Hɛsekiɛle 40

Ba te desina Ɔsom Deni Dinaa keŋ bese baŋ

1De ke gyu yoogbeŋiri man kulutooneŋ sao anoŋte man, kulutoo ŋonaŋ kewalaŋ ɔ gyaalaŋna kufute, keŋ yɛɛ donɔɔ dinaa keŋ keyala wɔle kulutooneŋ kufu anaarate nɛ, mena wee kenaŋ Degbeŋgyoo moo ɔ nyiŋmaa gyakaa me dɔɔ te ɔ moo maŋ gyu botɔɔ. 2Kalesewola man nɛ Wurubuarɛ moo maŋ gyu Iserae tɛɛle man, te ɔ moo maŋ ke gyakaa bula keŋ ka korɛɛ nideli nɛ dɔɔ, denɛɛ ŋaale kyaa ka ata yenaŋ ŋan ŋe wɔɛ ŋgba donɔɔ dinaa nɛ. 3Ɔ moo maŋ gyu botɔɔ, te me naa balee ŋolo ŋon ɔ dinɔɔ wɔɛ ŋgba kɔbere nɛ, ɔ seŋɛɛ denaanɔɔ keŋ man na ɔ dana akaralɛɛ ŋmeleŋ na daŋ keŋ bɛɛ mo maa nɛ. 4Balee ŋon yako maŋ nyiaa, <Deniwalaŋ bu, kɛɛ nideli na n ke tei nideli, see deŋele na n ka gyene kpene kamasɛ keŋ mɛɛ gyae maa wola neŋ, nawolo nyi keŋ dɔɔ te ma moo neŋ kɔŋ kɛbo. Yako Iseraetena kpene kamasɛ keŋ n be naa.>

Denaanɔɔ keŋ doo debɔɔ man dekpaŋalaŋ keŋ weese dɛɛlee

5Me naa dekyaŋ te kilisi ɔsom deni dinaa keŋ gyaŋee. Kemaa gbutu keŋ doo balee ŋon nyiŋmaa man nɛ dɔɔloŋ yɛɛ nawɔɔtɔɔse kufu (10). Ɔ moo gbutu keŋ maa dekyaŋ keŋ na, ke taneŋ man yɛɛ nawɔɔtɔɔse kufu (10), te kɔ ɔkooroŋ man yɛɛ nawɔɔtɔɔse kufu (10).

6Keŋte ɔ gyuuwɔ weese dɛɛlee yenaŋ denaanɔɔ keŋ man. Ɔ gyeŋa ke nae kekulu keŋ te ɔ maa denaanɔɔ gbɛɛ keŋ. Ke siiliŋ yɛɛ nawɔɔtɔɔse kufu (10). 7Gyeera baŋ deni keŋ dɔɔloŋ yɛɛ nawɔɔtɔɔse kufu (10.5), te kɔ ɔfalaboŋ mɔ yɛɛ nawɔɔtɔɔse kufu (10.5). Dekyaŋ keŋ be kpala ŋe man nɛ yɛɛ nawɔɔtɔɔse gyanaara (8), Denaanɔɔ keŋ gyakaa poto keŋ teena ɔsom deni dinaa keŋ siiliŋ yɛɛ nawɔɔtɔɔse kufu (10).

8Keŋte ɔ maa denaanɔɔ poto keŋ, 9ɔ maa denaanɔɔ poto keŋ ke sia teena ɔsom deni dinaa keŋ na, ke siiliŋ yɛɛ nawɔɔtɔɔse kufu anaara (14), te akyaŋse ŋan dana ke nɛ taneŋ yɛɛ nawɔɔtɔɔse atooro (3). 10Gyeera denɛɛ atooro doo weese dɛɛlee denaanɔɔ keŋ man. Ŋa atooro pou kemaa yɛɛ kyɛɛkyɛɛ, te akyaŋse ŋan dana ŋa yenaase kamasɛ mɔ kemaa yɛɛ kyɛɛkyɛɛ. 11Te ɔ maa denaanɔɔ gbɛɛ keŋ ɔfalaboŋ man na, ke yɛɛ nawɔɔtɔɔse kufu nyetooro (17), te ke dɔɔloŋ yɛɛ nawɔɔtɔɔse sao ala (22). 12Dekyaŋ doo gyeere deni kamasɛ siaman keŋ kɔ ɔkooroŋ yɛɛ naetɔɔ na yaale (1.5), te gyeera denɛɛ ŋenaŋ kebɔtalase mɔ yɛɛ naetɔɔ na yaale (1.5) 13Keŋte ɔ maa denaanɔɔ gbɛɛ keŋ doo lee gyeera deni dekyaŋ keŋ wɔle mo gyu keŋ ke sia teena ke nɛ nyeeman na, ke lem yɛɛ nawɔɔtɔɔse sɔŋola na anaara (44) lee gyeera deni dokoloŋ gyaŋ gyu ke dɔɔ gyaŋ. 14Te ɔ maa akyaŋse ŋan dana denaanɔɔ tɔɔmante keŋ gyaŋee na, ke yɛɛ nawɔɔtɔɔse sɔŋonaara na kufu (90). 15Lee denaanɔɔ gbɛɛ keŋ man bɛɛ mo gyoo nɛ kelii ke poto keŋ ɔto yɛɛ nawɔɔtɔɔse sɔŋotooro na kufu anoŋ (75). 16Ba doo mfanserese bia akyaŋse ŋan be kilisi gyeera denɛɛ ŋan man nɛ gyaŋee na akyaŋse ŋan doo ŋa nsana denaanɔɔ keŋ man nɛ kilisi. Mena te be yɛɛ poto keŋ mɔ. Be yɛɛ baaneŋ dinɔɔ mo desina akyaŋse ŋan ŋe teena gbɛɛ keŋ nɛ.

Debɔɔ man dekpaŋalaŋ keŋ

17Keŋte ɔ moo maŋ kɔŋ debɔɔ man dekpaŋalaŋ keŋ man. Botɔɔ te me naa denɛɛ ŋaale na gbɛɛ keŋ bɔɔ doo gyaŋee dekpaŋalaŋ keŋ nɛ. Denɛɛ sao na kufu (30) doola gbɛɛ keŋ bɔɔ mo boya desina ke nɛ gyaŋ. 18Boya gbɛɛ keŋ doo denaanɔɔ gbɛɛ keŋ gyaŋ te ke fɛlɛɛ ŋgba mena keŋ ke dana dɔɔloŋ nɛ, kei yɛna boya gbɛɛ atagbɛɛ keŋ. 19Keŋte ɔ maawɔ lee atagbɛɛ denaanɔɔ keŋ tɔɔman kelii dekpaŋalaŋ tɔɔmante keŋ wɔle na, weese dɛɛlee yɛɛ nawɔɔtɔɔse sɔŋonyetooro na kufu (150), te ado yenaŋ mɔ yɛɛ mena.

Ado yenaŋ denaanɔɔ

20Keŋte ɔ maa ado yenaŋ denaanɔɔ keŋ doo gyu debɔɔ man dekpaŋalaŋ keŋ gyaŋ nɛ dɔɔloŋ na kɔ ɔfalaboŋ man. 21Gyeera denɛɛ atooro doo ka yenaŋ kamasɛ, ka akyaŋse ŋan dana ke na potose ŋan kemaa wɔɛ ŋgba denaanɔɔ gyaŋgbate keŋ nɛ. Ke dɔɔloŋ yɛɛ nawɔɔtɔɔse sɔŋotooro na kufu anoŋ (75), te kɔ ɔfalaboŋ yɛɛ nawɔɔtɔɔse sao na kufu gyanaara (38). 22Ka anaanɔɔse na ke poto na baaneŋ baŋ bɔɔ yɛɛ mo desina ke nɛ kemaa yɛɛ kyɛɛkyɛɛ, ŋgba denaanɔɔ keŋ teena weese dɛɛlee nɛ. Kabeteese nyetooro doola gyu ke gyaŋ, na ke poto keŋ teena ŋa. 23Denaanɔɔ doo gyu dekpaŋalaŋ tɔɔmante keŋ man keŋ ke sia teena ado yenaŋ denaanɔɔ keŋ, ŋgba mena keŋ doo weese dɛɛlee nɛ. Ɔ maawɔ lee denaanɔɔ dokoloŋ gyaŋ gyu keŋ ke sia teena ke nɛ gyaŋ na, ke yɛɛ nawɔɔtɔɔse sɔŋonyetooro na kufu (150).

Ata yenaŋ denaanɔɔ

24Keŋte ɔ moo maŋ gyu ata yenaŋ te me naa ata yenaŋ denaanɔɔ keŋ. Ɔ maa ka dekyaŋ na ke poto keŋ na, ŋa kemaa wɔɛ ŋgba ŋe dɔɔ ŋan nɛ. 25Denaanɔɔ keŋ bɛɛ mo gyoo na ke poto na ka mfanserese bia ŋan be kilisi ŋa pou wɔɛ ŋgba ŋe dɔɔ ŋan wui mfanserese nɛ. Ŋe dɔɔloŋ yɛɛ nawɔɔtɔɔse sɔŋotooro na kufu anoŋ (75). te kɔ ɔfalaboŋ yɛɛ nawɔɔtɔɔse sɔŋola na kufu gyanaara (38). 26Nawɔɔ kekulu nyetooro doola gyu ke gyaŋ, na ke poto keŋ sia teena ŋa. Be ta mo baaneŋ dinɔɔ desina akyaŋse ŋan dana ke nɛ siaman yenaŋ kamasɛ. 27Ba dekpaŋalaŋ tɔɔmante keŋ mɔ dana denaanɔɔ keŋ ke sia teena ata yenaŋ keŋ, te ɔ maawɔ lee denaanɔɔ kei gyaŋ kelii denaanɔɔ keŋ doo debɔɔman ata yenaŋ keŋ na, ke yɛɛ nawɔɔtɔɔse sɔŋonyetooro na kufu (150).

Ba dekpaŋalaŋ tɔɔmante keŋ anaanɔɔse

28Keŋte ɔ moo maŋ ta ata yenaŋ denaanɔɔ keŋ man gyu ba dekpaŋalaŋ tɔɔmante keŋ man, te ɔ maa ata yenaŋ denaanɔɔ keŋ, na keŋ na ŋe dɔɔ ŋan kemaa yɛɛ kyɛɛkyɛɛ. 29Ke gyeera denɛɛ na ka akyaŋse na ke poto keŋ kemaa wɔɛ ŋgba ŋe dɔɔ ŋan nɛ. Ka denaanɔɔ keŋ man bɛɛ mo gyoo na ke poto keŋ dana mfanserese bia kilisi ke. Ke dɔɔloŋ yɛɛ nawɔɔtɔɔse sɔŋotooro na kufu anoŋ (75). te kɔ ɔfalaboŋ yɛɛ ŋgba nawɔɔtɔɔse sao na kufu gyanaara (38). 30Anaanɔɔse ŋan potose ŋan be kilisi ba dekpaŋalaŋ tɔɔmante keŋ man nɛ ɔfalaboŋ yɛɛ ŋgba nawɔɔtɔɔse sao na kufu gyanaara (38). te ke siiliŋ yɛɛ nawɔɔtɔɔse gyanaara (8). 31Ke poto keŋ sia teena debɔɔ man dekpaŋalaŋ keŋ, te be yɛɛ baaneŋ dinɔɔ mo desina ka akyaŋse, nae kekuluse gyanaara (8) te bɛɛ mo gyeŋ gyu ke man.

32Keŋte ɔ moo maŋ kɔŋ ba dekpaŋalaŋ tɔɔmante keŋ doo weese dɛɛlee nɛ, te ɔ maa be dɛɛ moe gyoo keŋ na, keŋ mɔ kemaa wɔɛ ŋgba ŋe dɔɔ ŋan nɛ. 33Ke gyeera denɛɛ na ka akyaŋse na ke poto keŋ kemaa wɔɛ ŋgba ŋe dɔɔ ŋan nɛ. Be dɛɛ moe gyoo denaanɔɔ keŋ na ke poto keŋ dana mfanserese bia kilisi ke. Ke dɔɔloŋ yɛɛ nawɔɔtɔɔse sɔŋotooro na kufu anoŋ (75), te kɔ ɔfalaboŋ yɛɛ ŋgba nawɔɔtɔɔse sao na kufu gyanaara (38). 34Ke poto keŋ sia teena debɔɔ man dekpaŋalaŋ keŋ, te be yɛɛ baaneŋ dinɔɔ mo desina ka akyaŋse ŋan yenaase, te nawɔɔ kekuluse gyanaara (8) doola gyu keŋ gyaŋ.

35Keŋte ɔ moo maŋ kɔŋ ado yenaŋ denaanɔɔ keŋ man te ɔ maa ke. Ka kemaa wɔɛ ŋgba ŋe dɔɔ ŋan nɛ. 36Ke dana gyeera denɛɛ, na akyaŋse na poto, na mfanserese bia te kilisi ke. Ke dɔɔloŋ yɛɛ nawɔɔtɔɔse sɔŋotooro na kufu anoŋ (75), te kɔ ɔfalaboŋ yɛɛ ŋgba nawɔɔtɔɔse sao na kufu gyanaara (38) nɛ. 37Ke poto keŋ sia teena debɔɔman dekpaŋalaŋ keŋ te be yɛɛ baaneŋ dinɔɔ mo desina ka akyaŋse, nawɔɔ kekulu gyanaara te bɛɛ mo gyeŋ gyu ke man.

Denɛɛ ŋan man bee desina kedeesase

38Deni keŋ dana denaanɔɔ mo gyu poto keŋ be dɛɛmoe gyoo tɔɔmante kamasɛ man, botɔɔ te bɛɛ faafo katoo kedeesa abɔɔ ŋan. 39Tebeluse ala doo poto keŋ denaanɔɔ yenaase ala ŋan man, ke dɔɔ te bɛɛ koe katoo kedeesa na dukum kedeesa na fɔɔkedi kedeesa wonembia baŋ. 40Poto keŋ denaanɔɔ dekyaŋ wɔlete keŋ benaana nae kekulu ado yenaŋ denaanɔɔ keŋ nɛ, tebuluse ala doo botɔɔ te tebuluse ala mɔ doo nae kekulu keŋ yenaŋ alate keŋ mɔ. 41Mena dɔɔ tebuluse anaara doo denaanɔɔ keŋ yenaŋ daale te anaara mɔ doo ka yenaŋ daale. Ŋe popou yɛɛ tebuluse gyanaara, keŋ bɛɛ koe kedeesase wonembia ŋe dɔɔ. 42Ba besewɔ kpae boya yɛɛ tebuluse anaara see botɔɔ fa katoo kedeesa. Ŋe man kamasɛ dɔɔloŋ yɛɛ nawɔɔtɔɔse atooro (3) te ŋɔ ɔfalaboŋ yɛɛ nawɔɔtɔɔse atooro (3) te ŋɔ ɔkooroŋ yɛɛ nawɔɔtɔɔse ala (2). Ŋe dɔɔ te bɛɛ mo abɔɔ ŋan bɛɛ mo koe katoo kedeesa na kedeesase akaŋ ŋan wonembia nɛ gyakaa. 43Nyeela ŋan bɔɔ gokii ŋa ŋgba darawaase te ŋe dana nyimbia ala, keŋ ŋe man dokoloŋ dɔɔloŋ yɛɛ nyiŋmaatɔɔ nɛ wuluŋɛɛ dekyaŋ keŋ dɔɔ kilisi. Bɛɛ mo kedeesa naaneŋ ŋan bo gyakaa tebuluse ŋan dɔɔ.

Saese denɛɛ ŋan

44Denaanɔɔ tɔɔmante keŋ doo debɔɔ man nɛ, denɛɛ ala doo dekpaŋalaŋ tɔɔmante keŋ man. Daale doo denaanɔɔ keŋ doo ado yenaŋ nɛ te ke teena ata yenaŋ, te daale mɔ doo denaanɔɔ keŋ doo ata yenaŋ nɛ te ke teena ado yenaŋ. 45Te ɔ yako maŋ nyiaa, <Deni keŋ teena ata yenaŋ nɛ yɛɛ saese baŋ bee gyee ɔsom deni dinaa keŋ wui, 46te deni keŋ teena ado yenaŋ nɛ yɛɛ saese baŋ bee gyee kedeesaboe keŋ nɛ wui. Baŋ yɛna Sadɔke bia baŋ baageŋ yɛna Lewitena baŋ be dana gbɛɛ nyi baa kɔŋ Degbeŋgyoo siaman kaa som e.>

47Keŋte ɔ maa ba dekpaŋalaŋ keŋ, na ka yenaase pou yɛɛ kyɛɛkyɛɛ, ke dɔɔloŋ man yɛɛ nawɔɔtɔɔse sɔŋonyetoo na kufu (150). te kɔ ɔfalaboŋ mɔ yɛɛ nawɔɔtɔɔse sɔŋonyetooro na kufu (150). Na kedeesaboe keŋ doo ɔsom deni dinaa keŋ siaman.

Ɔsom deni dinaa wɔle keŋ

48Ɔ moo maŋ kɔŋ ɔsom deni dinaa keŋ poto man, te ɔ maa poto keŋ akyaŋse ŋan. Ŋa yenaase pou ɔfalaboŋ yɛɛ nawɔɔtɔɔse gyanaara (8). Denaanɔɔ gbɛɛ keŋ ɔfalaboŋ yɛɛ nawɔɔtɔɔse sao anaara (24) yenaŋ kamasɛ, te ka akyaŋse ŋan ɔfalaboŋ yɛɛ nawɔɔtɔɔse sao anaara (24) yenaŋ kamasɛ. 49Poto keŋ fɛlɛɛ nawɔɔtɔɔse sao na kufu anoŋ (35), te lee ke siaman gyu ke wɔle yɛɛ nawɔɔtɔɔse sao daale (21). Ke dana nawɔɔ kabeteese kufu (10) mo gyu ke gyaŋ, te piilase doo akyaŋse ŋan yenaŋ kamasɛ.