Hɛsekiɛle 14

Be ke bu bane somera fɔɔ

1Iserae kegyiise baŋ baale kɔŋawɔ me gyaŋ, te be tisiwɔ kyaa me siaman. 2Keŋte Degbeŋgyoo yako maŋ nyiaa, 3<Deniwalaŋ bu, baala kɛwɔ ta mo bɛɛneŋ ɔsom wulu be konɔɔse man, te ba moo akpanyanyaŋ keyɛɛ tɔ be siagbɛɛ. Kaboena nyi maa fa wɔ gbɛɛ na baa bɔɔse kolo lee me gyaŋ? 4Mena dɔɔ kolosina wɔ na n ke yako wɔ nyiaa,<<Nnɛ yaa Degbeŋgyoo Doŋ Pou Nyee ne yako, akpaa Iserae walaŋ kamasɛ ŋon waa mo bɛɛneŋ ɔsom do ɔ konɔɔ man, te ɔ mo akpanyanyaŋ keyɛɛ tɔ ɔ siagbɛɛ te ɔ gyu gbalare ŋolo gyaŋ nɛ, maŋ Degbeŋgyoo gbagba maa tiranɔɔ fa wɔ lee be bɛɛneŋ burum baŋ dɔɔ. 5Maa yɛɛ kei na maa mo besena Iseraetena baŋ bɔɔ bɛɛ maŋ gyu bɛɛneŋ gyaŋ nɛ nyeempɔse kɔŋ me gyaŋ.>>

6Mena dɔɔ yako Iseraetena nyi, <<Nnɛ yaa Degbeŋgyoo Doŋ Pou Nyee ne yako, Ɛ kyɛɛkee lee ɛ konɔɔse man! Ɛ lee ɛ bɛɛneŋ baŋ wɔle na ɛ ke bɛɛ ya ayɛɛsa anekɔlaŋ ŋan!

7< <<Akpaa Iserae walaŋ ŋolo yaa ŋɔɔle ŋon ɔ kyaa Iserae de wɔŋ ba wose lee me gyaŋ, te ba mo bɛɛneŋ ɔsom do be konɔɔse man te ba mo akpanyanyaŋ keyɛɛ tɔ be siagbɛɛ te be gyu gbalare ŋolo gyaŋ nyi be kaa bɔɔse kolo lee me gyaŋ nɛ, maŋ Degbeŋgyoo gbagba maa tiranɔɔ fa wɔ. 8Maa seŋ tia wɔ na maa mo wɔ na maa mo wɔ gyɔ dudu. Maa lese wɔ lee me balaŋ man. Botɔɔ te ɛ ka gyeŋ nyi maŋ yɛna Degbeŋgyoo.

9< <<Akpaa ba beo gbalare ŋolo nyi waa gbala nɛ, maŋ Degbeŋgyoo beona gbalare ŋonaŋ. Maa tenee me nyiŋmaa tia e na maa wɔlɛɛ e lee me balaŋ Iseraetena man. 10Be nombia gyae ke busaana wɔ, gbalare ŋon na ŋon ɔ be kɔŋ ɔ gyaŋ gbale nɛ baa di fɔɔ. 11Kenaŋ na Iseraetena ba tekaa yo gbɛɛ lee me gyaŋ, yaa baa mo be dukum do ba wose ayimɛɛ bela ya. Baa yɛɛ me balaŋ na maa yɛɛ be Wurubuarɛ, Degbeŋgyoo Doŋ Pou Nyee torola yako.>> >

Yerusalɛm nombia kedi

12Degbeŋgyoo yako maŋ nyiaa, 13<Deniwalaŋ bu, akpaa tɛɛle daale de yɛɛ dukum tia maŋ keŋ nyi ɔ te di anokoare fa maŋ ya, te ma tenee me nyiŋmaa nyi maa tɔ be weenɛɛ kenyiŋ gbɛɛ, te me yele tanam dinaa de yala wɔ, te ma koe be balaŋ na be wonembia, 14te akpaa de kɔŋ nyi baala batooro kɛwɔ, Nowa na Daniɛle na Yiobe kpuɛ be man koraŋ nɛ, be katenee gyae ke lɛɛ baŋ baageŋ nyee bo. Degbeŋgyoo Doŋ Pou Nyee torola ya.

15Yaa akpaa me kpila wonembia kumɛɛ tɛɛle kenaŋ man, te ba koe ke man balaŋ pou te ke da bese donɔɔ keŋ doo yakaa, keŋ ŋolo be tale mo botɔɔ ya lee wonembia kumɛɛ baŋ dɔɔ nɛ, 16Degbeŋgyoo Doŋ Pou Nyee ta toro yako nyiaa, maŋ nyiŋaa me kyaa nɛ, nyi baala batooro kɛwɔ kyaa ke man koraŋ nɛ, bɔɔ gyae baa tale lɛɛ be bia alebia yaa tewulɛɛ nyee ya. Baŋ baageŋ nyee te baa lɛɛ, mɔna tɛɛle keŋ gyae ke doo yakaa.

17Yaa akpaa me wɔŋ yoosila tia tɛɛle kenaŋ te me yako nyi, <<Yoosila dɛɛ gyoo tɛɛle keŋ man na ka koe ke balaŋ na ke wonembia nɛ, 18Degbeŋgyoo Doŋ Pou Nyee ta toro yako nyiaa, maŋ nyiŋaa me kyaa nɛ akpaa nyi baala batooro kɛwɔ kyaa ke man koraŋ nɛ, bɔɔ gyae baa tale lɛɛ baŋ gbagba bia alebia na tewulɛɛ nyee ya. Baŋ baageŋ nyee te baa lɛɛ.

19Yaa akpaa me kpila kaweekum gyu tɛɛle kenaŋ man, te ma lese me baŋ nedoŋ wola wɔ lee balaŋ kakoe dɔɔ te ma koe ke man balaŋ na wonembia nɛ, 20Degbeŋgyoo Doŋ Pou Nyee ta toro yako nyiaa, me nyiŋaa me kyaa nɛ, akpaa dekɔŋ nyi Nowa na Daniɛle na Yiobe kyaa ke man koraŋ nɛ, bɔɔ gyae baa tale lɛɛ alebu yaa tobaale nyee ya. Baŋ gbagba nyee te baa lɛɛ lee be katenee dɔɔ.

21Nawolo nyi nnɛ yaa Degbeŋgyoo Doŋ Pou Nyee ne yako, te akpaa me kpila ma deŋele kewɔŋ kumɛɛ anaara ŋan yɛɛ yoosila na tanam kum na wonembia kumɛɛ na kaweekum tia Yerusalɛm na ka koe ke balaŋ na wonembia na, sena te gyae ke yɛɛ! 22Mɔna bia alebia na bia tewulɛɛ baale baa nyiŋ nyeedoŋ keŋ baa lese wɔ lee ke man. Baa kɔŋ ɛ gyaŋ, te akpaa ɛ naa be dinɔɔ na ba ayɛɛsa nɛ, ɛ wɔe gyae ke fɛɛ ŋon lee nombiikum keŋ mɔɔ yele be yala Yerusalɛm, na nombiikum kamasɛ keŋ mɔɔ mo lɔ ke dɔɔ nɛ dɔɔ. 23Akpaa ɛ naa be dinɔɔ na ba ayɛɛsa nɛ, ɛ wɔe gyae ke fɛɛ ŋon. Nawolo nyi ɛ kena nyi ma te yɛɛ kolo ke man yakaa ya. Degbeŋgyoo Doŋ Pou Nyee torola yako.>