Hɛsekiɛle 13

Be ke bu akɛrɛɛ gbalara fɔɔ

1Degbeŋgyoo yako maŋ nyiaa, 2Deniwalaŋ bu, gbala tia Iserae gbalara baŋ bɛɛ gbale nɛnɛɛ nɛ. Yako baŋ bɛɛ mo baŋ gbagba nyeempɔ gbala nɛ nyiaa, <<Ɛ nyii Degbeŋgyoo nombii, 3Nnɛ yaa Degbeŋgyoo Doŋ Pou Nyee ne yako, Gbalara ayiŋtena baŋ ba te naa kolo ya, te bɛɛ kara nombia gbala nɛ baa laako! 4Ɛmɛɛ Iseraetena, ɛ gbalara yɛɛ ŋgba gbougbouse kyaala donɔɔ keŋ be yɛlɛɛ man nɛ. 5Ɛ ta gyem gyu ke desina kebɛɛlase ŋan doo akyaŋse ŋan man fa Iseraetena, na ŋa ke tale seŋ keŋkeŋ Degbeŋgyoo yoo wee keŋ ya. 6Keŋ be kpa bɔɔ naa nɛ yɛɛ akɛrɛɛ ŋa, te be gbale mɔ yɛɛ dekara ke. Doo nyi Degbeŋgyoo te kpila wɔ ya, mɔna bɛɛ yako nyi, <Degbeŋgyoo torola yako,> te bɛɛ kɛɛ gbɛɛ nyi waa yela be nombia ŋan ke kɔŋ mena. 7Na akɛrɛɛ kalesewola te ɛ naawɔ, te ɛ beowɔ gbala yako nyi, <Degbeŋgyoo torola yako,> lee keŋ ma te kolosi ya yee?

8< <<Mena dɔɔ nnɛ yaa Degbeŋgyoo Doŋ Pou Nyee ne yako, <<Lee ya akɛrɛɛ nombia na ya akɛrɛɛ kalesewola dɔɔ, mɛɛ seŋ tia ŋon, Degbeŋgyoo Doŋ Pou Nyee torola yako. 9Maa wɔŋ gbalara baŋ bɛɛ naa akɛrɛɛ nombia te bɛɛ gbala akɛrɛɛ gbale nɛ deŋela. Bɔɔ gyae baa kpu me balaŋ dɛɛgyaŋee man yaa baa ŋmarase ba yela do Iseraetena tɔna man yaa baa gyoo Iseraetena tɛɛle man ya. Botɔɔ te ɛ ka gyeŋ nyi maŋ yɛna Degbeŋgyoo Doŋ Pou Nyee.

10Nawolo nyi bee yele me balaŋ na yoo gbɛɛ na bɛɛ yako nyi, <Wosefɛɛreŋ kyaa,> mɔna wosefɛɛreŋ be kyaa ya, te akpaa balaŋ baŋ de ma dekyaŋ keŋ be taŋ doŋ ya na, baŋ ta mo akaloo gyilaa ke. 11Mena dɔɔ yako baŋ bɛɛ mo akaloo gyilaa ke nɛ nyi ke gyae ka lee yala. Ɔga dinaa waa ŋɛɛ na akpeleŋkpeleŋbia ke yala na feliŋkum ke gyɔ. 12Nyi akpaa akyaŋse ŋan de yale na, balaŋ be gyae baa bɔɔse ŋon nyi, <Nde akaloose ŋan ɛ ba mo gyilaa ŋa nɛ yee?>

13< <<Mena dɔɔ nnɛ yaa Degbeŋgyoo Doŋ Pou Nyee ne yako, <<Maa yela feliŋ dinaa ke gyɔ lee me baŋ nedoŋ dɔɔ, na maa yela ɔga ke ŋɛɛ na akpeleŋkpeleŋbia ke yala na ke wɔlɛɛ abɔɔ. 14Maa tekerii dekyaŋ keŋ ɛ ba mo akaloo gyilaa ke nɛ lɔ tɛɛle man kerekere, na ka mokɔɔ kasee ka lee debɔɔ. Nyi donɔɔ dinaa keŋ de yale na ɛmɛɛ mɔ ɛ ka yeŋ, na ɛ ka gyeŋ nyi maŋ yɛna Degbeŋgyoo. 15Mena te maa lese me baŋ nedoŋ tia dekyaŋ keŋ, na baŋ bɔɔ mo akaloo gyilaa ke nɛ. Maa yako ŋon nyiaa, <Dekyaŋ keŋ na baŋ bɔɔ mo akaloo gyilaa ke, 16na Iserae gbalara baŋ bɔɔ gbale lee Yerusalɛm wose man, te bɔɔ naa nombia nyi wosefɛɛreŋ kyaa, keŋ wosefɛɛreŋ be kyaa ya nɛ pou ba tekaa kyaa ya. Degbeŋgyoo Doŋ Pou Nyee torola yako.> >>

17<Nɛnɛɛ nyaŋ deniwalaŋ bu, kolosi tia n balaŋ baŋ bia alebia baŋ bɛɛ kara nombia gbala nɛ. Gbala tia wɔ, 18na n ke yako nyiaa, <<Nnɛ yaa Degbeŋgyoo Doŋ Pou Nyee ne yako, ala baŋ bɛɛ mo pɔɔlase kpaŋ be nyiŋmaase, te bɛɛ mo abɔɔ kpookpoo wuu ba nyeeya nyi baa mo nyɔɔ balaŋ kɔtase nɛ baa laako. Ɛ ke nyɔɔ me balaŋ kɔtase na ɛ ke tina ɛ ɛmɛɛ gbagba wui yela? 19Ɛ ta mo ayimɛɛ wuu maŋ me balaŋ siaman, lee aboŋ nyiŋmaatɔɔ na bodobodo yaaleŋ bia dɔɔ. Ɛ te di akɛrɛɛ fa balaŋ baŋ bee tei akɛrɛɛ nɛ, te ɛ koe baŋ tekaboena nyi baa yeŋ ya nɛ, te ɛ tinaa baŋ tekaboena nyi baa kyaa ya nɛ yela.

20Mena dɔɔ nnɛ yaa Degbeŋgyoo Doŋ Pou Nyee ne yako, <<Mɛɛ seŋ tia ɛ pɔɔlase ŋan ɛ na mo kyaŋ balaŋ ŋgba gyebuse nɛ, te maa tirii ŋa lee ɛ baameŋse man, na maa yela balaŋ baŋ ɛ be kyaŋ wɔ ŋgba gyebuse nɛ ke nyiŋ ba wose. 21Maa tirii abɔɔ ŋan ɛ ba mo wuu ɛ siagbɛɛ nɛ na maa lɛɛ me balaŋ lee ɛ nyiŋmaase man, keŋ bɔɔ tekaa doo ɛ tɛɛ ya. Botɔɔ ɛ ka gyeŋ nyi maŋ yɛna Degbeŋgyoo. 22Nawolo nyi ɛ ta mo akɛrɛɛ gbirisi baŋ ba tenɛɛ nɛ wose, keŋ maŋ te yele nombia ke takaa wɔ ya. Ɛ na do akpanyanyaŋtena kakyeŋ, nyi be naa kyɛɛkee lee be gbɛɛneŋ kumɛɛ man na baa lɛɛ ba nyee ya. 23Mena dɔɔ ɛ ba tekaa naa akɛrɛɛ nombia yaa ɛ ke gbala bela ya. Maa lɛɛ me balaŋ lee ɛ nyiŋmaa man. Botɔɔ te ɛ ka gyeŋ nyi maŋ yɛna Degbeŋgyoo.>> >