Hɛsekiɛle 41

1Keŋte balee ŋon moo maŋ kɔŋ ɔsom deni keŋ gbagba man, te ɔ maa ka denaanɔɔ daŋ keŋ, na kɔ ɔfalaboŋ yɛɛ nawɔɔtɔɔse kufu na yaale daale (10.5) 2Denaanɔɔ keŋ gbɛɛ ɔfalaboŋ yɛɛ nawɔɔtɔɔse kufu nyetooro na yaale (17.5), te akyaŋse ŋan yenaŋ kamasɛ yɛɛ nawɔɔtɔɔse kadaale (9). Ɔ besewɔ maa ɔsom deni dinaa keŋ poto keŋ gbagba na, ke dɔɔloŋ yɛɛ nawɔɔtɔɔse sɔŋotooro na kufu (70) te kɔ ɔfalaboŋ yɛɛ nawɔɔtɔɔse sao na kufu anoŋ (35)

3Keŋte ɔ gyuu fereŋkyeŋ keŋ tɔɔman gbagba te ɔ maa denaanɔɔ daase ŋan na, ŋe man dekamasɛ ɔfalaboŋ yɛɛ nawɔɔtɔɔse atooro na yaale (3.5). Denaanɔɔ keŋ ɔfalaboŋ yɛɛ nawɔɔtɔɔse kufu na yaale (10.5). 4Te ɔ maa fereŋkyeŋ tɔɔmante keŋ dɔɔloŋ dɔɔ na, ke yɛɛ nawɔɔtɔɔse sao na kufu anoŋ (35), te kɔ ɔfalaboŋ yɛɛ nawɔɔtɔɔse sao na kufu anoŋ (35) kelii poto gbagba keŋ ɔto. Ɔ yako maŋ nyiaa, <Kɛbo yɛna fereŋkyeŋ man fereŋkyeŋ keŋ.>

5Keŋte ɔ maa ɔsom deni dinaa dekyaŋ keŋ, ke taneŋ yɛɛ nawɔɔtɔɔse kufu na yaale (10.5) te denɛɛ ŋan be kilisi ɔsom deni dinaa keŋ gyaŋee nɛ ɔfalaboŋ yɛɛ nawɔɔtɔɔse nyetooro (7) 6Denɛɛ atooro ŋan doo ka yenaŋ gyakaa dɔŋa dɔɔ atooro, dekamasɛ gyakaa kedɔɔ dɔɔ, te denɛɛ sao na kufu (30) doola dekamasɛ man. Agbeŋgbeleŋse doo kilisi ɔsom deni dinaa dekyaŋ keŋ, na ke kyaŋ denɛɛ yenaase nyiŋan, ŋa te kyaŋ ɔsom deni dinaa keŋ dekyaŋ ya. 7Yenaase denɛɛ ŋan do kilisi ɔsom deni dinaa keŋ nɛ adido fɛlɛɛ kela ateta wui ŋan. Be maa denɛɛ ŋan be kilisi ɔsom deni dinaa keŋ gyakaa dɔŋa dɔɔ lee ateta mo gyu adido, na ŋɛɛ fɛlɛɛ gyakaa dɔŋa dɔɔ. Naawɔɔ kekulu keŋ bɛɛ mo gyeŋ nɛ, na lee ateta na ta mo nsana kelii adido.

8Me naawɔ nyi be ta see mokɔɔ kilisi ɔsom deni dinaa keŋ, te ke yɛɛ mokɔɔ kasee ke fa denɛɛ yenaase nyiŋan. Ke dɔɔloŋ yɛɛ nawɔɔtɔɔse kufu na yaale (10.5). 9Denɛɛ yenaase ŋan wɔle dekyaŋ keŋ taneŋ yɛɛ nawɔɔtɔɔse kadaale (9). Ɔsom deni dinaa keŋ yenaase denɛɛ ŋan, 10na saese baŋ denɛɛ nsana yɛɛ nawɔɔtɔɔse sao na kufu anoŋ (35) kilisi ɔsom deni dinaa keŋ. 11Anaanɔɔse gbɛɛ doo gyu yenaase denɛɛ ŋan man, daale doo ado yenaŋ te daale doo ata yenaŋ, te mokɔɔ keŋ bɔɔ bake lee debɔɔ man kilisi nɛ ɔfalaboŋ yɛɛ nawɔɔtɔɔse kadaale (9).

12Deni keŋ teena ɔsom deni dinaa keŋ dekpaŋalaŋ keŋ weese dɛɛlee nɛ ɔfalaboŋ yɛɛ ŋgba nawɔɔtɔɔse sɔŋolooro na sao ala na yaale (122.5) nɛ. Deni keŋ dekyaŋ taneŋ yɛɛ nawɔɔtɔɔse kadaale (9) kilisi ke, te ke dɔɔloŋ yɛɛ nawɔɔtɔɔse sɔŋonyetooro na kufu nyetooro (157).

13Keŋte ɔ maa ɔsom deni dinaa keŋ na ke dɔɔloŋ yɛɛ nawɔɔtɔɔse sɔŋogyanaara na kufu anoŋ (175) te ɔsom deni dinaa keŋ dekpaŋalaŋ man na deni keŋ na ka akyaŋse mɔ dɔɔloŋ yɛɛ nawɔɔtɔɔse sɔŋogyanaara na kufu (170). 14Ɔsom deni dinaa keŋ dekpaŋalaŋ weese dɛɛlee keŋ, na ke siaman ɔfalaboŋ yɛɛ nawɔɔtɔɔse sɔŋogyanaara na kufu anoŋ (175)

15Keŋte ɔ maa deni keŋ ke sia teena ɔsom deni dinaa dekpaŋalaŋ keŋ wɔle, na ka akyaŋse ŋan yenaŋ kamasɛ, ke dɔɔloŋ yɛɛ nawɔɔtɔɔse sɔŋogyanaara na kufu anoŋ (175).

Poto keŋ gbagba na fereŋkyeŋ keŋ tɔɔman na ke poto keŋ teena dekpaŋalaŋ keŋ, 16na akyaŋse ŋan doo tɔɔman adido na nfanserese bia ŋan na ŋe daase ŋan ŋɔɔ kilisi ŋa atooro nɛ, be ta mo daase patalapatala wuu ŋe popou dɔɔ kpuna dekyaŋ tɔɔmante keŋ. Be wuu tɛɛle man, na dekyaŋ keŋ kelii mfanserese bia ŋan gyaŋ. 17Be yae daase patalapatala wuu fereŋkyeŋ keŋ akyaŋse mo gyu adido gbaa anaanɔɔse ŋan. 18be yae kerubise na baaneŋ ŋe dɔɔ. Baaneŋ baŋ doo kerubise baŋ nsana. Kerubi kamasɛ siagbɛɛ yɛɛ ala. 19Walaŋ siagbɛɛ teena baa yenaŋ daale, te dinaate siagbɛɛ teena baa ŋon yenaŋ daale mɔ. Be yae ŋa kilisi ɔsom deni dinaa keŋ pou. 20Be yae kerubise na baaneŋ dinɔɔ do ɔsom deni keŋ gbagba man, lee ateta mo gyu denaanɔɔ keŋ adido.

21Deni keŋ gbagba anaanɔɔ daase ŋan wɔɛ ŋgba, Fereŋkyeŋ Man Fereŋkyeŋ keŋ siaman wui ŋan nɛ. 22Kedeesa daŋ keŋ ɔkooroŋ yɛɛ nawɔɔtɔɔse anoŋ (5), te ka yenaase yɛɛ nawɔɔtɔɔse atooro na yaale (3.5), daŋ te ba moowɔ yɛɛ ka kebɔtalase na ka mokɔɔ na ka yenaase. Balee ŋon yako maŋ nyiaa, <<Kei yɛna tebulu keŋ doo Degbeŋgyoo siaman.>> 23Deni keŋ gbagba na Fereŋkyeŋ man Fereŋkyeŋ keŋ dana anaanɔɔse ala. 24Denaanɔɔ kamasɛ dana asima ala keŋ bɛɛ toro. 25Te be yae kerubise na baaneŋ gyakaa deni keŋ asima dɔɔ, ŋgba ŋan bɔɔ yae gyakaa akyaŋse ŋan dɔɔ nɛ, te be yae daase mo gyakaa poto keŋ siaman adido. 26Be yae baaneŋ dinɔɔ gyakaa poto keŋ dekyaŋ na mfanserese bia ŋan yenaase. Be yae daase tɔ denɛɛ ŋan doo ɔsom deni dinaa keŋ yenaŋ nɛ.