Hɛsekiɛle 43

Wurubuarɛ gyoorobiiri ta bese kɔŋ ɔsom deni dinaa keŋ man

1Keŋte balee ŋon moo maŋ kɔŋ denaanɔɔ keŋ ke sia teena weese dɛɛlee nɛ, 2te me naa Iserae Wurubuarɛ gyoorobiiri ta lee weese dɛɛlee ne kɔŋ. Ɔ woya yɛɛ ŋgba loŋse burum kelaŋ nɛ, te tɛɛle keŋ ŋalakeewɔ lee ɔ gyoorobiiri keŋ dɔɔ. 3Keŋ ba lese wola maŋ nɛ, woɛ ŋgba keŋ mɔɔ naa debaŋ keŋ ɔ be kɔŋ ɔ kaa wɔlɛɛ donɔɔ dinaa keŋ, na ŋan mɔɔ naa Kebare boo nɔɔman te mɔɔ tisi doo mo me sia buŋ tɛɛle man nɛ. 4Degbeŋgyoo gyoorobiiri keŋ moowɔ denaanɔɔ keŋ ke sia teena weese dɛɛlee nɛ gyoo ɔsom deni dinaa keŋ man. 5Keŋte Feliŋ ŋon gate maŋ adido te ɔ moo maŋ kɔŋ dekpaŋalaŋ tɔɔmante keŋ man, te Degbeŋgyoo gyoorobiiri kaa lɛɛ ɔsom deni dinaa keŋ man pou.

6Balee ŋon ka seŋ me gyaŋ nɛ, me nyiiwɔ ŋolo ne kolosi fa maŋ lee ɔsom deni dinaa keŋ man. 7Ɔ yakowɔ nyiaa, <Deniwalaŋ bu, kɛbo yɛna me gyoorogbeli dedoi na me naawɔɔ dɛɛbetee. Kɛbo te maa kyaa Iseraetena man kekpaakekpaa. Iseraetena be gyae baa tekaa do ma yele fereŋkyeŋ keŋ ayimɛɛ bela ya, baŋ yaa be gyooneŋ be gyae baa tekaa mo be bɛɛneŋ kasom yaa be gyooneŋ woya dinɔɔse waalaa maŋ bela ya. 8Ba moo ba anaanɔɔse benaana ma denaanɔɔ, te ba moo ba asima daase see ma asima daase gyaŋ, na dekyaŋ doola daa na wɔ nsana, te ba moo ba ayɛɛsa anekɔlaŋ waalaa ma yele fereŋkyeŋ keŋ. Mena dɔɔ ma moo me baŋ wɔlɛɛ wɔ. 9Nɛnɛɛ baa lese be bɛɛneŋ kasom na be gyooneŋ woya dinɔɔse lee me siaman, na maa nyiŋ kyaa be man kekpaakekpaa.

10Deniwalaŋ bu, wola Iseraetena mena keŋ ɔsom deni dinaa keŋ doo, na desɛŋ ke kyaŋ wɔ lee be dukum dɔɔ. Yela baa gyeŋ mena keŋ ka dokoso be kyaa ya. 11Nyi akpaa desɛŋ de kyaŋ wɔ lee ba ayɛɛsa pou dɔɔ nɛ, yela baa gyeŋ ɔsom deni dinaa keŋ dinɔɔ na ba ke yɛɛ ke na ke ka gyoo na kalee na ka anaanɔɔse na ka kedoobii na ka mmaraase. Ŋmarase ŋa see be siaman na baa di anokoare fa ka kedoobii na baa di ka mmaraase pou dɔɔ.

12<Kei yɛna ɔsom deni dinaa keŋ mmaraa. Bula keŋ nyeeman na botɔɔ keŋ be kilisi ke nɛ pou gyae ke yɛɛ fereŋkyeŋ man fereŋkyeŋ. Keŋ yɛna ɔsom deni dinaa keŋ mmaraa.

Be kabese desina kedeesaboe dinaa keŋ baŋ

13<Kɛŋa yɛna kedeesaboe keŋ kemaa man. Mena kemaa kenaŋ te ba moowɔ maa ɔsom deni dinaa keŋ. Gɔta doo kilisi ka mokɔɔ kasee keŋ, Ke siiliŋ yɛɛ naetɔɔ na yaale (1.5), te kɔ ɔfalaboŋ mɔ yɛɛ naetɔɔ na yaale (1.5). Ke nɔɔse taneŋ yɛɛ ŋgba naetɔɔ (1) gyaŋee ke. Kei yɛna kedeesaboe keŋ ɔkooroŋ man. 14Lee gɔta keŋ doo tɛɛle man mo kelii ateta nɔɔse ŋan be gyaŋee kedeesaboe keŋ korɛɛ te ke fɛlɛɛ. Lee ke nɔɔ atetate keŋ man kelii adidote keŋ be kilisi kedeesaboe keŋ ɔkooroŋ yɛɛ naawɔɔtɔɔse atooro na yaale (3.5) te ke ɔfalaboŋ man yɛɛ naetɔɔ na yaale (1.5). Ke ka koro man gyae ke yɛɛ ŋgba naawɔɔtɔɔse nyetooro (7) nɛ, te ke fɛlɛɛ naetɔɔ na yaale (1.5). 15Kedeesaboe keŋ nyeeman botɔɔ keŋ bɛɛ too kedeesa abɔɔ nɛ ɔkooroŋ yɛɛ naawɔɔtɔɔse nyetooro (7), te ke dana woo anaara ŋan seŋɛɛ lee kedeesa keŋ dɔɔ mo gyu adido. 16Kedeesaboe keŋ nyee man yenaase anaara ŋan pou yɛɛ kyɛɛkyɛɛ, ke dɔɔloŋ yɛɛ naawɔɔtɔɔse sao daale (21), te kɔ ɔfalaboŋ mɔ yɛɛ naawɔɔtɔɔse sao daale (21). 17Adido keŋ mɔ yɛɛ kyɛɛkyɛɛ, ke dɔɔloŋ yɛɛ naawɔɔtɔɔse sao anaara na yaale (24.5) te ke falaboŋ mɔ yɛɛ naawɔɔtɔɔse sao anaara na yaale (24.5). Gɔta keŋ doo kilisi kedeesaboe keŋ wɔɛ ŋgba naetɔɔ na yaale (1.5) te ke siiliŋ yɛɛ naetɔɔ (1) te Kedeesaboe keŋ nae dɛɛbetee ŋan sia teena weese dɛɛlee.>

18Keŋte ɔ yako maŋ nyiaa, <Deniwalaŋ bu, nnɛ yaa Degbeŋgyoo Doŋ Pou Nyee ne yako, nyi be baŋ kedeesaboe keŋ taŋ nɛ, kɛŋa yɛna mmaraase ŋan baa mo yɛɛ katoo kedeesase, na mena keŋ baa mo fatabo ŋmatee kedeesaboe keŋ. 19Kaboena nyi yaa mo nunkyue bu fa Lewitena saese baŋ bɔɔ lee Sadoke duuluŋ man te bɛɛ kɔŋ me siaman kaa som nɛ ŋgba dukum kedeesa nɛ, Degbeŋgyoo Doŋ Pou Nyee torola yako. 20Kaboena nyi nyaa mo nunkyue bu ŋon fatabo ŋaale tiu kedeesaboe keŋ woo anaara ŋan, na ka kebɔtalase anaara ŋan doo adido nɛ na ke nɔɔse ŋan pou gyaŋee, na n ka mo gberaa kedeesaboe keŋ na n ka mo pataa ke. 21Kaboena nyi nyaa mo dukum kedeesa nunkyue ŋon, na n ka too e botɔɔ keŋ bɔɔ lese see fa ke nɛ ɔsom deni dinaa keŋ yenaŋ, fereŋkyeŋ keŋ wɔle.

22Wee alate keŋ nɛ, mo asoo baale ŋon ɔ ta lee kadeŋ ya nɛ yɛɛ dukum kedeesa. Na kaboena nyi baa gberaa kedeesaboe keŋ, ŋgba mena keŋ bɔɔ mo nunkyue baale ŋon gberaa ke nɛ. 23Akpaa n gberaa ke taŋ nɛ, kaboena nyi nyaa mo nunkyue baalebii na nam baale baŋ be ta lee kadeŋ ya nɛ lee n wonembia man. 24Kaboena nyi nyaa mo wɔ kɔŋ Degbeŋgyoo siaman, na saese baŋ ka mo yabia ŋmatee be dɔɔ na baa mo wɔ yɛɛ katoo kedeesa fa Degbeŋgyoo.

25Kaboena nyi nyaa mo asoo baale yɛɛ dukum kedeesa wee kamasɛ menɛɛ weeya nyetooro. Kaboena nyi nyaa mo nunkyue baalebii na nam baale baŋ be ta lee kadeŋ ya nɛ lee n wonembia man. 26Kaboena nyi baa mo weeya nyetooro pataa kedeesaboe keŋ na baa gberaa ke, na baa mo ke yɛɛ tom fa maŋ. 27Weeya kɛŋa wɔle nɛ, lee wee gyanaarate keŋ ne gyu nɛ, saese baŋ baa mo ɛ katoo kedeesa na nɔɔdokoloŋ kedeesa abɔɔ kaa deesi kedeesaboe keŋ dɔɔ. Kenaŋ na maa lɛɛ ŋon do. Degbeŋgyoo Doŋ Pou Nyee torola yako.>