Hɛsekiɛle 48

Tɛɛle keŋ kekpala

1Akpaŋalaŋse ŋan bɔɔ ŋmarase ba yela nɛ yaa,

<Lee ado yenaŋ wulu keŋ man nɛ, Dan waa mo yenaŋ daale, ke gyae ka lee Hɛtelon gbɛɛ kelii Lebo Hamate, Hasare Enan na Damasekuse ado yenaŋ wulu keŋ gyakaa Hamate dɔɔ nɛ, gyae ke yɛɛ ke wulu lee weese dɛɛlee kelii weese dɛɛyalae.

2Asere waa nyiŋ kekpala man dokoloŋ, keŋ na Dan gyae ke nyiŋ wulu lee weese dɛɛlee kelii weese dɛɛyalae.

3<<Nafitali waa nyiŋ kekpala man dokoloŋ, ke gyae ka lee Asere wulu keŋ gyaŋ lee weese dɛɛlee kelii weese dɛɛyalae.

4Manase waa mo kekpala man dokoloŋ, ke gyae ka lee Nafetali wulu man lee weese dɛɛlee kelii weese dɛɛyalae.

5Ɛferayim waa mo kekpala man dokoloŋ, ke gyae ka lee Manase wulu man lee weese dɛɛlee kelii weese dɛɛyalae.

6Rubɛn waa nyiŋ kekpala man dokoloŋ, ke wulu gyae ka lee Ɛferayim tɛɛle man, lee weese dɛɛlee kelii weese dɛɛyalae.

7Yuda waa nyiŋ kekpala man dokoloŋ, ke wulu gyae ka lee Rubɛn tɛɛle man, lee weese dɛɛlee kelii weese dɛɛyalae.

8Yuda tɛɛle wulu man lee weese dɛɛlee gyu weese dɛɛyalae te nyaŋ ka mo fa ŋgba kolo kefa nɛ. Kɔ ɔfalaboŋ gyae ke yɛɛ nawɔɔtɔɔse kakpoŋse sao na kufu nyetooro na sɔŋonoŋse anoŋ (37,500) te ke dɔɔloŋ gyae ke yɛɛ ŋgba akpaŋalaŋ ŋan man daale tɛɛle nɛ, lee weese dɛɛlee kelii weese dɛɛyalae, fereŋkyeŋ keŋ gyae ke doo ka nsana nsana.

9<<Tɛɛle kpaakpaa keŋ nyaŋ ka lese see fa Degbeŋgyoo nɛ, dɔɔloŋ gyae ke yɛɛ nawɔɔtɔɔse kakpoŋse sao na kufu nyetooro na sɔŋonoŋse anoŋ (37,500) na kɔ ɔfalaboŋ gyae ke yɛɛ nawɔɔtɔɔse kakpoŋse kufu anoŋ (15,000) 10Keŋ gyae ke yɛɛ tɛɛle fereŋkyeŋ fa saese baŋ. Ke dɔɔloŋ lee ado yenaŋ gyae ke yɛɛ nawɔɔtɔɔse kakpoŋse sao na kufu nyetooro na sɔŋonoŋse anoŋ (37,500) ke kɔ ɔfalaboŋ yɛɛ nawɔɔtɔɔse kakpoŋse kufu anoŋ (15,000) gyu weese dɛɛyalae, te kɔ ɔfalaboŋ gyu weese dɛɛlee gyae ke yɛɛ nawɔɔtɔɔse kakpoŋse sao na kufu anoŋ, (15,000), te ke dɔɔloŋ man gyu ata yenaŋ gyae ke yɛɛ nawɔɔtɔɔse kakpoŋse sao na kufu nyetooro na sɔŋonoŋse anoŋ (37,500). Degbeŋgyoo fereŋkyeŋ keŋ gyae ke doo ka nsana. 11Kei gyae ke yɛɛ saese baŋ bɔɔ gberaa wɔ, Sadɔke bia baŋ bɔɔ som maŋ anokoare man, te be ta yoo gbɛɛ ŋgba mena keŋ Lewitena baŋ be yɛɛ debaŋ keŋ Iseraetena ba yoo gbɛɛ nɛ ya. 12Ke gyae ke yɛɛ kefa kpaakpaa lee tɛɛle keŋ bɔɔ gberaa ke te botɔɔ yɛɛ fereŋkyeŋ nɛ, baŋ na Lewitena baŋ baa do wulu.

13Lee saese baŋ wulu wɔle na Lewitena baŋ baa nyiŋ tɛɛle keŋ ke dɔɔloŋ yɛɛ nawɔɔtɔɔse kakpoŋse sao na kufu nyetooro na sɔŋonoŋse anoŋ (37,500) te kɔ ɔfalaboŋ gyae ke yɛɛ nawɔɔtɔɔse kakpoŋse kufu anoŋ (15,000). Ke dɔɔloŋ pou gyae ke yɛɛ nawɔɔtɔɔse kakpoŋse sao na kufu nyetooro na sɔŋonoŋse anoŋ (37,500) te ke dɔɔloŋ pou gyae ke yɛɛ nawɔɔtɔɔse kakpoŋse kufu anoŋ (15,000). 14Be naa yɔɔ ke yaa baa mo ke kyɛɛkee na kolo ya. Kei yɛna tɛɛle kpaakpaate, te ke naa gyoo ŋolo nyiŋmaa man ya, nawolo nyi ke yɛɛ fereŋkyeŋ fa Degbeŋgyoo.

15Te botɔɔ keŋ be kaa nɛ ɔfalaboŋ yɛɛ nawɔɔtɔɔse kakpoŋse nyetooro na sɔŋonoŋse anoŋ (7,500) te ke dɔɔloŋ yɛɛ nawɔɔtɔɔse kakpoŋse sao na kufu nyetooro na sɔŋonoŋse anoŋ (37,500), nɛ gyae ke doo fa donɔɔ keŋ na baa baŋee denɛɛ na be wonembia dedii. Donɔɔ dinaa keŋ gyae ke doo ka nsana. 16te ka ado na ata na weese dɛɛlee na weese dɛɛyalae gyae ke yɛɛ nawɔɔtɔɔse kakpoŋse looro na sɔŋonoŋse nyetooro na sao ala na kufu (6,750) yenaŋ kamasɛ 17Tɛɛle keŋ wonembia dedii ado yenaŋ na ata yenaŋ na weese dɛɛlee na weese dɛɛyalae gyae ke yɛɛ nawɔɔtɔɔse sɔŋonoŋse atooro na sɔŋotooro na kufu anoŋ (375) yenaŋ kamasɛ. 18Tɛɛle keŋ be kaa te keŋ na fereŋkyeŋ yenaŋ keŋ ba do wulu nɛ, dɔɔloŋ dɔɔ weese dɛɛlee na weese dɛɛyalae yɛɛ nawɔɔtɔɔse kakpoŋse sao na kufu anoŋ (15,000). Ke man te tomyɛɛra baŋ bɛɛ yɛɛ tom donɔɔ dinaa keŋ man nɛ baa nyiŋ weenɛɛ lee. 19Tɛɛle kenaŋ man balaŋ baŋ baa fara ke dɔɔ gyae ke yɛɛ baŋ bɔɔ lee Iserae akpaŋalaŋse ŋan pou man nɛ. 20Tɛɛle kenaŋ yenaase anaara ŋan pou gyae ke yɛɛ kyɛɛkyɛɛ, nawɔɔtɔɔse kakpoŋse sao na kufu nyetooro na sɔŋonoŋse anoŋ (37,500) yenaŋ kamasɛ. Ɛ lese botɔɔ keŋ yɛɛ fereŋkyeŋ nɛ yenaŋ daale see ŋgba kefa kpaakpaa nɛ, mo kpuna donɔɔ dinaa keŋ dedii.

21<Tɛɛle keŋ be kaa fereŋkyeŋ keŋ gyaŋ na donɔɔ dinaa keŋ gyaŋ nɛ, gyae ke yɛɛ kegyia ŋon wui. Ke gyae ke maa lee weese dɛɛlee yenaŋ dɔɔ nawɔɔtɔɔse kakpoŋse sao na kufu nyetooro (37,500) lee yenaŋ keŋ yɛɛ fereŋkyeŋ mo gyu weese dɛɛlee yenaŋ wulu man, te weese dɛɛyalae yenaŋ gyae ke yɛɛ nawɔɔtɔɔse kakpoŋse sao na kufu nyetooro na sɔŋonoŋse anoŋ (37,500) kelii weese dɛɛyalae wulu man. Yenaase ala kɛŋa pou gyae ke yɛɛ kegyia ŋon wui, te botɔɔ keŋ bɔɔ gberaa kpuna ɔsom deni dinaa fereŋkyeŋ keŋ gyae ke doo ŋa nsana. 22Mena dɔɔ Lewitena na donɔɔ dinaa keŋ dedii gyae ke doo kegyia ŋon wui keŋ nsana. Botɔɔ keŋ yɛɛ kegyia ŋon wui gyae ke doo Yuda na Bɛneyameŋ wulu man.

23<<Te akpaŋalaŋ akaŋ ŋan nɛ,

<Bɛneyameŋ waa nyiŋ kekpala man dokoloŋ, ke gyae ka lee weese dɛɛlee kelii weese dɛɛyalae.

24Simeɔn waa nyiŋ kekpala man dokoloŋ, ke gyae ka lee Bɛneyameŋ wulu weese dɛɛlee kelii weese dɛɛyalae.

25Isaka waa nyiŋ kekpala man dokoloŋ, ke gyae ka lee Simeɔn wulu lee weese dɛɛlee kelii weese dɛɛyalae.

26Sebulun mɔ waa nyiŋ kekpala man dokoloŋ, ke gyae ka lee Yisaka wulu lee weese dɛɛlee kelii weese dɛɛyalae.

27Gade mɔ waa nyiŋ kekpala man dokoloŋ, ke gyae ka lee Sebulun wulu lee weese dɛɛlee kelii weese dɛɛyalae.

28Gade ata yenaŋ wulu gyae ka lee Tamare ata yenaŋ kelii Meriba Kadese loŋse man kelii naŋ Igyipite boŋobii keŋ man mo gyu Mediterenia Ɛpo keŋ man.

29Kei yɛna tɛɛle keŋ nyaŋ ke kpala fa Iserae akpaŋalaŋse na ka bese be dedii, na kabese be wui,>> Degbeŋgyoo doŋ pou nyee torola yako.

Donɔɔ dinaa wɔle keŋ anaanɔɔse

30Denaanɔɔ keŋ baa mo lee donɔɔ dinaa keŋ man ado yenaŋ dɔɔloŋ gyae ke yɛɛ nawɔɔtɔɔse kakpoŋse looro na sɔŋonyetooro na sao ala na kufu (6,750) 31Baa mo Iserae akpaŋalaŋ ŋan yele do donɔɔ dinaa keŋ anaanɔɔse. ado yenaŋ anaanɔɔ atooro ŋan gyae ke yɛɛ Rubɛn denaanɔɔ na Yuda denaanɔɔ, na Lewi denaanɔɔ.

32Weese dɛɛlee dɔɔloŋ gyae ke yɛɛ nawɔɔtɔɔse kakpoŋse looro na sɔŋonyetooro na sao ala na kufu (6,750) ŋan gyae ke yɛɛ anaanɔɔse atooro, ŋan yɛna Yosefo Bɛneyameŋ na Dan.

33Ata yenaŋ keŋ yɛɛ nawɔɔtɔɔse kakpoŋse sɔŋolooro na sɔŋonyetooro na sao ala na kufu (6,750) gyae ke yɛɛ anaanɔɔse atooro, ŋan yɛna Simeɔn, na Isaka, na Sebulun anaanɔɔ

34Weese dɛɛyalae keŋ dɔɔloŋ yɛɛ nawɔɔtɔɔse kakpoŋse looro na sɔŋonyetooro na sao ala na kufu (6,750) ke gyae ke yɛɛ anaanɔɔse atooro, ŋan yɛna Gade na Asere na Nafitali anaanɔɔse. 35<Ke lem kilisi ke gyae ke yɛɛ nawɔɔtɔɔse kakpoŋse sɔŋonyetooro (27,000)

<Te donɔɔ dinaa kenaŋ yele gyae ke yɛɛ,

<<Degbeŋgyoo kyaa botɔɔ. >> >