋ anekɔlaŋ baŋ lee ke man. 19Maa fa wɔ konɔɔ dokoloŋ, na maa mo me Feliŋ wɔle do be man. Maa lese konɔɔyuŋ lee be man na maa fa wɔ konɔɔ keŋ ka woɛ. 20Kenaŋ na baa di me kawolase na maŋ mmaraase dɔɔ nideli. Baa yɛɛ me balaŋ, na maa yɛɛ be Wurubuarɛ. 21Mɔna baŋ be konɔɔse doo be duwaare dinɔɔse na bɛɛneŋ anekɔlaŋ baŋ dɔɔ nɛ, maa yela ba ayɛɛsa ke busaana baŋ gbagba. Degbeŋgyoo Doŋ Pou Nyee torola yako.>>

22Botɔɔ te Kerubise baŋ na naawɔɔ anefiileŋ ŋan doo ba yenaase nɛ, fɛlɛɛ be beŋkelɛɛ na Iserae Wurubuarɛ gyoorobiiri keŋ doo ba adido. 23Degbeŋgyoo gyoorobiiri keŋ korowɔ lee donɔɔ dinaa keŋ man gyu ka seŋ bula keŋ doo weese dɛɛlee nɛ adido. 24Feliŋ ŋon gate maŋ adido te ɔ moo maŋ kɔŋ baŋ bɔɔ yoo kyaŋ wɔ gyu yoogbeŋiri man Babilɔn nɛ gyaŋ.

Botɔɔ te kalesewola keŋ leewɔ me man, 25te me yako baŋ bɔɔ yoo kyaŋ wɔ gyu yoogbeŋiri man kpene kamasɛ keŋ Degbeŋgyoo ba lese wola maŋ nɛ.