Hɛsekiɛle 44

Saese baŋ kabesena see

1Keŋte balee ŋon besewɔ mo maŋ kɔŋ fereŋkyeŋ keŋ denaanɔɔ debɔɔmante keŋ ke teena weese dɛɛyalae nɛ, na ba te tɔ ke. 2Te Degbeŋgyoo yako maŋ nyiaa, <<Kaboena nyi denaanɔɔ kei dɛɛ tɔ mena. Be naa toro ke ya, te ŋolo naa mo ke man gyoo ya. Kaboena nyi ke dɛɛ tɔ mena, nawolo nyi Degbeŋgyoo Iserae Wurubuarɛ ŋon ta mo ke man gyoo. 3Kegyia ŋon gbagba waageŋ ne gyaela waa tale kyaa ka denaanɔɔ tɔɔman, na waa di Degbeŋgyoo siaman. Kaboena nyi waa mo poto keŋ man gyoo na waa mo botɔɔ ke lee.>>

4Keŋte balee ŋon moo maŋ ta ado yenaŋ denaanɔɔ keŋ man kɔŋ ɔsom deni dinaa keŋ siaman. Me kɛɛwɔ te me naa Degbeŋgyoo gyoorobiiri keŋ te wulu Degbeŋgyoo ɔsom deni dinaa keŋ, te me buŋawɔ mo me sia buŋ tɛɛle man.

5Te Degbeŋgyoo yako maŋ nyiaa, kɛɛ nideli na n ke tei na n ka see deŋele fa kpene kamasɛ keŋ maa yako neŋ lee Degbeŋgyoo ɔsom deni dinaa keŋ mmaraase na kawolase pou wose man nɛ. Yela n sia ke gyu botɔɔ keŋ bɛɛ mo gyoo ɔsom deni dinaa keŋ man, na botɔɔse ŋan pou bɛɛ mo lee fereŋkyeŋ keŋ man. 6Yako Iserae deŋeledoŋtena baŋ nyiaa, <<Nnɛ yaa Degbeŋgyoo Doŋ Pou Nyee ne yako, Ao Iseraetena, ya anekɔlaŋ ayɛɛsa ŋan tekaboe mena! 7Mo kpuna ya anekɔlaŋ ayɛɛsa ŋan nɛ, ɛ ta bese mo ŋɔɔla baŋ bɔɔ nɛ nyii me dei ya te ba te kara be baalawose ya nɛ kɔŋ ma fereŋkyeŋ keŋ man, te ɛ waalaa mɔ ɔsom deni dinaa debaŋ keŋ ɛ ne fa maŋ weenɛɛ na wonembu nuŋ na fatabo nɛ, te ɛ wɔlɛɛ me nɔɔkebakese keŋ. 8Keŋ ɛ ke yɛɛ ma abɔɔ fereŋkyeŋ ŋan tom nɛ, ɛ moo baale bo see nyi baa yɛɛ tom ma fereŋkyeŋ keŋ man. 9Nnɛ yaa Degbeŋgyoo Doŋ Pou Nyee ne yako. Tekaboena nyi ŋɔɔle ŋon ɔ bee nyii me dei ya te ɔ te kara ɔ baalawose ya nɛ ka gyoo ma fereŋkyeŋ keŋ man ya, ŋɔɔla baŋ be kyaa Iseraetena man koraŋ naa gyoo ke man ya.

10< << Lewitena baŋ bɔɔ lee me gyaŋ laŋ lemlem, debaŋ keŋ Iserae ba yoo gbɛɛ te bɔɔ lee me gyaŋ gyu ke sila be bɛɛneŋ nɛ, kaboena nyi be dukum dɛɛ busaana wɔ. 11Baa tale som ma fereŋkyeŋ keŋ man, na baa yɛɛ ɔsom deni denaanɔɔ keŋ man gyeera na baa som ke man, baa tale ko katoo kedeesa wonembia na baa deesi fa balaŋ baŋ, na baa seŋ balaŋ baŋ siaman som wɔ. 12Mɔna keŋ bɔɔ som wɔ be bɛɛneŋ baŋ siaman te bɔɔ yele Iseraetena ba gyoo dukum man dɔɔ, me te gyina me nyiŋmaa kaŋ ntam nyi be dukum dɛɛ busaana wɔ, Degbeŋgyoo Doŋ Pou Nyee torola yako. 13Tekaboena nyi baa benaa maŋ na baa som maŋ ŋgba saese yaa baa benaa ma abɔɔ fereŋkyeŋ ŋan yaa ma kedeesase fereŋkyeŋ ŋan ya, kaboena nyi ba anekɔlaŋ ayɛɛsa desɛŋ dɛɛ seele wɔ. 14Te maa mo ɔsom deni dinaa keŋ do be nyiŋmaa man, na ka tomse ŋan pou baa yɛɛ ke man nɛ.

15< <<Mɔna saese baŋ be yɛɛ Lewitenawɔ te bɔɔ lee Sadɔke duuluŋman na baŋ bee gyee ma fereŋkyeŋ keŋ debaŋ keŋ Iseraetena ba yo gbɛɛ nɛ dɔɔ, baa kɔŋ kaa som me siaman, baa kɔŋ kaa seŋ me siaman na baa mo wonembu nuŋ na fatabo deesi. Degbeŋgyoo Doŋ Pou Nyee torola yako. 16Baŋ baageŋ te kaboena nyi baa gyoo ma fereŋkyeŋ keŋ man, baŋ baageŋ te kaboena nyi baa benaa me tebulu na baa som me siaman, na baa som maŋ ŋgba gyeera nɛ.

17< <<Nyi ba gyoo dekpaŋalaŋ tɔɔmante keŋ denaanɔɔ man nɛ, baa do akaralɛɛ kegba, be naa do nam wona kegba debaŋ keŋ bɛɛ som maŋ ɔsom deni dinaa keŋ dekpaŋalaŋ tɔɔmante keŋ denaanɔɔ man, yaa ɔsom deni dinaa keŋ man ya. 18Baa mo akaralɛɛ kotɔtɔɔ wuu ba nyeeya na baa do akaralɛɛ kyokotosebia. Be naa do abɔɔ ŋan gyae ke yela dufuŋ ke kyaŋ wɔ ya. 19Nyi ba lee gyu debɔɔman dekpaŋalaŋ keŋ balaŋ kyaa nɛ, kaboena nyi baa kpee ba kegbase ŋan bɛɛ mo som nɛ see denɛɛ fereŋkyeŋ ŋan man, na baa do kegbase wɔlɛɛ, na balaŋ baŋ be tina kegbase fereŋkyeŋ ŋan na ba wose ke faafo ya.

20Be naa gbee ba nyeeya yaa baa yela ba nyeenyɔɔse ke yɛɛ dɔɔloŋ ya, mɔna baa tisi ba nyeeya debaŋ kamasɛ. 21Akpaa sae ŋolo da gyoo dekpaŋalaŋ tɔɔmante keŋ man na, ɔ na nyɔɔ waen ya. 22Be naa yala liala yaa ala baŋ be baale be bɛɛ wɔ nɛ ya, baa yala ala keteŋse baŋ bɔɔ lee Iserae duuluŋman, yaa liala baŋ nafɔ be baala yɛɛ saesewɔ kaalaŋ nɛ. 23Baa wola me balaŋ abɔɔ fereŋkyeŋ lee ŋan ŋa te yɛɛ fereŋkyeŋ ya nɛ nsana, na baa wola wɔ mena keŋ baa kpase abɔɔ ŋan dana ayimɛɛ lee ŋan faafoɛ nɛ man.

24< <<Nyi kale da gyoo balaŋ bala nsana na, saese baŋ baa kyaa ŋgba nombiadiira nɛ na baa kolosi ŋa ŋgba mena keŋ maŋ mmaraa doo nɛ. Baa di me nɔɔkedi weeya mmaraase na kawolase ŋan dɔɔ na baa yɛɛ ma kefɛɛfo wee keŋ fereŋkyeŋ. 25< <<Sae ŋolo naa benaana woo na waa mo waalaa ɔ wose ya, mɔna akpaa woo ŋon yɛɛ ɔ naa yaa ɔ kya, yaa ɔ bu alebu yaa ɔ bu tobaale yaa ɔ loŋto yaa ɔ deesi ŋon ɔ te yalata ya na, waa tale waalaa ɔ wose. 26Be gberaa e lee ayimɛɛ man nɛ, waa kyaa weeya nyetooro. 27Wee keŋ waa gyoo fereŋkyeŋ keŋ dekpaŋalaŋ tɔɔmante keŋ man ɔ kaa som nɛ, waa yɛɛ dukum kedeesa fa ɔ wose, Degbeŋgyoo Doŋ Pou Nyee torola yako. 28< <<Maŋ maageŋ yɛna dedii keŋ saese baŋ dana. Ɛ naa fa wɔ dedii daale Iserae ya, maa yɛɛ be dedii. 29Baa di weenɛɛ kedeesase, na dukum kedeesase, na fɔɔkedi kedeesase, te kpene kamasɛ keŋ Iserae ba lese see fa Degbeŋgyoo nɛ gyae ke yɛɛ be wui. 30Saese baŋ baa mo weenɛɛ gyaŋgba nyiŋan pou na ya abɔɔ kefa kpaakpaa ŋan pou. Kaboena nyi yaa fa wɔ ɛ wɔɔman weenɛɛ gyaŋgba nyiŋan na kehiraa ke nyiŋ kɔŋ ya akpaŋalaŋse man. 31Saese baŋ naa di gyeebu, yaa wonembu ŋon ɔ ba yem, yaa ŋon wonembu ba ko nɛ ya.