Hɛsekiɛle 45

Iserae kabese seŋ

1< <<Nyi ɛ kpala tɛɛle keŋ ŋgba dedii nɛ, kaboena nyi yaa mo tɛɛle kenaŋ dekpeŋ fa Degbeŋgyoo ŋgba dikpiibii fereŋkyeŋ, keŋ ke dɔɔloŋ yɛɛ nawɔɔtɔɔse kakpoŋse sao na kufu nyetooro na sɔŋonoŋse anoŋ (37,500) na ke falaboŋ dɔɔ ke yɛɛ nawɔɔtɔɔse kakpoŋse sao na kufu (30,000), yenaŋ kenaŋ pou dɛɛ yɛɛ fereŋkyeŋ. 2Kaboena nyi yaa lese tɛɛle keŋ man nawɔɔtɔɔse (840) see fa fereŋkyeŋ keŋ, na ka debɔɔman keŋ ke yɛɛ nawɔɔtɔɔse sɔŋonaara na anaara (84). 3Dikpiibii fereŋkyeŋ keŋ man nɛ, ɛ maa tɛɛle keŋ ke dɔɔloŋ yɛɛ nawɔɔtɔɔse kakpoŋse sao na kufu nyetooro na sɔŋonoŋse anoŋ (37,500), na kɔ ɔfalaboŋ ke yɛɛ nawɔɔtɔɔse (15,000). Ke man te fereŋkyeŋ keŋ gyae ke doo, fereŋkyeŋ man fereŋkyeŋte keŋ. 4Ke gyae ke yɛɛ tɛɛle dedii fereŋkyeŋ fa saese baŋ bɛɛ som fereŋkyeŋ keŋ man, te bee tuu benaa kaa som Degbeŋgyoo siaman nɛ. Botɔɔ gyae ke yɛɛ ba akpaŋalaŋse debaŋee na ke yɛɛ fereŋkyeŋ fa ɔsom deni dinaa keŋ. 5Yenaŋ kenaŋ dɔɔloŋ dɛɛ yɛɛ nawɔɔtɔɔse (37,500) na kɔ ɔfalaboŋ ke yɛɛ nawɔɔtɔɔse (15,000), ke gyae ke yɛɛ Lewitena baŋ bɛɛ som ɔsom deni dinaa keŋ man nɛ wui, ŋgba be dedii nɛ na baa baŋee denɛɛ kyaa ŋe man.

6< <<Kaboena nyi nyaa kara tɛɛle keŋ kɔ ɔfalaboŋ man yɛɛ naawɔɔtɔɔse (7,500) te ke dɔɔloŋ yɛɛ (37,500) mataana botɔɔ keŋ bɔɔ gberaa nɛ fa donɔɔ dinaa keŋ ŋgba be dedii nɛ. Ke gyae ke yɛɛ Iseraetena pou wui.

7< <<Kegyia ŋon waa nyiŋ tɛɛle botɔɔ keŋ dikpiibii keŋ bɔɔ gberaa ke na donɔɔ dinaa keŋ dedii dana wulu nɛ. Ke gyae ke fɛlɛɛ lee weese dɛɛyalae wulu man gyu weese dɛɛyalae yenaŋ, na weese dɛɛlee gyu weese dɛɛlee yenaŋ. Ke gyae ke yɛɛ dɔɔloŋ lee weese dɛɛyalae wulu man gyu weese dɛɛlee wulu man ŋgba mena keŋ dekpaŋalaŋ daale dedii wɔɛ nɛ. 8Tɛɛle kei gyae ke yɛɛ ɔ wui Iserae. Na me kegyiise ba tekaa ŋere me balaŋ do ya, mɔna baa yela Iseraetena ka mo tɛɛle keŋ ŋgba be dedii nɛ, ŋgba mena keŋ ba akpaŋalaŋse wɔɛ nɛ.

9< <<Nnɛ yaa Degbeŋgyoo Doŋ Pou Nyee ne yako, Iserae kegyiise, ɛ te yɛɛ gbaa! Ɛ tina ɛ nombia nkaraŋkaraŋ na ɛ balaŋ kaŋeredo yela, na ɛ ke yɛɛ keŋ doona ke gbɛɛ na keŋ tenɛɛ. Ɛ tina me balaŋ tɛɛlese ke lɛo yela, Degbeŋgyoo Doŋ Pou Nyee torola yako. 10Kaboena nyi yaa mo sikelise temkuruwaa (Efa) na galon (bate) kpaakpaa nyiŋan maa abɔɔ. 11Kaboena nyi temkuruwaa na galon keŋ pou ɔkeereŋ dɛɛ yɛɛ kyɛɛkyɛɛ, galon keŋ kufu dɛɛ yɛɛ garawaa (homɛre) dokoloŋ, na temkuruwaa tɔɔse kufu ke yɛɛ garawaa keŋ dokoloŋ, ŋa ala dɛɛ yɛɛ kpene keŋ bɛɛ mo maa. 12Sɛkɛle keŋ dɛɛ yɛɛ gerase sao. Sɛkɛlese sao, kpuna sɛkɛlese sao anoŋ kpuna sɛkɛle kufu anoŋ mo debodokoloŋ na gyae ke yɛɛ mina dokoloŋ. 13< <<Kei yɛna kolo kefa kpaakpaa keŋ nyaa fa, lese kameese kuruwaasetɔɔse looro, lee garawaa kamasɛ man, na n ka lese aboŋ kuruwaasetɔɔse looro lee garawaa kamasɛ man. 14Oliifi nuŋ keŋ bɔɔ kare see nɛ yaa, keŋ bɔɔ moo galon maa, galon kekpala man kufu lee kɔre (gyerika) kamasɛ man (Galonse kufu yɛɛna garawaa dokoloŋ, nawolo nyi galonse kufu doola garawaa man). 15Baa mo nam dokoloŋ lee namense dikpii sɔŋonoŋse ala (200) baŋ be kyaa Iserae wonembia dedii kpakpaate man nɛ. Kɛŋa te baa mo yɛɛ weenɛɛ kedeesa, na katoo kedeesa na nɔɔdokoloŋ kedeesa, na baa mo pataa fa balaŋ baŋ, Degbeŋgyoo Doŋ Pou Nyee torola yako. 16Kaboena nyi tɛɛle keŋ dɔɔ balaŋ pou baa mo kedeesa kpaakpaate kei fa kegyia ŋon ɔ kyaa Iserae nɛ. 17Ke yɛɛ kegyia ŋon tom ke nyi waa fa katoo kedeesa abɔɔ na weenɛɛ kedeesa abɔɔ na soloŋ kedeesa abɔɔ be nɔɔkedise na gyaalaŋ wɔle na kefɛɛfo weeya man, be nɔɔkedi weeya ŋan pou Iseraetena ba lese see nɛ man. Waa fa dukum kedeesa abɔɔ na weenɛɛ kedeesa na katoo kedeesa, nɔɔdokoloŋ kedeesa abɔɔ na baa mo pataa fa Iseraetena baŋ. 18< <<Nnɛ yaa Degbeŋgyoo Doŋ Pou Nyee ne yako, gyaalaŋ gyaŋgbate ŋon wee gyaŋgbate na, ɛ mo nunkyue baalebii ŋon ɔ ta lee kadeŋ ya nɛ, na ɛ ka mo gberaa fereŋkyeŋ keŋ. 19Kaboena nyi sae ŋon waa mo dukum kedeesa fatabo keŋ ŋaale tiu ɔsom deni dinaa keŋ asima daase ŋan, na kedeesaboe keŋ adido kebɔtalase anaara ŋan, na dekpaŋalaŋ tɔɔmante keŋ denaanɔɔ daase ŋan. 20Kaboena nyi nyaa bese yɛɛ mena gyaalaŋ ŋonaŋ wee nyetoorote ŋon fa ɔkamasɛ ŋon ɔ te naana sia ya, yaa ɔ ta gyem ya te ɔ be yɛɛ dukum nɛ, na n ka mo pataa ɔsom deni dinaa keŋ.

21< <<Gyaalaŋ gyaŋgbate ŋon wee kufu anaarate nɛ, ɛ di nyeekelɛɛ wee keŋ, nɔɔkedi keŋ ɛ ne di ke weeya nyetooro nɛ, ke man te ɛ ke di bodobodo keŋ bodobodotee be doo ke man ya nɛ. 22Mena wee kenaŋ nɛ, kaboena nyi kegyia ŋon waa fa nunkyue mo yɛɛ dukum kedeesa fa ŋon gbagba, na balaŋ baŋ pou be kyaa tɛɛle keŋ dɔɔ nɛ. 23Weeya nyetooro ŋenaŋ man keŋ ɛ ne di nɔɔkedi wee keŋ nɛ, wee kamasɛ na kaboena nyi waa fa nunkyue baala nyetooro na namense baala nyetooro baŋ be ta lee kadeŋ ya, na baa mo yɛɛ katoo kedeesa fa Degbeŋgyoo, na waa mo asoo baale yɛɛ dukum kedeesa. 24Kaboena nyi waa mo biliŋ kuruwaatɔɔse ala na oliifi nuŋ porontiase anaara kpuna nunkyue baale kamasɛ na nam baale kamasɛ mo yɛɛ weenɛɛ kedeesa keŋ.

25< <<Nɔɔkedi weeya nyetooro ŋan man, keŋ ne mo lee gyaalaŋna nyetoorote ŋon ɔ weeya kufu anoŋte man nɛ, kaboena nyi waa bese yɛɛ mena fa dukum kedeesa, na katoo kedeesa na weenɛɛ kedeesa na nuŋ.