Hɛsekiɛle 42

Saese baŋ denɛɛ

1Keŋte balee ŋon tɛɛwɔ me siaman gyu ado gbɛɛ dekpaŋalaŋ debɔɔ man keŋ, te ɔ moo maŋ gyu denɛɛ ŋan ŋe teena ɔsom deni dinaa keŋ dekpaŋalaŋ keŋ yenaŋ, na ke wɔle dekyaŋ keŋ doo ado yenaŋ nɛ gyaŋ. 2Deni keŋ ka denaanɔɔ tee ado yenaŋ ɔkooroŋ yɛɛ nawɔɔtɔɔse sɔŋogyanaara na kufu anoŋ (175) te kɔ ɔfalaboŋ yɛɛ nawɔɔtɔɔse sɔŋonaara na gyanaara (88). 3Dekpaŋalaŋ tɔɔmante keŋ na be dɛɛ tɛe debɔɔ man dekpaŋalaŋ keŋ yɛɛ kyɛɛkyɛɛ gyaŋee, denɛɛ ŋan yɛɛ atooro te ŋe sia teena dɔŋa, te ŋɔ ɔfalaboŋ yɛɛ nawɔɔtɔɔse sao na kufu anoŋ (35). 4Gbɛɛ daale doo denɛɛ ŋan siaman te kɔ ɔfalaboŋ yɛɛ nawɔɔtɔɔse kufu gyanaara (18) te ke dɔɔloŋ yɛɛ nawɔɔtɔɔse sɔŋogyanaara na kufu anoŋ (175). Ŋa anaanɔɔse doo ado yenaŋ. 5Adido denɛɛ ŋan yɛɛ bɔbɔɔkyee kela nsana na ateta wui ŋan, nawolo nyi be dɛɛkyae keŋ fɛlɛɛ. 6Adido denɛɛ ŋan taŋ piilase ŋgba mena keŋ dekpaŋalaŋ keŋ dana nɛ ya, mena dɔɔ ŋe denɛɛ ŋan yɛɛ buruburu kela nsana na ateta wui ŋan. 7Be maa dekyaŋ keŋ ke sia teena denɛɛ ŋan, na debɔɔman dekpaŋalaŋ keŋ, ke fɛlɛɛwɔ gyu denɛɛ ŋan siaman nawɔɔtɔɔse sɔŋonaara na gyanaara (88). 8Denɛɛ ŋan doo kekyaŋkyaŋ dɔɔ mo gyu debɔɔman dekpaŋalaŋ keŋ gyaŋ nɛ yɛɛ nawɔɔtɔɔse sɔŋonaara na gyanaara (88), te kyaŋkyaŋ keŋ doo benaana ɔsom deni dinaa keŋ dɔɔloŋ yɛɛ nawɔɔtɔɔse sɔŋogyanaara na kufu anoŋ (175). 9Denɛɛ ŋan doo ateta nɛ anaanɔɔse doo weese dɛɛlee. te ŋolo waa tale mo debɔɔ man dekpaŋalaŋ keŋ denaanɔɔ man gyoo ŋe man.

10Ata yenaŋ mo gyu debɔɔman dekpaŋalaŋ keŋ dekyaŋ mo tana ɔsom deni dinaa keŋ dekpaŋalaŋ man na debɔɔman dekyaŋ keŋ ke sia teena dekyaŋ keŋ nɛ denɛɛ doo, 11te damoe e gyoo lee doo ŋe siaman. Ŋe yɛɛ ŋgba denɛɛ ŋan doo ado yenaŋ nɛ, ŋe popou dɔɔloŋ na ŋɔ ɔfalaboŋ na be dɛɛmoe lee ke man yɛɛ kyɛɛkyɛɛ. Ado yenaŋ anaanɔɔse ŋan wɔɛ ŋgba 12ata yenaŋ denɛɛ ŋan anaanɔɔse nɛ. Denaanɔɔ doo lee be dɛɛmoe gyoo keŋ doo gyu weese dɛɛlee dekyaŋ keŋ bɛɛ mo gyoo denɛɛ ŋan man nɛ man.

13Keŋte ɔ yako maŋ nyiaa, <<Denɛɛ ŋan doo ado na ata yenaŋ ŋan ŋe teena ɔsom deni dinaa keŋ dekpaŋalaŋ nɛ yɛna saese baŋ denɛɛ, botɔɔ te saese baŋ bee gyu ke deesi fa Degbeŋgyoo nɛ, baa di weenɛɛ fereŋkyeŋ ŋan bɔɔ mo deesi nɛ. Botɔɔ te baa mo kedeesase fereŋkyeŋ ŋan see, ŋan yɛna weenɛɛ kedeesase na dukum kedeesase na fɔɔkedi kedeesase, nawolo nyi botɔɔ yɛɛ fereŋkyeŋ. 14Nyi saese baŋ de nyiŋ gyoo fereŋkyeŋ keŋ man nɛ, tekaboena nyi baa bese gyu dekpaŋalaŋ debɔɔmante keŋ man ya, kelii debaŋ keŋ baa kpee abɔɔ ŋan bɛɛ doo mo som nɛ see, nawolo nyi ŋe yɛɛ fereŋkyeŋ. Kaboena nyi baa do abɔɔ yakaa nyiŋan pɛ baa gyu balaŋ dɛɛ kyae.>>

15Balee ŋon ke maa abɔɔ ŋan doo ɔsom deni dinaa keŋ man taŋ nɛ, ɔ moo maŋ ta weese dɛɛlee denaanɔɔ keŋ man lee te ɔ maa botɔɔ kilisi. 16Ɔ moo daŋ keŋ bɛɛ mo maa nɛ maa weese dɛɛlee yenaŋ na, ke yɛɛ nawɔɔtɔɔse sɔŋonoŋse gyanaara na sɔŋola (840). 17Ɔ maa ado yenaŋ keŋ na, keŋ mɔ yɛɛ nawɔɔtɔɔse sɔŋonoŋse gyanaara na sɔŋola (840). 18Ɔ maa ata yenaŋ keŋ na, keŋ mɔ yɛɛ nawɔɔtɔɔse sɔŋonoŋse gyanaara na sɔŋola (840). 19Keŋte ɔ besewɔ maa weese dɛɛyalae yenaŋ na, keŋ mɔ yɛɛ nawɔɔtɔɔse sɔŋonoŋse gyanaara na sɔŋola (840). 20Keŋ dɔɔ ɔ maa yenaase anaara ŋan pou. Ke dana dekyaŋ kilisi ke, te ke dɔɔloŋ yɛɛ nawɔɔtɔɔse sɔŋonoŋse gyanaara na sɔŋola (840), te kɔ ɔfalaboŋ yɛɛ nawɔɔtɔɔse sɔŋonoŋse gyanaara na sɔŋola (840), na ke kpase fereŋkyeŋ keŋ lee keŋ te yɛɛ fereŋkyeŋ ya nɛ man.