Hɛsekiɛle 46

1< <<Nnɛ yaa Degbeŋgyoo Doŋ Pou Nyee ne yako, kaboena nyi baa tɔ ba dekpaŋalaŋ tɔɔmante keŋ denaanɔɔ keŋ ke sia teena weese dɛɛlee nɛ weeya looro ŋan bɛɛ mo yɛɛ tom nɛ, mɔna Kefɛɛfowee na Gyaalaŋ Wɔle wee na baa toro ke see. 2Kegyia ŋon waa mo debɔɔ man dekpaŋalaŋ keŋ mo gyoo poto keŋ man, na waa seŋ denaanɔɔ daŋ keŋ gyaŋ. Saese baŋ baa deesi ɔ katoo kedeesa na nɔɔdokoloŋ kedeesase. Waa buŋ som denaanɔɔ keŋ gyaŋ na waa lee, mɔna be naa tɔ denaanɔɔ keŋ ya kelii balinɔɔ. 3Kefɛɛfoweeya na Gyaalaŋ Wɔle weeya nɛ, tɛɛle keŋ dɔɔ balaŋ baa som Degbeŋgyoo siaman, botɔɔ keŋ bɛɛ mo gyoo denaanɔɔ man. 4Kefɛɛfowee keŋ nɛ, kegyia ŋon waa mo namense baala bia looro na nam baale dokoloŋ baŋ be ta lee kadeŋ ya nɛ, kaa yɛɛ katoo kedeesa fa Degbeŋgyoo. 5Weenɛɛ kedeesa keŋ baa fa kpuna nam baale ŋon dɛɛ yɛɛ biliŋ tasa tɔɔ, te weenɛɛ kedeesa kpuna nam bu ŋon dɛɛ bo ŋgba mena keŋ ɔ ne gyae nɛ, te oliifi nuŋ galon dokoloŋ dee kpuna biliŋ tasa tɔɔ kamasɛ. 6Gyaalaŋ Wɔle wee keŋ nɛ waa mo nunkyue baalebii, na namense bia looro baŋ be ta kadeŋ ya nɛ kaa deesi. 7Waa fa biliŋ tasa tɔɔ kpuna nunkyue baale, na biliŋ tasa dokoloŋ kpuna nam baale na namense bia baŋ ŋon gbagba ne gyae nyi waa fa. Nuŋ galon dokoloŋ dɛɛ kpuna biliŋ tasa kamase. 8Nyi kegyia ŋon da gyoo na, waa mo poto keŋ denaanɔɔ man, te ɔ na lee na waa mo botɔɔ kenaŋ bese lee.

9<< <Akpaa tɛɛle keŋ dɔɔ balaŋ de kɔŋ Degbeŋgyoo siaman nɔɔkedi wee keŋ nɛ, ɔkamasɛ ŋon ɔ moo ado yenaŋ denaanɔɔ man gyoo nyi waa som na, waa mo ata yenaŋ denaanɔɔ keŋ man lee, te ŋolo da mo ata yenaŋ denaanɔɔ man gyoo na, waa mo ado yenaŋ denaanɔɔ man lee. Ŋolo naa mo denaanɔɔ keŋ ɔ ba mo gyoo nɛ man lee ya, mɔna waa mo alate keŋ man lee. 10Kegyia ŋon waa kpuna wɔ be ka gyoo na be ka lee man. 11Siŋkiti na nɔɔkedi wee keŋ bɔɔ lese see nɛ, weenɛɛ kedeesa keŋ baa fa nɛ dɛɛ yɛɛ biliŋ tasa tɔɔ na nunkyue baale, na biliŋ tasa tɔɔ na ke nam baale mo kpuna namense bia, mena keŋ baa tale fa nɛ, te nuŋ galon dokoloŋ dee kpuna biliŋ tasa tɔɔ kamasɛ. 12<< <Nyi akpaa kegyia ŋon de fa Degbeŋgyoo kolo lee ɔ konɔɔ man, katoo kedeesa yaa nɔɔdokoloŋ kedeesa nɛ, baa toro denaanɔɔ keŋ teena weese dɛɛlee nɛ fa e. Waa mo ɔ katoo kedeesa keŋ yaa nɔɔdokoloŋ kedeesa fa ŋgba mena keŋ bɛɛ yɛɛ kefɛɛfowee nɛ. Kenaŋ wɔle na waa lee, te ɔ lee na baa tɔ denaanɔɔ keŋ.

13<< <Wee kamasɛ nebo na ɛ mo nambu ŋon ɔ be di kulutoo dokoloŋ ŋon ɔ ta lee kadeŋ ya nɛ kaa yɛɛ katoo kedeesa fa Degbeŋgyoo. 14Nebo kamasɛ na ɛ mo weenɛɛ kedeesa keŋ yɛɛ weenɛɛ biliŋ tasa tɔɔ kekpala man looro kaa deesi, kpuna nuŋ galon kekpala man atooro na ɛ ka mo buu biliŋ keŋ. Weenɛɛ kedeesa kei ka mo fa Degbeŋgyoo dɛɛ yɛɛ mmaraa keŋ gyae ke doo kekpaakekpaa. 15Mena dɔɔ baa mo nambu ŋon na weenɛɛ kedeesa na nuŋ kɔŋ nebo kamasɛ kaa yɛɛ katoo kedeesa.

16< <<Nnɛ yaa Degbeŋgyoo Doŋ Pou Nyee ne yako, akpaa kegyia da mo ɔ deedii kolo fa ɔ bu tobaale ŋolo nɛ, ke gyae ke yɛɛ ɔ kalola kegyakarese wui, ke gyae ke yɛɛ be wui dedii. 17Te de kɔŋ nyi ɔ mo kolo fa ɔ somera baŋ man ŋolo na, ke gyae ke doo somere ŋon gyaŋ kelii wosekelɛɛ kulutoo keŋ, te ɔ lɛɛ ɔ wose na ke gyae ka bese kegyia ŋon wui. Ɔ dedii yɛɛ ɔ bia bageŋ wui, ke yɛɛ be wui. 18Kegyia ŋon naa lɛo balaŋ baŋ man ŋolo dedii, yaa waa gegi wɔ lee be tɛɛle man ya. Waa fa ɔ bia dedii lee ŋon gbagba tɛɛle man, na me balaŋ baŋ man ŋolo na ŋolo ba lee ɔ dedii man ya.>> >

19Keŋte balee ŋon moo maŋ ta be dɛɛmoe gyoo yenaŋ keŋ, ne gyu saese denɛɛ fereŋkyeŋ ŋan ŋe teena ado yenaŋ nɛ, te ɔ wola maŋ yenaŋ daale keŋ doo gyu ɔto weese dɛɛyalae yenaŋ. 20Ɔ yako maŋ nyiaa <<Kɛbo te saese baŋ baa saa fɔɔkedi weenɛɛ na dukum weenɛɛ, na baa wɔke weenɛɛ kedeesa, na bɔɔ nyiŋ mo ŋa kɔŋ ba dekpaŋalaŋ debɔɔman keŋ, na bɔɔ nyiŋ mo ŋa gberaa balaŋ baŋ ya.>>

21Keŋte ɔ moo maŋ kɔŋ dekpaŋalaŋ debɔɔmante keŋ man, te ɔ moo maŋ kila ka kebɔtalase anaara ŋan kilisi, te me naa dekpaŋalaŋ kebɔtala kamasɛ man. 22Ba te maa tɔ debɔɔman dekpaŋalaŋ kebɔtalase anaara ŋan, ke dɔɔloŋ yɛɛ nawɔɔtɔɔse sɔŋotooro (60) te kɔ ɔfalaboŋ yɛɛ nawɔɔtɔɔse sɔŋola na anoŋ (45), dekpaŋalaŋ kamasɛ keŋ doo kebɔtala kamasɛ man yɛɛ kyɛɛkyɛɛ. 23Kebɔtala kamasɛ tɔɔman na ba te ma boe dekyaŋ na kosɔ do akyaŋse ŋan ateta pou kilisi. 24Ɔ yako maŋ nyiaa, <<Kɛŋa yɛna gyaarese, kɛbo te ɔsom deni dinaa keŋ somera baa saa balaŋ baŋ kedeesase weenɛɛ.>>