Hɛsekiɛle 12

Yoogbeŋiri man kegyu kagyene

1Degbeŋgyoo yako maŋ nyiaa, 2<Deniwalaŋ bu, n kyaa balaŋ baŋ be yɛɛ deŋeledoŋtenawɔ nɛ man. Be dana sia baa naa, mɔna bɔɔ ne naa ya. Be dana deŋela baa nyii mɔna bɔɔ ne nyii ya. Nawolo nyi be yɛɛ deŋeledoŋtenawɔ.

3<Mena dɔɔ deniwalaŋ bu, wee man na gelee nya abɔɔ na n ke gyu yoogbeŋiri man keŋ be kɛɛna neŋ. Koro lee botɔɔ keŋ n kyaa nɛ gyu yenaŋ wɔle. Doo nyi be yɛɛ deŋeledoŋtenawɔ koraŋ nɛ, mberem na baa nyii ke man. 4Wee man keŋ be kɛɛna neŋ nɛ, kuu nya abɔɔ ŋan n ka mo gyu yoogbeŋiri man lee debɔɔ. Ke balinɔɔ keŋ be kɛɛna neŋ nɛ, lee ŋgba baŋ bee gyu yoogbeŋiri man nɛ. 5Be siaman nɛ, lii dekyaŋ keŋ bɔɔ na n ka mo nya abɔɔ mo ke man lee. 6Mo ŋa gyakaa n degbaŋgbaŋ dɔɔ be siaman, na n ka mo ŋa lee tɛɛ kee biri man. Mo kolo wuu n sia na n be nyiŋ naa tɛɛle keŋ ya, nawolo nyi me ta mo neŋ yɛɛ kagyene fa Iseraetena.>

7Mena dɔɔ me yɛɛwɔ ŋgba mena keŋ bɔɔ yako maŋ nɛ. Wee man nɛ me gelee ma abɔɔ ŋan maa mo gyu yoogbeŋiri man nɛ lee debɔɔ. Balinɔɔ nɛ ma moo me nyiŋmaase lii bɔɔ dekyaŋ keŋ man. Tɛɛ kee biri nɛ ma moo ma abɔɔ lee, na ŋe gyakaa ma degbaŋgbaŋse dɔɔ na be kɛɛna maŋ.

8Nebo nɛ, Degbeŋgyoo bɔɔse maŋ nyiaa, 9<Deniwalaŋ bu, Iseraetena deŋeledoŋtena baŋ te bɔɔse neŋ nyi, <Woŋ yaa n ne yɛɛ yee?>>

10<Yako wɔ nyiaa, <<Nnɛ yaa Degbeŋgyoo Doŋ Pou Nyee ne yako, mena gbale kei ne gyu fa siamante ŋon ɔ kyaa Yerusalɛm, na Iseraetena baŋ pou be kyaa botɔɔ nɛ.>> 11Yako wɔ nyiaa, <<Me yɛɛ kagyene ke fa ŋon.>>

<Mena keŋ mɔɔ yɛɛ nɛ, mena te baa yɛɛ fa wɔ. Baa gyu yoogbeŋiri man ŋgba baŋ bɔɔ yoo kyaŋ wɔ nɛ.

12Tɛɛ de biri nɛ, siamante ŋon ɔ kyaa be man nɛ waa mo wa abɔɔ gyakaa ɔ degbaŋgbaŋ dɔɔ na waa mo gbɛɛ, baa lii bɔɔ dekyaŋ keŋ man fa e na waa mo ke man lee. Waa mo kolo wuu ɔ siagbɛɛ na ɔ be nyiŋ naa tɛɛle keŋ ya. 13Maa fɛlɛɛ ma asawu fa e na maa kyaŋ e me kɔta man. Maa mo e kɔŋ Babilɔn keŋ yɛɛ Kalediyatena tɛɛle nɛ man, mɔna ɔ be gyae waa naa ke ya, na waa yeŋ botɔɔ. 14Maa yaasee baŋ pou bɔɔ kilisi e, ɔ kegyiise na ɔ yoonɔɔtena pou gyu yenaŋ kamasɛ, na maa wɔŋ me yoosila kuu gyakaa be dɔɔ.

15<Nyi akpaa me kpala wɔ do tɛɛlese man te me yaasee wɔ do donɔɔse man nɛ, botɔɔ te baa gyeŋ nyi maŋ yɛna Degbeŋgyoo. 16Mɔna maa lese be man kyomii lee yoosila na tanam keyala na kaweekum man, na baa nyiŋ gyeŋ ba ayɛɛsa anekɔlaŋ tɛɛlese ŋan pou man baa gyu nɛ. Botɔɔ te baa gyeŋ nyi maŋ yɛɛna Degbeŋgyoo.>

17Degbeŋgyoo yako maŋ nyiaa, 18Deniwalaŋ bu, mo keseree di n weenɛɛ, na n ka mo gyakoloŋ nyɔɔ n loŋ. 19Yako tɛɛle keŋ dɔɔ balaŋ nyiaa, <<Nnɛ yaa Degbeŋgyoo Doŋ Pou Nyee ne yako lee baŋ be kyaa Yerusalɛm na Iserae tɛɛle man nɛ wose man. Baa mo kayeyɛɛ di be weenɛɛ na baa mo wose ketekerii nyɔɔ ba loŋ. Nawolo nyi baa kuu abɔɔ ŋan pou doo be tɛɛle keŋ man, lee baŋ be kyaa ke dɔɔ nɛ nombia akaraŋkaraŋ dɔɔ. 20Donɔɔse ŋan man balaŋ be kyaa kaalaŋ nɛ, gyae ka bese donɔɔse ŋan balaŋ be kyaa ŋe man ya, na ŋa ke doo yakaa. Botɔɔ te ɛ ka gyeŋ nyi maŋ yɛna Degbeŋgyoo.

Be gyae kedɔɔ wɔle ya

21Degbeŋgyoo yako maŋ nyiaa, 22<Deniwalaŋ bu, dudu woŋti yaa kei, keŋ ɛ ne gyɔɔ Iserae tɛɛle man nyi, <<Weeya ŋan ne lam, te keŋ bɛɛ lese wola nɛ bɛɛ kɔŋ mena ya>>? 23Yako wɔ nyi, <<Nnɛ yaa Degbeŋgyoo Doŋ Pou Nyee ne yako. Maa yela dudu kei kegyɔ kekɔŋ ɔto, te bɔɔ tekaa gyɔ ke Iserae ya.>> Yako wɔ nyi, <<Weeya ŋan ta benaa keŋ nombia ŋan bɛɛ lese wola nɛ gyae kekɔŋ mena. 24Nawolo nyi akɛrɛɛ nombia kena, na akɛrɛɛ gbale ba tekaa kyaa Iseraetena man bela ya. 25Mɔna maŋ Degbeŋgyoo maa yako nombii keŋ mɛɛ gyae maa yako, te ke gyae ke kɔŋ mena debokenaŋ man. Nawolo nyi ɛmɛɛ deŋeledoŋtena kɛwɔ debaŋ man, te maa yela kpene kamasɛ keŋ mɔɔ yako nɛ kekɔŋ mena. Degbeŋgyoo Doŋ Pou Nyee torola yako.>> >

26Degbeŋgyoo yako maŋ nyiaa, 27Deniwalaŋ bu, Iseraetena ne yako nyi, nombia ŋan bɔɔ lese wola nɛ yɛɛ kulutooneŋ burum ŋaale wɔle nombia ŋa, te ɔ ne gbala wee daale nombia bo.>>

28<Mena dɔɔ yako wɔ nyiaa, <<Nnɛ yaa Degbeŋgyoo Doŋ Pou Nyee ne yako, me nombii daale ba tekaa dɔɔ wɔle bela ya, nombii kamasɛ keŋ me yako na gyae ke kɔŋ mena, Degbeŋgyoo Doŋ Pou Nyee torola yako.>> >