Hɛsekiɛle 47

Boo keŋ ba lee ɔsom deni dinaa keŋ man

1Balee ŋon besewɔ mo maŋ kɔŋ be dɛɛmoe gyoo ɔsom deni dinaa keŋ man, te me naa loŋ na lee ɔsom deni dinaa dekyaŋ keŋ ateta keŋ ke sia teena weese dɛɛlee (nawolo nyi ɔsom deni dinaa keŋ sia teena weese dɛɛlee). Loŋ keŋ ne tisi lee ɔsom deni dinaa keŋ ata yenaŋ keŋ ateta, kedeesaboe keŋ ata yenaŋ. 2Ɔ besewɔ mo maŋ ta lee ado yenaŋ denaanɔɔ keŋ man, te ɔ moo man kila debɔɔman denaanɔɔ keŋ ke sia teena weese dɛɛlee denaanɔɔ keŋ nɛ wɔle na loŋ keŋ ne tisi lee ata yenaŋ.

3Balee ŋon kegyu weese dɛɛlee na, ɔ dana ŋmeleŋ keŋ bɛɛ mo maa nɛ, ɔ maa nawɔɔtɔɔse kakpoŋ na sɔŋonoŋse anoŋ (1,500) te ɔ moo maŋ ta loŋ keŋ ne lii nawɔɔnawɔɔ nɛ man. 4Ɔ besewɔ maa nawɔɔtɔɔse kakpoŋ na sɔŋonoŋse anoŋ (1,500) na te ɔ moo maŋ ta loŋ keŋ ne lii doonodoono nɛ man. Ɔ besewɔ maa nawɔɔtɔɔse kakpoŋ na sɔŋonoŋse anoŋ (1,500) te ɔ moo maŋ ta loŋ keŋ ne lii teŋateŋa man nɛ. 5Ɔ besewɔ maa nawɔɔtɔɔse kakpoŋ na sɔŋonoŋse anoŋ (1,500), mɔna nɛnɛɛ dɔɔ ke yɛɛ boo ke te mɔɔ gyae maa tale toŋ ke ya, nawolo nyi boo keŋ te wuu te ke dana lee keŋ baa tale yɛlɛɛ ke man, ke yɛɛ boo keŋ ŋolo be tale toŋ ya. 6Ɔ bɔɔse maŋ nyiaa, <Deniwalaŋ bu, n ne naa kei?>

Keŋte ɔ besena maŋ gyu boo keŋ diŋgyiŋ. 7Me kelii botɔɔ nɛ, me naa daase burum boo keŋ diŋgyiŋ na diŋgyiŋ. 8Ɔ yako man nyiaa, <<Mena loŋ kei na lee weese dɛɛlee gyu Yɔɔdan detaŋgya man, na ke te gyu ka gyoo Ɛpo Deyeŋe keŋ man. Akpaa ke da gyoo ɛpo keŋ man na, yabia loŋ keŋ ta bese loŋ kpaakpaa. 9Botɔɔ keŋ loŋ keŋ ne lam nɛ wonembia burum baa kyaa botɔɔ. Kpebia burum baa doo ke man, nawolo nyi loŋ kei ne tisi gyu ka gyoo botɔɔ na te yele yabia loŋ keŋ ta besena loŋ kpaakpaa. Mena dɔɔ botɔɔ keŋ loŋ keŋ ne lam na kpene kamasɛ gyae ke doo botɔɔ. 10Kpebia kyaŋara na seŋee ɛpo keŋ nɔɔman lee Ɛne Gɛdi kelii Ɛne Ɛgelayim, botɔɔ te baa nyiŋ lee lɔ baa asawuse. Kpebia kpookpoo baa doo botɔɔ ŋgba kpebia baŋ be doo Mediterenia Ɛpo man nɛ. 11Mɔna apaase na atiribuŋse ŋan be gyae ke kyɛɛkee ya, ŋe gyae ke doo fa yabia. 12Daase bia ŋan ŋe daase yɛɛ kpookpoo nɛ gyae ka seŋ boo keŋ diŋgyiŋ ala dɔɔ. Ŋe faareŋ be gyae ka boto yaa ŋe bia ke kpiisi ya. Ŋe gyae ka se bia gyaalaŋ kamasɛ, nawolo nyi loŋ gyae ka lee fereŋkyeŋ keŋ man kɔŋ kaa gyoo ŋa. Ŋe bia gyae ke yɛɛ weenɛɛ na ŋe faareŋse ke kyɔ kawee.>>

Tɛɛle keŋ wuluse

13Nnɛ yaa Degbeŋgyoo doŋ pou nyee ne yako, Tɛɛle keŋ wuluse ŋan nyaŋ ke kpala fa Iserae akpaŋalaŋse kufu ala ŋan na baa mo bese be wui nɛ yaa, akpeŋ ala yɛɛ Yosɛfo wui. 14Kpala ŋa kyɛɛkyɛɛ fa wɔ. Nawolo nyi me te gyina me nyiŋmaa kaŋ ntam fa ɛ naanaɔ nyi maa mo fa wɔ, na tɛɛle kei kabese ɛ wui.

15<<Nnɛ yaa tɛɛle keŋ wuluse wɔɛ.

<<Ado yenaŋ gyae ka lee Mediterenia Ɛpo gyaŋ mo ta na Hɛtelon gbɛɛ mo toŋ gyu Lebo Hamate kelii Sedade, 16na Berota na Siberayim (Keŋ doo Damasekuse na Hamate wulu man nɛ) menɛɛ kelii naŋ Hasere Hatikɔn keŋ doo Hawurane wulu man nɛ. 17Wulu keŋ gyae ka lee ɛpo keŋ nɔɔman kelii Hasare Enan mo gyu Damasekuse ado yenaŋ wulu keŋ, keŋ na Hamate dana wulu ado yenaŋ nɛ, Kei ne gyaela ke yɛɛ ado yenaŋ wulu.

18<<Weese dɛɛlee wulu gyae ka lee Hawurane na Damasekuse nsana mo gyu Yɔɔdan ta Gileade na Iserae tɛɛle nsana, kelii ɛpo deyeŋe keŋ nɔɔman, menɛɛ kelii Tamare. Kei ne gyaela ke yɛɛ weese dɛɛlee yenaŋ wulu.

19<<Ata yenaŋ wulu gyae ka lee Tamare menɛɛ kelii naŋ Meriba Kadese loŋse ŋan gyaŋ, na ka mo Igyipite boŋobiise kelii Mediterenia Ɛpo nɔɔman. Kei yɛna ata yenaŋ wulu.

20<<Weese dɛɛyalae nɛ, Mediterenia Ɛpo ne gyaela ke yɛɛ wulu keŋ kelii botɔɔ keŋ ke sia teena Lebo Hamate nɛ. Kei ne gyaela ke yɛɛ weese dɛɛyalae wulu.

21Ɛ kpala tɛɛle kei fa ɛ wose ŋgba mena keŋ Iserae akpaŋalaŋse ŋan doo nɛ. 22Ɛ kpala ke fa ɛ wose ŋgba ɛ dedii nɛ fa ɛ wose na ŋɔɔla baŋ be kyaa ɛ man te be dana bia nɛ. Kaboena nyi yaa mo wɔ ŋgba ɛ loŋtona baŋ bɔɔ lola wɔ Iserae nɛ kpuna ŋon, na baŋ mɔ baa nyiŋ dedii ŋgba Iserae akpaŋalaŋse ŋan nɛ. 23Dekpaŋalaŋ keŋ man ŋɔɔle ŋolo kyaa na, botɔɔ te yaa fa e ɔ dedii,>> Degbeŋgyoo doŋ pou nyee torola yako.